السلام عليكم انا هطرح عليكم مشكلتى بس ياريت مش تستهونو بيها لانها تعبانى جدا وجزاكم الله عنى وعن المسلمين جميعا خير انا بنت عمرى20 سنة مخطوبة وبحب خطيبى اوى ايوه احنا مرينا بمشاكل كتييييييير تعبتنى جدا جدا بس بحاول مع نفسى احلها مشكلتى ظروف خطيبى المادية هو متعلم تعليم عالى وظروف بيتهم متوسط وتربية ابوهم ليهم ان كل واحد مسئول من نفسه هو اكبر اخواته ويعتبر اكتر واحد فيهم مش كان عامل حساب جواز ومسئولية لانه كان بيقولى انة مكنش لاقى البنت اللى نفسه فيها ولما لاقانى ندم على لحظه وعلى كل قرش ضيعه قبل ما يعرفنى
احنا مخطوبين بقالنا سنة وهو معملش اى حاجة فى الجهاز والمشكلة اللى اكبر من كده انه طيب جدا لدرجة انه كان محوش معايا 3000جنيه وكان صاحبه بيتجوز فاادهمله وصاحبه سافر ومدلوش حاجة وعلى كده مع كل الناس
بالنسبة لزياراته بيجى عادى لكن اهله مش بنشوفهم خالص الا اما يكون عندنا حد تعبان وده عشان مامته مريضه المهم حقوقى عليه كخطيبه ويخرجنى ويجبلى هدايه ده بالقليل اوى اما بيحصل وانا مستوانا كويس يعنى فوق المتوسط بلبس كويس واى حاجة بطلبها بجيبها وعندنا 3بيوت ملك وبابا كان ظابط فى الجيش يعنى الحمدلله مرتاحين احنا متفقين معاه انه هيجيب ب 10000 شبكة وزيهم مؤخر وهناجر شقة وهيجيب 3 غرف وانا عليا الباقى انا تقريبا خلصت جهازى وهو لسه ولما اجى اقوله خلينا نجيب دهب بنص الفلوس اللى معاك ميرضاش ويقولى فى حاجات اهم زى العفش والدهب بيغلى وانا بصراحة حسيت من كلامه كذا مرة عن الشبكة انها ملهاش لازمه وانها بتتحط فى الدرج وهو مش عايز يجبلى شبكة وعلما احنا جبنة حاجة فتحة ب3600 جنية
قولوى اعمل ايه واقوله ايه ياريت تفيدونى بمساعدتكم ليا بس ارجوكم محدش يقولى سيبيه عشان انا بحبه وان شاء ظروفه دى هتتغير وربنا قال خدوهم فقراء يغنيهم الله
بس انا خايفة مستحملش الحياة كده لما اتجوز لانى زى ماقلت انا مش واخده على كده وازهق من الفقر والسلام عليكم ورحمة الله
الظاهرانو الشاب ده جدع وابن حلال شهم وكريم يستاهل انك تقفي معه وتساعديه في اتمام الزواج وانت والحمدلله حالتك المادية افضل من حالته والحياة تكاتف وتعاون وتلاحم وخصوصاوانتوتحبو بعض ومتفاهمين على كل شي ماتخليش الحاجات تاثر عليكم وعلى حياتكم ومستقبلكم واعتبريهادين وسلفة يسددهاحينماتستقر الامور ويتحسن الحال واهم شي في الراجل دينه واخلاقه والفقر عمره ماكان نقصان في الرجل اومذمة له وربناجعل في الدنيا الغنى والفقير لكي تستقيم الحياة والله تعالى يقول -خذوهم فقراءيغنيهم الله – وربنايسعدك معه ويتمم لكمابالخير والصلاح ويوفقكمافي حياتكماالقادمة
