انا شاب عندى 29 سنة اعمل بوظيفة مرموقة والحمد لله خطبت انسانة عمرها 25 سنة بقالنا حوالى شهر ونص مخطوبين لكن بعد ارتباطى سافرت بعدها بخمسة ايام .. انا عملى فى غير البلد اللى بتقيم فيها خطيبتى وبعدى عنها كان سبب انها خايفة تتربط بانسان مش موجود معها فى اوقات هى تكون محتاجاه فيها .. هى بتحلم زى اى بنت انها تلاقى خطيبها جمبها يودها ويزورها ويخرج معاها لكن ظروف عملى حرمها من دى كله .. ابتديت اتصل بيها يوميا احس معاها بعدم مرونة فى الحديث لدرجة انى اذا ساكت هى ما تقول حاجة احاول اسألها عن حياتها ترد عليا باسلوب مختصر .. فضلت على هذا الحال وانا اشعر بعدم ارتياح لهذه الطريقة وبعدين كلمتها عن طريق الانترنت واخدت فترة نتكلم شات بدل الموبايل وهى برده بنفس الاسلوب .. صارحتها انى تعبان من اسلوبها معايا لكن كانت تحملى المسئولية بتقولى اسلوبك هو اللى بيخلى مش عارفه ارد عليك .. اضايقت من حدة كلامها معايا وقولت لنفسى سيبها فترة تراجع فيها نفسها وانقطعنا عن الاتصال وبعد كام يوم اتصلت بيها اسأل عليها وبقولها ماسألتى عليا ردت تقولى انت المفروض تسأل عليا مش انا اللى اسألك عليك وان هى مريضة .. اضايقت مرة تانى من اسلوبها وحسيت ان لغة التفاهم مابنا مستحيلة تركتها اسبوع بدون اى تواصل او اتصال لقتها بعتالى رسالة انها عايزة تكلمنى ضرورى اتصلت بيها وسألتنى مش بتتصل بيا ليا وعاتبتنى كتير على اساس انها مريضة وكان لازم اسألها عليها وان مش مقدرها ولا حتى براعيها وصارحتها انى كنت مضايق من تصرفاتها معايا واتخانقنا فى التليفون وفى نهاية المكالمة بتقولى فكر فى الامور كلها وشوف انت ناوى على ايه وابقى بلغنى .. انا حاسس ان كده وصلنا لطريق مسدود وبفكر انى افسخ الخطوبة لكن ضميرى وقلبى مش موافق خايف اظلمها او اجرحها صليت ودعيت ربنا انه يهدينى للحل مش عارف اعمل معاها ايه والله اخترت كتيير وحاسس انى دايما بفكر فيها ..
عاوز ارد على المدعو- استاد القلوب- انت للاسف شخص ماعندك نظر ابدا ولاذوق في الكلام وقسوة في كلامك وتجنى على الاخرين بدون معرفة حقائق الامور استاد قلوب قال بلاخيبة كلامك يدل على سوء اخلاقك والبئية التي عشت فيها دي الحقيقة بدل ماتنصح الاخ السائل وتعرفه انه غلطان جدا في حق البنت خطيبته جاي تدافع عنه بكل حرارة وبسالة وتضع اللوم والخطا على البنت وتصف اسلوبها بالزبالة والله انك انت واسلوبك وكلامك ده هو الزبالة وقل خيرا او اصمت لااكثر الله من امثالك من اشباه الرجال
انت عاوز البنت هي اللي تسال عليك وتتصل بك كل مرة يبقى انت غلطان ولاتعرف انو البنت من طبعها الكسوف والحياء ودي نعمة احمدالله انها موجودة في خطيبتك ثاني حاجة المفروض انك تسال عليها وخصوصا انها مريضة وتطمن عليها وده يعطيها انطباع انك تحبها فعلا ولكنك تجاهلت كلهذا وكبرياءك جعلك تتمادي في اهانة خطيبتك وعدم السؤال عنها واي وحدة مكانها من حقها تزعل وماتعبركش خالص من اولها وتعمل في البنت كده وعايزها تبادلك المشاعر والعواطف وانت ماكلفت نفسك تسال عنها وهي مريضة وكمان تتخانق معاها شر البلية مايضحك تصرفك غير محترم ولاذوق وغير طبيعي بالمرة ارى انك بكدا تظلم البنت دي معاك ومن الافضل انك تنهي تلك الخطوبة وتفسخها بدلا من الاستمرار في قسوتك وظلمك لهذة البنت وكل منكما ينام على الجنب اللي يريحه هي ربنا بيكرمها بخير منك وانت ربنا بيكرمك بخير منها والسلام
بص حقولك على حاجة عملتها لماكنت خاطب بنت عمي وسافرت لاكمال دراستى في الخارج لمدة3سنوات كان ايامها مافيش نت اوموبايل كان التواصل عبر الرسائل البريدية والصور ابعت لها كل يومين الى ثلاثة ايام جوابات وصور خاصة لي واطمنها على حوالي وحياتي الدراسية هناك مصحوبة بالعواطف والاشواق والحنين لها والمشاعرالرومنسية بيننا وهي كمان تبادلني نفس المشاعروالاحساس برسائل وصور وهكذا حتى اني لما اشعر بغيابهاعنى وبعدهاعن عيوني وكاننا عايشين مع بعض وعدت الايام والشهور وخلصت دراسة وتخرجت من الجامعة ورجعت لبلدي واول خطوة عملتها قررنا الزواج والاستعداد له وتم الزواج واكرمنى الله بوظيفة كبرى في احدى الشركات الخاصة والان لنا قرابة اكثرمن 23سنة زواج وفي منتهى السعادةوالاستقرار العائلي
