حاسس ان ربنا نجدني من الجوازة دي

ارجو من الاعضاء سماع قصتى وكتابة ارائهم فى الموضوع دا للأهمية و سوف اذكره بالتفصيل
انا مهندس كنت بحب واحدة من سنين وكنت ساعتها فى الكلية وعرفتها من النت من حوالى 15 سنة والمفروض انها بتحبنى كمان واول مقابلة بينا كانت معاها عمتها وفوجئت بعمتها بتكلمنى عن الشبكة وقيمتها وتقولى انت عارف الشبكة عندنا بتبقى كام انت جاهز للكلام دا وانا ساعتها مكنتش جاى عشان اتكلم فى شبكة ولا اتقدم انا كنت رايح اشوفها واتعرف عليها وهى جابت معاها عمتها. وللعلم هى كانت معاها دبلوم وشجعتها انها تذاكر تانى عشان تدخل كلية و يبقى معاها بكالوريوس عشان مش عاوز اتجوز واحدة اقل من كدا و كمان عشان اهلى يوافقوا.
المهم جريت السنين واتخرجت و طول السنين دى اهلها امها وأخواتها و عماتها و خالاتها وكل اهلها كانوا كلهم بيشككوا فيا و يقولوا لها انى بلعب بيها وبتسلى وانى مش جاد فى موضوع الجواز دا وطبعا مكنش معايا حاجة ولا حيلتى حاجة عشان اتقدم.
بعد كدا اتخرجت من الكلية و اشتغلت ومقدرتش اتقدم بردو لانى مكنتش جاهز وطول المده دى بردوا اهلها بيشككوا فى كلامى و مش مصدقين انى عاوزها لحد ما ابوها عرف و طلب يشوفنى حتى لو مش جاهز عشان يشوف اخلاقى فروحت وقابلته واتكلمنا و قالى لما تبقى جاهز تعالى اتقدم وكان كلامة معايا كويس وبالمناسبة قال لبنته انى انسان محترم و مؤدب و كويس وعجبة صراحتى اوى فى موضوع الجواز دا لانى مكدبتش علية و قولتله بصراحة انا عاوز بنتك بس لسه معنديش لا شقة ولا حاجة بس هكون نفسى واحاول اشوف سفر واتقدم و الراجل مكنش عنده مانع وانتهت المقابلة على كدا مع انى اهلى كانوا رافضين موضوع النت دا وفضلت مصمم عليها و بالتالى قالولى انت حر واقنعتهم ومشوا معايا عشان كنت مصمم وعاوزها.
وفضلت علاقتنا مستمرة و جالى بعد سنتين سفر للخليج فأهلها قالولها انى اتقدم و اخطبها قبل ما اسافر فعندى اهلى رفضوا لانى مكنتش ساعتها جاهز بردو و محلتيش حاجة و كل فلوسى اللى محوشها دفعتها فى موضوع السفر فسافرت واهلها قالولها طالما سافر يبقى كذاب و مش هيتقدم و بيلعب بيكى و دلوقتى يقدر يرميكى ويشوف غيرك ومش هيتجوزك وكانت بتقولى الكلام دا و احلف لها انى هتقدم لها لكن هى كانت احيانا تصدقهم وكلامهم بيلعب فى دماغها وبعد سفرى بشهور كلمت ابويا وخليته يروح يزورهم و يشوف ابوها ويتعرف عليهم وفعلا راح وأمها ساعتها مكانتش مصدقة انى طلعت صادق و انى فعلا عاوز اتجوزها وقالت لها (اية دا؟ دا طلع كلامه بحق و حقيقى) وبقى فى بين اهلى وبين اهلها اتصالات و المهم حاليا بعد سنة من سفرى كان المفروض اخد اجازتى السنوية انما اجلتها شوية شهور عشان يبقى معايا فلوس اكتر وانزل اتجوزها ودا كان تخطيطى من البداية مع العلم انى لسه اللى حوشتة مقدرش اجيب بيه شقة واجهزها و افرشها واعمل فرح وشبكة راتبى ميكفيش اعمل كل دا فكان تخطيطى انى انزل اتجوزها فى شقة ايجار مثلا وأسافر واعملها استقدام وبعد كدا تحصلنى لما ابعتلها وتعيش معايا برا وان ممكن فى الفترة دى ادفع مقدم شقة تمليك بس بعد الجواز لان فلوسى متكفيش لكل دا فى نفس الوقت زى ما قولت.