ابنتي ليس عيبا ان تساعدي الشاب اللي تحبيه وتوقفي معه في ازمته حتى تكتمل فرحتكم بالزواج انشاءالله وبماانوفقير وعلى قدرحاله وانت من عيلة ميسورة والحمدلله ساعديه حتى بدون مايعلم الحياة تعاون وتكاتف وكلداعشان ترتاحوافي عش الزوجية وتاكدي انك بعملك معه لك الاجرفي الدنياوالاخرةو ربك بيكرمك بخيروالسعادةمع الشاب اللي اختاره قلبك
شوفي يابنتي الشاب جدع وعصامي مايحبش الاعتمادعلى احد وداشي يرفع الراس ويستاهل منك الصبر عليه والوقوف معه حتى تتزوجو وعمرالفقرماكان نقيصةولاعيب في الراجل ياماتجارورجال اعمال يلعبوبالمليارات وهم اوسخ ناس لااخلاق ولادين ولافيهم رجولة وفقراءمعدومين ودخلهم على قدالحال لكنهم احسن ناس اخلاق ودين وفيهم رجولةوشهامةوعزةنفس مش عنداي احدتاني ارجوتكون الصورةوضحت لك وربي يسعدك ويوفقك في حياتك
اتمنى كمان من اى شاب يعلق على اى مشكلة ميقولش لفتاة تبقى ردى على وقولى لى عملتى ايه ؟ اى فتاة بتكتب مشكلة بتبقى محتارة ومش عارفة تاخد قرار وبتختار الراى الى يناسبها ويريحها لان ده مدخل من مداخل الشيطان
انا مبسوطة اوى بيكى وبسارة الى بتنصحك توقفى جنبه ومبسوطة انك بتقولى محدش يقول لى سبيه لانى بحبه لاء طبعا اوعلى تسبيه وزى ماانا مبسوطة منك زعلانة انك مش قادرة تستحملى ظروفه انتى مش بتحبيه مش الحب ده نرضى بيه بحلوه ومره خصوصا انه انا مش شايفة مره ولا شايفة مشكلة من اساسه اولا انتى عندك 20 سنة يعنى لسا صغيرة مفيهاش حاجة لما تقعدى سنة ولا اتنين ولا 3 لحد ما ظروفه تتحسن وتتزوجى وكمان انا شايفة انه انسان مكافح معتمد على نفسه لا والده بيساعده زى الشباب وحتى بيرفض ان والدك يساعده ولما بيستلف من والدك بيرجعهم له على طول وبتقولى ان زوج اختك سالف من والدك كتير ولسا مرجعش له فلوسه لكن خطيبك مش بيحب والدك يساعده طيب بذمتكانسان بالموصفات دى تسبيه برضه هى مشكلته انه انسان طيب زيادة عن اللازوم لانه اخد الفلوس الى محوشها واعطها لصاحبه وانه اتعود ميحوش ودى ان شاء الله نشوف ليها حل اولا انا عايزة اقول ليكى حاجة ملهاش دعوة بمشكلتك بس حتحمسك وحتعرفك ان انتى فى نعمة انتى عارفة ان فى فتيات وصلوا لسن 30 ولم يتزوجوا واوعى تقولى انا مالى بيهم لاء زى ما بتنظرى لاقاربك او لاى فتاة خطيبها مستواه المادى اعلى منك لاء زى ما بتنظرى لايجابيات غيرك لازم تنظرى لسلبياتهم كمان انتى قولتى انه متعلم تعليم على انتى عارفة ان فى فتيات بتتزوج شاب مؤهله التعليمى اقل منها كمان انتى عندك 20 سنة يعنى اكيد هو شاب وليه مستقبل كمان لو سبتيه حتضمنى انك تتخطبى لانسان طيب زيه او تضمنى انك تحبى تانى؟ بالنسبة بقى للشبكة انا مقولتش تتنزلى عنها بس ايه ممكن تصبرى لحد ماظروفه تتحسن او نجيب شبكة بس يعنى بسعر اقل شوية عن الى اتفاقنا عليه وبعدين الشبكة مش بتمنها انتى ممكن تجيبى شبكة مش غالية بس رقيقة وسعرها مناسب بالنسبة بقى انه طيباوى وموضوع انه اخد الفلوس الى محوشها واعطاها لصاحبة ده موقف حلو بس مش كله صح هو محوش معاكى 3 الاف جنيه كان ممكن يساعد صديقه بالف جنيه فقد وانتى بقى ده دور تقعدى تفهميه بهدؤ انه شئ جميل مساعدة الغير بس بحدو امكانياتنا يعنى قولى له اديه اهو صاحبك تزوج وسافر ولم يعطيك شئ من الفلوس واحنا لسا متزوجناش بس مش من باب انك تانبيه لاء بالراحة فهميه انك بتفرحى لما بيساعد غيرهبس بحدود كمان حوليه تعملى له جمعيعة ويدخل معاكى فيها حتى بعد الجواز عوديه على كدا انك تعملى جمعيات وهو يدخل فيها طالما هو من النوع الى مبيعرفش يحوش وربنا يسعدك يارب ويوفقك وتبقى طمنينا عملتى ايه؟
انا مش قادره اقولك على حل عشان بجد انا فى نفس مشكلتك بظبط وحاسه بيكى بس انا وقعت فى مشكله اكبر وهى من غير مقصد جرحته وحسسته بالفرق المادى البينه وحاسه انه متغير معاياه ومش عارفه اخليه يرجع معابا زى الاول
والله من طريقة كلامك انوا شاب محترم وجدع اوى اوى وانا نفسى اكون زيه وطالما بتحبوا بعض انسى اى حاجة فى الدنيا لا شبكة ولا دهب ولا اى حاجة تقدر تفرق بينكم
وانا مش هقول غير كلمة واحدة ربنا يوفقكم
ياجماعة اللى عايز واحدة برضوا لازم يتعب علشان يخدها واكيد اهلها لما بيطلبوا شبكة ومهر والكلام دة اكيد علشان بيخافوا على بنتهم ودة حق الاهل بس برضوا كل حاجة بالعقل وعلى قد الشاب يقدر يتفق مع اهلها وعلى فكرة 10000 جنية مش كتير دلوقتى وممكن لو هو قدم ولد كويس هيتسمحوا معاة فى بعض الحاجات يعنى لازم اليونة بس من الطرفين مش طرف واحد يعنى مش هيروح يدخل بيت الناس ببلاش لان برضوا فية ناس بتحب تتسلى ببنات الناس ( من اراد منكم الباء فليتزوح وان لم يستطع فعلية بالصيام والصلاة )وخلوا بالكوا من ان لم يسطع دية لانها مذكورة فى الحديث وربنا يوفقكم برضوا اة حبيت اقول لسارة اللى بتقول اللى بيحب يستحمل على فكرة ياسارة فيلم اين قلبى دة فاشل جدا وماينفعش حد يكون عايش فى مستوي عالى اوى وياخد حد تانى اقل منوا الاقل مش فى الفلوس بس ممكن يكون اقل علم ثقافة اجتماعيا كل دة هياثر ومش كل اللى يتمناة الانسان لازم يلقية لازم نكون عقلين برضوا فى اختيارتنا وبرضوا على ماينفعش يتجوز انجي هههههههههههههههههههههههههه
من اولها كده احمدى ربنا انك لقيتى عريس طيب و راجل و يعرف ربنا و بيعتمد على نفسه و بعدين انا مستغرب على معظم البنات اللى عاوزين يدبحو فى الشاب اللى يتقدملهم يعنى انا مثلا 21 سنه دخلى فى الشهر ميزيدش عن 1000 1500 جنيه بعد طلوع الروح و ساعات مش بلاقيهم بس يا فرحتى لما رحت اتقدم للبنت الوحيده اللى اتنيلت و حبتها عملت زيك كده و اهلها قالولى ان لازم يجيله شبكه ع الاقل زى اختها عارفه بكام 25000 جنيه طب ازاى اولا انا شاب يعنى على الاقل لو مش هلبس هدوم حتى و لا هشرب سجاير ع الاقل انا بصرف على اكلى ابسط ما فيها يعنى الفلوس بتيجى السبت تروح الاتنين و يعنى ما اكلش مثلا 25 شهر علشان اجيب شبكه زى بتاعه اختها اللى خطيبها بياخد مصروف من باباه و كل ده و عايزين شاب يعبركو و الله الله يكون فى عون الشباب