يااخي اناسمعت مشكلتك وعاوزك متزعل منى ابدا انته غلطان في حق خطيبتك دي حقولك ليه اولا- انت الراجل لازم تبادر انت بالاتصال بها والسؤال عنها ثانيا- الانثى مهماكانت محتاجة للحب والحنان والكلام الرومنسي وانت حارمها من كلده وفين وفين لماتتصل بها ثالثا-وسائل التواصل موجودة في كل مكان موبايل نت فيس بوك تويتر وغيره انت عايش فين في كوكب اخر المصارحةوالاعتراف بالحق فضيلة لوكنت عاوزها تواصل معها وحسسها بوجودك معها مش كفاية انها مخطوبة لك وماتسال فيها وصدقني لوكانت وحده غيرها كان رمت لك دبلةالخطوبة وماسالت فيك ابدا البنت تحبك وباقية عليك ماتضيعهامن ايدك تقرب منهاوتواصل معها كل يوم وربي يسعدكم ويوفق بينكم
يااخي البنت معها كل الحق في ده ايه البرود والغير مبالة اللي انت فيها اي وحدةمكانها تعمل اكثر من كدا حتى وهي مريضة ماتسالش فيها وعاوز البنت هي كل شوية تتصل بك وبجانبك مافيش منطق ولاعقل يقول كده اي بنت مخطوبة محتاجة من خطيبها الاحساس بالمشاعروالعواطف والكلام الجميل والمزيد من كلمات الحب والغزل والهيام وده انت فاقده ومش موجود عندك خالص اذا بلاش تظلم البنت معك اذا مش عاوزها ولاتحبها صارحها بالحقيقة وكل منكم يروح لحال سبيله ربي يهديك
على فكره انا مش مع الحلول دى خالص ياعم انت بتقول سافرت بعد ارتباطك بيها بخمسة ايام يمكن تكون مكسوفة او متعودتوش على بعض واكيد فى اى حاجة بتدل على انها بتحبك ولو حاجة بسيطةهى ممكن تكون محتاجةلك تكون جنبها زى ما انت قولت لان معظم البنات رومانسين يعنى محتاجة تحس بحب وحنان فقرب منها على قد ما تقدر لو انت بتحبها يبقى لازم تتكلم معاها لو حتى 100 مرة لانكم اكيد مختلفين فى الطباع ومش من السهل انكم تتعودو على طباع بعض بسهولة وانا بقولك ابدا انت بالحل لان الرجال قوامون على النساء واحذر انك تدخل اى بنى ادم بينكو حتى لو كان صديقك او اخوكوادعى ربنا كتير انه يقربكم من بعض ويبعد عنكم المشاكل ونصيحة اخيرة خدها من اخ بلاش تسمع لاى حد هنا لان فى ناس هنا بتخرب البيوت زى الحلول اللى فاتت دى
على فكرة واضح اوى من كلامها انها عيزة تعمل مشكلة وخلاص عشان تفسخ الخطوبة .. بصراحة انا شخصيا لو مكانك انا افسخ الخطوبة بقلب جامد واسلوب حاد اوى زى مكانت بتكلمك ..قولها كدا اكنك اول مرة بتكلمها لان معلش اللى بتكلمك كدا فى الخطوبة امال فى الجواز ولما يبقى فى اولاد هتتعامل معاها ازاى .. وكمان ظروف شغلك محتاجة انك تخطب واحدة باقية عليك بجد ومستعدة تقف جنبك واهم حاجة بتحترمك وبتحترم تعبك عشانها .. وعموما القرار بالنسبالك سهل انت راجل يعنى تقدر تخطب فى اى وقت وانت مدام صبرت عليها وحاولت تديها فرصتها للاخر خلاص شوف البنت اللى ترتحلها وترتاحلك اكيد هتلاقى واحدة هتفتح معاك مواضيع فى الكلام وهتستمتع بالكلام معاها وعالعموم اقترح عليك تصلى صلاة استخارة قبل القرار دا ولما تنفذه نفذه بحسم ومن غير متعمل حساب لحد دى حياتك وربنا يوفقك للاصلح
بص يا معلم البنت أولا اسلوبها زبالة جدا وانا لو مكانك كنت خلعت منها لو مغيرتشى أسلوب ده خلال شهر لأن انا خاطب بنت علشان تمتع مشاعر واحاسيسى وتضحكنى وتخلينى ابقى نفسى فيها كزوجة تدينى حقثوقى شرعية براحة تامة وكمان اجيب منها بنوتة افرح بيها مثلا انما اخطب بنت تطلع عينى وتقرفنى في كلام وفى حياتى يبقى تظ فيها على طول في كتيير يتمنوا حد زى وكده
وهو ده الى انت مفروض تعمله معاها انك من اخر كده تخلع منها عارف ليه لأن لو هي مش عاملة حساب ليك وبتحترمك يبقى تظ فيها وكمان الى بتحبك عايزة تسعدك بـأى حاجة مش تقرفك وتطلع عين اهلك انت افسخ خطوبة دى وانت راضى بالك علشان انت لا حتجرحها ولا حتظلمها عارف ليه علشان هي عايزة كده ولو ركزت في اخر كلمتين قالتهم ليك فكر فى الامور كلها وشوف انت ناوى على ايه وابقى بلغنى دى كلمتين بيبينوا ليك قد ايه البنت دى مبتحبكشى ومش عاوزاك واضح ان هي كانت بتحب حد وأهلها رفضوه ووافقوا عليك علشان انت ليك مركز وهيبة وكذا او شافوا فيك الزوج المناسب لبنتهم وانت عمتا ليك قرار لازم تاخده وسنك مناسب لقرارات دى
وربنا يوفقك في اختيار قرار مناسب ليك