المهم اهلى راحوا يقابلوا اهلها و يقعدوا يتفقوا و يتكلموا على امور الجواز بس اهلى قبل ما يروحوا فوجئت بأن ابوها بيقول انه هيطلب مهر 50000 منها 35000 مهر و 15000 شبكة طبعا انا استغربت ازاى هو بيحدد الشبكة اصلا لأنه مش من حقه. الشبكة دى العريس والعروسة بس اللى بيحددوها سوا وكمان دى هدية العريس يعنى اللى عاوزة يجيبة انما مش من حق اهلها يحددوا مبلغ الشبكة تانى نقطة ازاى هو قبل ما يقعد مع ابويا يقول انا عاوز كذا ولا كذا الحاجات دى بتيجى فى القاعده فى الاتفاق و بالتراضى مع بعض انما مش قبل الاتفاق عمال يتشرط ودا كمان كان رأى ابويا. بالاضافة انهم كانوا عاوزين اكتب قايمة وقولتلهم معندناش حاجة اسمها قايمة ودى مش فى عرفنا اصلا والقايمة دى مش بنحبها لانها تعتبر عدم ثقة بالاضافة ان لسة مفيش شقة اصلا عشان اكتب قايمة يعنى حتى لو فى عرفنا بنكتب قايمة فملهاش لازمة لان مفيش شقة و القايمة بتتكتب على العفش. ففوجئت انهم بيقولوا لو مش هكتب قايمة يبقى اقدر تمن العفش واديلهم ثمنة . بالزمة دا كلام؟ طبعا كلام مش داخل العقل واصرارهم يدل على ان همهم الفلوس.
المهم ابويا راح و زارهم و اتكلموا فى المهر وطلبوا من ابويا شيك ب 50000 عشان يقولوا للناس انى دفعت مهر اهو ب 50000 فأبويا قالهم معيش شيكات فراحوا قالولوا اكتب لنا ورقة ب 50000 عشان الناس يعنى وكدا وهنقطعها بعد كدا فأبويا استغرب من طلباتهم دى ورفض الكلام دا وطالما مفيش ثقة من الاول ابويا قالهم اكتبلكم ورقة ومش همشى الا لما الم الورق بعد ما تقطعوه (ما هو دى الرد المناسب لان دى طلبات ناس معندهاش ثقة وهمهم الفلوس والمنظرة والفشخرة قدام الناس فطبيعى ابويا يرد عليهم كدا لما حس بماديتهم) بس فى النهاية ابويا قال ان المهر بيتجاب بيه عفش ولان مفيش شقة لسه بالتالى مفيش عفش واقترح ان بدل المهر نستفاد بفلوسه و نجيب شقة هتبقى فى مصلحتنا و ابوها اقتنع بكدا و وافقوا على الاتفاق دا. ولما ابويا سأل ابوها و قاله ” طب والمؤخر ” فراح ابوها قاله خلاص خلاص وسكتوا. فمعنى كدا ان مفيش مؤخر ودا اللى اى واحد يفهمه لانهم طوال القعده مطلبوش مؤخر ولما ابوها فتح موضوع المؤخر مطلبوش حاجة. بس ابوها اتشرط انى انزل اكتب كتاب ومفيش دخله و لما اسافر و تحصلنى ابقى ادخل ساعتها فأبويا وافق واتفقوا انهم يعملوا فرح كمان وابويا قالهم فى شركة بتعمل شقق قريبة منهم قالولة اه دى ربع ساعه بالسيارة و الشركة مقرها تحت البيت و انا كنت بفكر احجز شقة جنبهم عشان تبقى هى جنب اهلها و ابقى مطمن عليها. وانا فعلا فى الفترة دى كنت بقول لأبويا يدور على شقق يعرف اسعار شقق تكون قريبة من اهلها خصوصا وانى فى مدينة تانية غير المدينة اللى هى عايشة فيها.
واول ما خلصوا الاتفاق وابويا نزل من عندهم لقيتها بتتصل بيا وبتقولى ان اخوها عاوز يكلمنى و ابوها كمان عاوز يكلمنى. وانا كنت لسه معرفش هما اتفقوا على اية فأستغربت فسألتها عاوزين يكلمونى لية؟ ما ابويا كان لسه عندهم من دقايق فقالت لى معرفش عاوزين يكلموك و خلاص. فأنا مطمنتش وقولت ممكن مقدروش على ابويا وقالوا نلف على ابنه خصوصا وان ابويا كان لسه ماشى من عندهم وتحت بيتهم . فأتحججت ان النت بطئ واكلمهم فى وقت تانى. وتانى يوم اتصلت بأبويا و اسأله على الاتفاق وقالى كل حاجة زى ما ذكرتها وقالى هما عاوزين يكلموك فى اية ما انا كنت لسه قاعد معاهم قولتله معرفش. فقالى عموما مفيش مؤخر لانهم مطلبوش لما سألتهم و اتفقت مع ابويا اننا هنكتب مؤخر 25000 جنية.