لا حول ولا قوة الا بالله شبكة ب 10000 بجد حاجة غريبة جدا منين بتحبيه ومنين بطقطمي وسطو كدا وعايزة اقولك حاجة صغيرة الحب عمرو مكان بالدهب ولا بالفلوس و انا شفت بنفسي ياما ناس بتجيب احسن شبكة فالخطوبة وبعد الجواز بيتغيرو 360 درجة يابنتي مش بالشبكة اما بالنسبة للخروجات والهدايا وكدا ممكن تخرجو مرة مع بعض كل فترة ويعني مش لازم يصرف كتير فالخروجة دي بيتكم اولى و خديها نصيحة مني لو هوة انسان محترم و اخلاق ويعرف ربنا اصبري عليه لحد ما يقف على رجلو
وربنا يوفقكوا
وكمان عاوزة اسال سؤال هو انا مش من حقى ان يجيلى زى كل البنات وجوزى يتعب فيا شوية؟ وكمان خطيبى اللى كان بيقولى ان الحب والفقر مينفعوش مع بعض بس انا والله العظيم فى اوقات بتعدى عليا مش عايزة اى حاجة منه غير بيت يسترنا وشغل نعيش منه وبنسى الافكار دى خالص وفى اوقات تانيه برجع افكر فيها تانى لانى بشوفه ساعات مستهتر بالظروف دى
اولا احب ارد واقول انى متشكرة جدا جدا لكل نصايحكم بس انا عاوزة اقول انا بطبيعتى قلوقة وبفكر فى المستقبل كتير وكمان عاوزة اقول بالنسبة للاتفاق مع خطيبى يعتبر انا اقل واحدة فى اخواتى وقرايبى فى الاتفاق فده شوية ماثر فيا بس كمان انا مش مادية انا لما بطلب حاجة من اهلى بيجبوها بس بعد سنة ومش بالسلهل لان بيتنا محافظ شوية وعلى فكرة انا عمرى متكلمت معاه بالنسبة لاهله او حقوقى عليه كخطيبة ان بس بتكلم معاكوا وانا عمرى فى حياتى مطلبت حاجة من حد الا بابا ولا حتى من اخواتى فازاى هطلب من خطيبى وحتى لو فى مواسم انا وماما قلتله احنا مش عايزينك تجيب اى حاجة وخليك مركز فى شقتك وعفشك وعمر اهلى مابصوا لحاجة مادية بس لما لاقيته بيدى فلوسه لاى حد وبيصرف فى اى شىء مش مهم بقيت ازعل واخاف على نفسى معاه بعد الجواز وكمان انا لما كنت بخرج معاه انا اللى بشترى لنفسى اى حاجة عاوزاه ومش بطلب منه لحد دلوقتى بس بينى وبين نفسى بيبقى نفسى هو اللى يجبلى ويعزم عليا بشوف ناس قرايبى مش عندهم كسوف واصلا عايشين على حساب خطيبهم وكمان انا مقدرش اقول ل بابا ساعده لان انا ليا زوج اخت لما بيعوز اى حاجة بيجرى على بابا وبيستلف منه بالالف ومش بيرجعها فانا اتعقد وكمان خطيبى حساس جدا وعمره مايفكر يستلف من بابا ده حتى لو استلف حاجة من باباه هو بيعمل اى حاجة عشان يرجعهالو تانى وكمان انا ةهو بنحب نعيش على قد اللى معانا ومش بنحب نستلف من حد على فكرة كمان انا خطيبى الحمدلله بيشتغل وممكن يجيب فلوس كتير بس هو مش بيعرف يفكر كويس هيودى الفلوس فين وانا لو شايفة انه لو مش هيقدر ينفذ للاتفاق ده مش هلزمه بيه وشكرا على ردودكم اللى ريحتنى كتير وربنا بفك كرب كل المسلمين
