انا رجل فى العقد الثالث من عمرى متزوج من ثمانى سنوات رزقنى الله ببنت فى اول عام من زواجنا ومن وقتها ونحن نتعالج لكى ننجب طفلا آخر وهذا الامر يحزننى كثيرا زوجتى اصيبت بتكيسات فى المبيض ولقد مللنا من زيارة الاطباء وعلاجهم لا يأتى بنتيجة ولا ندرى ماذا نفعل ؟ هذا الامر مأثر على مزاجى وعلى عملى وحتى زوجتى عندما تأتيها الدورة تبكى كثيرا لا اخفى عليكم انى فكرت فى ان اتزوج عليها ولكن خائف على مشاعرها خاصة وان الامر ليس بيديها ولا ذنب لها فى ذلك ؟ دلونى ماذا افعل خاصة وانى دائم التفكير فى الامر ليل نهار حتى اصبحت حياتى كالجحيم انا الحمدلله مؤمن بالله وبقدره لكن غصب عنى والله مش عارف اعمل ايه ؟
لو تزوجت بأخرى فستجرح الأولى وستظلم الثانية وربما تضحي بالثانية عند ابسط مشكلة..يبدو ذلك جليا من كلامك من خلال خوفك على مشاعر زوجتك..رأيت حالات كثيرة يندم فيها الرجل ويضحي بالثانية ويحملها لقب مطلقة..اذا كان الشرع احل التعدد فلظروف معينة ولشخصيات قوية يستطيع فيها الرجل العدل ولايظلم أي طرف أما ما نراه كثيرا فهو نزوة وتضحية ببنات الناس وتحميلهن لقب مطلقات ثم العودة للاولى..طالما انت خائف على مشاعر زوجتك لا تتزوج والزم الاستغفار والدعاء
اولا نمسك سبب رغبتك فى الزواج من اخرى وهو الانجاب
مبدئئيا انت انجبت طفله فعلا يعنى انت مش محروم من انك تكون اب
زوجتك اللى هى السبب دلوقتى فى عدم الخلفه خلفت قبل كده وبعدين ربنا اراد انه يؤجل خلفتكم التانيه او تكتفو بالطفله وده ارادة ربنا ماحدش يقدر يقف ادامهاوممكن بارادة ربنا برده ترجع زوجتك تخلف تانى وقت لما ربنا يريد
ممكن ده يكون قدر زوجتك انها ما تخلفش تانى فى الوقت الحالى ولو ده حقيقى يبقى من حق زوجتك عليك انك تواسيها وتقف جمبها وتحاول معاها طول العمر انك تجيب طفل تانى
وممكن يكون ده قدرك انت ووقتها لو تزوجت اخرى هتلاقيها يا اما ما بتخلفش يا اما حضرتك ممكن يحصلك مشكله زى ما حصل لمراتك لانه مش نصيبك انك تخلف تانى
وممكن – وده حصل فعليا ادام عينى – انك تتزوج باخرى وبعد زواجك بالاخرى مراتك الاولى تخلف
يبقى انت المطلوب منك انك تؤمن بالله وتخليك مع مراتك وتحتسب صبرك واجرك فى رضا الله
لو ليك نصيب انك تخلف تانى يبقى وقت ما ربنا كاتبلك هتخلف من مراتك وبدون اللجوء للزواج التانى
ثانيا الزواج التانى مش سهل اطلاقا وفى مشاكل كتير اوى هتقابلك
اولها المشكلات الماديه ومش المقصود بيها انه تكون متيسر او متعسر ماديا لكن المقصود بيها العدل المادى بين البيتين على اد ما تقدر وده فى منتهى الصعوبه
يعنى خلينا ناخد مثال بسيط جدا
لو انت جبت كيلو تفاح لكل بيت
زى بعض اهم وبعتهم للاتنين مع البواب مثلا فى نفس اللحظه
هل ده كده عدل
ممكن واحده فيهم تكون بتحب التفاح وواحده مش بتحبه يبقى انت كده فرحت اللى بتحب التفاح وظلمت اللى مش بتحبه
