انا عمرى 24 سنه من 8سنين عندما كنت فى سن14 تقدم لخطبتى شاب هو قريبى من بعيد بعد ماوالدته شافتنى وعجبتها وانا وافقت مش عارفه ليه وماكنتش اعرف يعنى ايه حب وجواز المهم اتخطبنا لمد 4سنين كلهم خناقات علشان هو مش بيتكلم وانا كنت عايزاه يتكلم معايا علشان افهمه واعرف طباعه وهو عصبى جدا وكل كنت ما اجى اسيبه بابا يقوللى لو عايزه تسبيه ماشى بس هو كويس وكده وفكرى وردى عليا بس انا كنت طول عمرى بخاف من بابا وماما ومش بتكلم معاهم اوى ولو فكرت اسيبه ماما كانت تقول حد لعب فى دماغك حد من اصحابك مؤثر عليكى فكنت بخاف اقول لأ واتجوزنا بعد 4سنين خطوبه وبرضه مش فاهمين بعض وهو اول كام شهر دلع بعد كده خلاص وطلباته كتير اوى لو حاجه وقعت تحتيه لازم انا اجيبها ولو قولت مش قادره يزعل وده اتفه حاجه وفى اول سنه جواز كنت رحت مع جارتى لدكتور اول لما شفته فى حاجه شدتنى ليه وبرتاح لما اشوفه اوى وبعد كده حبيته فى صمت وانا حاسه انه بيعزنى وزادت المشاكل بينى وبين زوجى بس مش علشان اللى بحبه علشان دماغه وحشه اوى وبشهادة كل اللى حوليا لأنه كل حاجه تافهه يعملها مشكله وعايزنى خدامه عندهه وبيعلى صوته عليا فى الشارع وانانى اوى بعد سنتين من جوازنا ماما قالت لمامته ان احنا لازم نروح لدكتور علشان نخلف وحماتى كلمته وروحنا وعمل عملية حقن مجهرى والحمد لله ربنا رزقنا بولد وهو دلوقتى كل حياتى بس زادت مشاكلنا كلها الواد مغير نومه ليه مقلعتوش البامبرز ليه بتزعقيله ليه ده غير انه مش بيقعد معانا خالص لأنه له عملين فى الوقت الحالى وبنشوفه يوم بعد يوم حوالى 7 ساعات بيقعد معانا بس ياما نايم ياما بيتفج على التليفزيون ومركز اوى ولما اكلمه بيزعق ولما اقولله محتاجه اتكلم معاك زهقانه ونفسى اعيط فى حضنك يقوللى وهى ناقصه زهقك ومن كتر ماانا قاعده لوحدى وروتين الحياه هو هو جالى ملل وزهق واكتئاب مكمان المصيبه ان الشخص اللى بحبه بيزيد حبه فى قلبى يوم عن يوم ولما بسمع صوته ببقى فرحانه اوى وبحس احساس غريب فى قلبى وبتمنى اسمع صوته ارجو حل لمشكلتى واشكركم على سماعكم لى
خدي بالك من بيتك يا بنتي عشان متخربيش بيتك بيدك
جوزك شغال شغلتين عشان يوفر لكم حياة كريمة
ودكتورك كل يوم وكل ساعة عنده مريضة او مراجعة اجمل واحلي منك
دكتورك انتي بلنسباله تغيير مش اكتر . حب ايه ده دكتور وهو في الجامعة كانت معاه بنات اشكال والوان وكل شويه بيشوف بحكم عمله عمره ما راح يفكر فيكي اكتر من ان تجربة جديدة ولو سمحتيله هيجرك للحرام وهيسيبك بذنبك مع ربنا
معلشي جوزك برضو متعرفيش ضغوط الشغل والحياة عليه ازاي . يمكن انتي عايزة تعيطي في حضنه هو كمان محتاج انك تطبطب عليه
الحياة جدا قاسية الأيام دي راعي ربنا في جوزك بدل ما تخسري كل حاجة
تحياتي