السلام عليكم ورحمة الله وبركاته
ان جائكم من ترضون دينه وخلقه فزوجوه
ان كان خلوق ومتدين فتوكلى على الله ثم ان حضرتك قولتى انك بتحبيه والحب تضحيه وما فائدة المال وانتى غير سعيدة او زوجه لرجل مزواج او ليس على خلقوممكن باباكى يساعدة شويه مفيش مشكله ما دام هذا الشخص سوف يسعدك وهذه غاية كل اب فى الدنيا سعادة اولادة اما موضوع الشبكه غمن الممكن الاستغناء عتها نهائيا ولو خايفه من كلام الناس والدك يسلفه فلوسها وبعد الدخول بيعو الذهب وردو لوالدك فلوسه واستعيضو عنها بذهب صينى
وزى ما انتى قولتى خدوهم فقراء يغنيكم اللهبس المهم انك تتاكدى من مشاعرك ومن اخلاقه وبعد هذا توكلى على الله وربنا يوفقكم ان شاء الله ومش تنسو تعزمونى فى الفرح
تحية لكى سيدتى…
حقاً انكى فتاة عظيمة.. فياليتنى كنت مكان هذا الرجل الذى احببتيه حتى استمتع بهذه اللحظات الجميلة مع فتاة عظيمة مثلك.
اولاً وقبل كل شئ.. عليكى ان تعرفى ان الفقر امر نسبى, فمن الممكن ان تجدى شاب فقير ولكن يستطيع ان ينفق على زوجته وبيته فهو يملك قوته وقوت ابنائه, وفى الوقت نفسه تجدى شاب فقير لا يستطيع ان ينفق حتى على نفسه فكيف ينفق على بيته وزوجته.
وهكذا تجدى الفقر يختلف من فقير الى فقير اخر.
وانت عليكى ان تحددى الى اى طائفة ينتمى حبيبك.فهل هو يستطيع ان ينفق عليكى وعلى ابنائك ام لا ؟؟؟؟واذا كان يستطيع فلا تترددى فى الزواج منه…. وان لم يستطع… فليوفقه الله.
وفى هذه الحالة لا انصحك بالزواج منه.
حازم حمام/محاسب الكترونى فى الخليج
اختى فى الله … اسمعى الكلاه اللى هقولهولك ده وافهميه كويس
زى مانتى ما قلتى ربنا بيقول فى كتابه العزيز
(وانكحوا الايامى منكم والصالحين من عبادكم وامائكم ان يكونوا فقراء يغنهم الله من فضله…)
ويقول ايضآ(الطيبات للطيبين والطيبون للطيبات…)
ويقول الرسول صلى الله عليه وسلم (اذا جاءكم من ترضون دينه وخلقه فزوجوه)
من خلال ذلك اريد ان اقول ان الشرع قال قبل احنا ما نقول ان الجواز مش فلوس كتير ولا شقه فخمه ولا ذهب كتير ولا هدايا كتير ولا اى حاجه تتعلق بالماديات
بل تكلم من ناحية الدين والاخلاق وتشمل المعامله الطيبه من الطرفين للاخر
فانا انصحك انك لو بتحبيه وهو بيحبك وفيه كل الصفات اللى انتى عايزاها ويكون كويس معاكى وبيعاملك معامله كويسه دايمآ ويكون اهله كويسين واهلك انتى راضيين عنه يبقى سيبك من حتة الفقر وتاخيره عن الزواج ولازم تصبرى عليه
طالما بتحبيه يبقى ضحى عشانوا وبعدين لما تتآخرى شويه عن الجواز بس تتجوزى واحد كويس وبتحبيه احسن ما تستعجلى وتتجوزى واحد مش كويس ومش بتحبيه وتندمى بعد كده
والجواز بعد كده بيجيب الرزق زى ما قال الرسول(لكل شئ مفتاح ومفتاح الرزق النكاح)