هتخرج من الموقف ده بانك تشوف كل واحده بتحب نوع فاكهه ايه وتجيبه
لكن فى فرق سعر بين الفاكهتين
او اللى مش بتحب التفاح كا نفسها فيه لسبب او لاخر
مشكله تافهه وبسيطه وممكن ما تخطرش فى بالك
لكن قيس على كده باه المشكلات الكبيره
ثانيا مشاكل العلاقه الانسانيه بينك وبين زوجاتك
لو انت هتقسم الاسبوع باليوم والساعه والثانيه بينهم
وجت مره واحده منهم تعبانه وفى وقت الزوجه التانيه هتكون مع مين؟؟
هتظلم اللى يومها ولا هتظلم التعبانه
ده مثل بسيط جدا على المشكلات الفظيعه اللى من النوعيه ده
ثالثا مشكلة العدل بين الابناء واللى ممكن نحدث فيها بلا حرج
رابعا مشكلة مواجهة زوجتك الاولى بالامر واللى مواضح من كلامك انك خايف على مشاعرها
تفتكر ايه المشكلات اللى ممكن تواجهك معاها وحجمها من انعدام ثقتها فيك واحساسها انه سنين عمرها ضاعت هدر معاك بعد ما تزوجت بواحده غيرها
صدقنى احساس مؤلم بشكل مش ممكن تتخيله
ولو عايز تتخيل جزء منه
اعد كده مع نفسك وتخيل زوجتك فى نفس موقفك وانت عندك اسباب تمنعك من الخلفه مره تانيه وزوجتك عاوزه تطلق منك او مجازا تتزوج عليك علشان تخلف تانى
حسيت احساس الكسره والمهانه والانكسار اللى زوجتك ممكن تحسه
خامسااحساس بنتك اللى موجوده اللى الطبيعى انها تكره مرات ابوها اللى اخدت منها ابوها
واحساس اطفالك اللى جايين اللى المفروض تفرح بيهم واللى ممكن تكرهم انت شخصيا لما تحس انهم كسرو بنتك الكبرى
وتكره نفسك لما تلاقى الاخوات بيكرهو بعض وبيكيدو لبعض وانت بينهم مش عارف تتصرف
كل اللى فات ده غير مشكلات الزوجه التانيه نفسها اللى ممكن تكون فى شخصيتها واللى مش هتظهر غير بعد الزواج كاى زواج بيكون بطيخه مقفوله ما نعرفش اللى جواه
وبما انه ربنا كرمك بزوجه كويسه احمد ربنا عليها وبلاش تفكر تفتح بطيخ تانى ممكن يكرهك فى الزواج كله وفى نفسك كمان
اخي علاج حالة زوجتك موجود ولازم تراجع اكثرمن طبيب مختص في امراض النساء والولادة عشان يساعدوك على التغلب على الحالة التي مصابة بهازوجتك ونشاء الله تحمل وتخلف ويزقكم الله بمولود ذكر مع الاخدفي الاعتبار ان الله عزوجل قادر على كل شي ومع الدعاءوالاستغفار لله عزوجل تتشافى زوجتك وتحمل وتخلف مثل الاول وماذلك على الله بعسير واسال الله ان يباركلكم في بنتكم هذي ويجعلها من البنات الصالحات ويرزقكم ثمرتها ويصلح شانها وتفرحوا بها طوال حياتكم الزوجية وموضوع انك مش عاوز تتزوج مراعاة لمشاعرزوجتك فهذا لطف واحسان منك تجاهها تشكر عليه وتنال عليه الثواب من الله عزوجل لكن لايمنع انك تتزوج اذا كان مرضها يمنع الخلفة تاني والاطباء اجمعوا على انه لاامل ولاجدوى من الحمل معها فعندها جاز لك الزواج وهي لايحق لها ان تعترض اوتمانع زواجك فهذا شرع الله وعلينا االرضابه والايمان به وعدم المخالفة في ذلك والله يجعل لكم مخرجا ويرزقكم من حيث لاتحتسبوا ويوفقكم ويسعدكم في حياتكم الزوجية