وزى ما بنسمع ان اللى بتحب واحد وشايفه انه كويس ومتمسكه بيه بترضى تعيش معاه حتى لو كان الدهب عباره عن دبله والعفش عباره عن حصيره وقله والاكل عباره عن رغيف عيش حاف
وفيه حكمه بتقول ارضى بالقليل عشان ربنا يديكى كتير
وكمان من علامات التقوى الرضا بالقليل
وكمان من صفات الزوجه المثاليه انها تعيش على الحلوه والمره وترضى باللى ربنا يقسمهولها
لان الجواز مش اكل كتير وفلوس كتير ولبس غالى وشقه فخمه وعربيات وعفش كويس
ولا حتى الجواز متعه فى اوضة النوم واولاد والكلام ده كله
صدقينى اللى بيبقى فاهم ان الجواز كده بيتعب بعد كده وغالبآ بيفشل فى جوازه
لكن الجواز بقى زى ما قال القرآن(وجعل بينكم موده ورحمه)يعنى هدوء وتفاهم وحب واخلاص ومعامله كويسه واهتمام ببعض وخوف على بعض وكلام حلو دايمآ وتضحيه من اجل اسعاد بعض وغير ذلك من اشياء كويسه تتم بين المخطوبين والمتزوجين والله هو ده الجواز اللى بيعيش صدقينى
اخر حاجه هقولهالك عشان تطمنى هقولك على حاجه تشبه حالتك دى
انا خطبت بنت كنت بحبها واحنا حالتنا الماديه زى بعض ووافقت عليا وادينا مخطوبين بقالنا عشر شهور ولحد دلوقت ما جبتلهاش حاجه لان ظروفى الماديه ما تسمحش وهى قالتلى انا مش ماديه ومش عايزه منك حاجه دلوقت واهلها كمان ما رضيوش يخلونى اجيب حتى جزء من الدهب ونعمل خطوبه وقالوا اللى معاك اعمل بيه حاجه فى الشقه احسن
وهى على الرغم انها عندها 21 سنه لكنها قالتلى براحتك وانا مستنياك وادينا مخطوبين بقالنا عشر شهور ولسه ان شاء الله مش هنتجوز الا بعد حوالى سنتين
ومش كده وبس دا هى حاليآ بتشتغل ومعاها فلوس وعايزه تديهالى تساعد بيها معايا فى موضوع جوازنا بس انا مش عايز أخد منها حاجه المفروض انا اللى اديها
المهم ده كله عشان متمسكه بيا لانى بالنسبالها انسان كويس وفتى احلامهاومش قادره تستغنى عنى
فانتى اعملى زى ما قلتلك وان شاء الله ربنا يوفقك ويسعدك فى جوازك
لو عجبك كلامى وعملتى بيه تبقى ردى عليا وقوليلى عملتى ايه
عزيزتى علشان اقولك تعملى ايه لازم احكيلك حكيتى انا شاب لى سبع اخوه مريت بفس مشكلت حبيبك زمان كنا لا نملك قوت يومنا وكنت وحده ورحت اخطبها وانا لا املك شى فى حياتى ابداااااا الا الطموح فعلا اتخطبنا وسفرت للخارج قعدنا واحنا من الارياف فى بيت السقف بتاعو من الخشب القديم (مخلفات البيوت) وبعد تسع سنوات جواز وكفاح حتا اصبح المنطقه بكملها تحكى عن قصه كفاحنا وانا لن حاليا امتلك اراضى وملاك تعدى الاثنين مليون جنيه واقسم بالله بالحلال عرفه وفيه ميزت خطيبيك وهى اللى معايه موش ملكى صدقينى لا تتخلى عن خطيبك وممكن تبسطو الامور شويه وتمشى الاحوةال بس يكون عندو صموووووووووووح
حبيبتى
انا حاسه بيكى جدا جدا وهاكلمك من وجهه نظرى اللى شيفاها اولا انتى شكلك ماديه بطبعك صح بس ده مش عيب يعنى بس لو حطيتى الماديات فى دماغك هتتعبى ومش هتحسى بحبك له ويمكن تحسى انه اقل منك وممكن تكرهيه وتفضلى فى تشاؤم علطول معاه
هاقولك اصبرى لان حقك لو ماخدتهوش قبل الجواز مش هتاخديه ولا هيحصل بعد الجواز وهتستسلمى بقا عشان هتبقى ست مش بنت وهتسكوتى بدل مايقولوا مطلقه
اصبرى حتا لو الفتره بتاعت الخطوبه هتطول ان شالله تقعدى كمان سنه اوسنتين (اللى بيجى بلاش بيروح بلاش)
مش زنبك ان ظروفه كده اللى انتى عايزاه اعمليه واتمسكى بيه وكمان انتى جبتى هديه قراءه الفاتحه 3000 جنيه خلاص كملى عليهم كمان 7000 جنيه يبقا كده عشره الاف جيبى اللى نفسك فيه عشان متحسيش بعد كده بظلم لنفسك
مش بقولك اضغطى عليه ولا تسيبه وكده بالعكس انتى عارفه ظروف الشباب شكلها ايه وكده اليومين دول بس فى نفس الوقت حقوقك على جمب لو مش جاهز للجواز مكنشى يتقدم
بس هوه اكيد شخص كويس مادام بيعتمد على نفسه يبقا هيبقا حاجه كويسه بعدين ان شاء الله مش شرط يعنى انكوا هتفضلوا بنفس الظروف دى مش قاعده يعنى
اصبرى لغايه ما يعمل شقته وتجهز وكده وتجيبى دهبك بس مش تكترى عليه برده عشان الدهب بقا بجد مشكله بس فى الوقت ده تتجوزوا
اما حكايه اهله فى رءايى هيه مشكله اه بس مش مهمه خالص يجوا ولا ميجوش هتعمليلهم ايه يعنى
المهم البنى ادام اللى معاكى فقط لا غير شخصيته تمام معاكى يقدر يحميكى وانتى بتقولى طيب الحمد لله واللى فى ايده مش له كده يعنى ومادام بتحبيه وهوه بيحبك يبقا كفايه اوى ونحمد ربنا ربنا يهنيكوا ببعض فى الحلال
بس هوه محتاج منك انك تنصحى لفلوسه وكده قوليله الفلوس دى هنعمل بيها ايه وهنصرفها ازاى وكده وانت بتسلف صاحبك ليه هوه محتاج اوى ولا احنا اولى بالفلوس دى كده يعنى
وكمان بما انتى مش متعوده على الظروف الماديه بتاعته دى حاولى تقللى احتياجاتك لغايه ما ربنا يفتحها عليكم ويكرمك برده انا اقصد احتياجات اللى مش ضروريه اوى وكده وضبطى نفسك على كده وانتى هتتعودى وصدقينى ما دام بيحبك يبقا هيجيبلك اللى انتى عايزاه من غير ما تتكلمى بس يمكن ظروفه مش مسعداه
وعايزه اقولك ان الفقر عمره ما بيخرب بيوت اللى فيها بيحبوا بعض الا بقا كانت مصر كلها خربت
لان الفقر بقا فى مصر كلها ومادام بتحبيه خلاص استمتعى بالحب ده معاه وارمى الماده ورا ظهرك
كل شئ باوانه زى ما مكتوب عند ربى وربك
بجد انا طولت عليكى اوى اوى بس حبيت اتكلم معاكى فى كل حاجه يا رب اكون افادتك ويا ريت تطمنينى عليكى لو برد بسيط
وربنا يريح بالك ويهنيك ويعينكم على جوازتكم
اولا انتى بتقولى خدوهم فقراء يغنيهم الله شبكة ايه اللى ب10000 هيا الشباب لقية تتجوز ياحبيبتى انتى المفروض توقفى معاه وتخففى من عليه مش تزودى وبعدين ازاى بتحبيه وبتقولى خايفة من الفقر اللى بيحب بيستحمل وكفاية انه كويس وطيب مفيش حد كامل الكمال لله وحده