وفعلا بعدها بتكلم معاها عرفت انهم كانوا عاوزين يتصلوا بيا و يكلمونى فى المؤخر و لما واجهتها باللى اتقال فى الاتفاق وانهم مطلبوش مؤخر لما بابا سألهم حلفتلى انه محصلش وان اهلها نسوا يتكلموا فى المؤخر . فأمها طلبت تكلمنى وانا مكنتش عاوز ارد عليها عشان الاتفاقات دى بتكون بين الرجاله و محبش ستات تتدخل فيها وفى النهاية وافقت اكلمها اشوفها عاوزة اية ففوجئت انها بتكلمنى على المؤخر فسألتها هل بابا فتح موضوع المؤخر؟ قالتلى اه ومتكلموش و سكتوا قولتلها طيب مطلبتوش ليه و دى قعده اتفاق اصلا يعنى يتفقوا على كل حاجة قالتلى ان ابويا كان متنرفز فكلامها الصلاحة مدخلش دماغى ولما سالتها طب ليه متصلتوش بأبويا وتتفقوا معاه على المؤخر ولية بتكلمونى انا اللى برا البلد فلقيتها بتتهرب فى الكلام وفى النهاية قولتلها انا هكتب مؤخر عموما ولما سألتنى كام قولتلها 25000 قالتلى لا مينفعش دا شوية قولتلها شوية ازاى قالتلى اه دا شوية و ان ابوها كان عاوز اكتر من كدا بكتير و انها حاولت معاه لغاية ما نزلته ل 100000 جنية قولتلهم نعم؟ قالتلى اه 100000 عشان اعمامها وخلانها انت تكتب كدا وقالتلى ان دا مجرد حبر على ورق بس فقولتلها وانا مالى بأعمامها وخلانها انا هتجوزها هى ولا هتجوزهم هم؟ فمرضتش اقولها رأيى ساعتها و قولتلها افكر. وبنتها كمان كلمتنى وتقولى انت تجيبلى شبكة ب 20000 دى اقل حاجة فى عيلتنا واقل واحدة بيجيلها شبكة بالمبلغ دا. قولتلها بردو انا مليش دعوة وبطلى تبصى لغيرك. الشبكة دى هدية من العريس وبتبقى فى وشة فأنا اجيب اللى اجيبة.
وتانى يوم قررت و رفضت مبلغ المؤخر اللى بتقول عليه امها و كمان معترض ان امها هى اللى بتكلمنى و تقولى كدا مش حتى ابوها يكلمنى راجل لراجل وحسيت انهم يهمهم المنظرة قدام الناس وطلعوا ماديين جدا ومصممين على المبلغ دا. و انا مصمم على 25000 وقولتلها ان المؤخر بيتدفع على مقدرة العريس مش العروسة لانه دين عليا بتاخده منى اما فى حالة الطلاق او بعد موتى وكمان حسيت ان اهلها بيتعاملوا على ان بنتهم سلعة بتتباع كل همهم وكل كلامهم الناس حتى هى البنت بتقولى ان اعمامها و خلانها فى كتب الكتاب هيشوفوا انا بكتب كام فلازم اكتب 100000 قدامهم .
والموضوع دلوقتى اتفركش لان اهلها فاكرين انهم هيضغطوا عليا يا اما اوافق ب 100000 يا اما مفيش جواز فقولتلهم اما يقبلوا بكلامى يا اما مفيش جواز وانا مش من النوع اللى بيطاطى راسه ويركبوه . فرجعوا قالوا خلاص متكتبش 100000 بس مفيش جواز الا لما تجيب شقة و تدفع مهر فقولتلهم انا متفقش على جواز السنة دى و انتوا موافقين و انا كل اللى حوشتة ميجيبش شقة و اوضبها و افرشها وادفع مهر واعمل فرح و اجيب شبكة فلوسى متكفيش اعمل كل دا من راتبى فى سنة واحدة بس فقالوا مش مهم لما تجيب شقة و تدفع مهر اتجوز وانا مينفعش استنى لان عمرى كبر وخصوصا كمان ان عمر بنتهم كبر و لو اتأخرت اكتر من كدا ممكن متخلفش بس اهلها مش مهم عندهم كل الكلام دا واللى يهمهم الفلوس والمنظرة قدام الناس.
بس حسيت ان ربنا فعلا نجدنى من الناس الماديين دى خصوصا وان الموضوع اتفركش يوم الخميس وتانى يوم فى صلاة الجمعة لقيت الامام بيتكلم عن الجواز والمهور العالية وكان بيقول يسروا ولا تعسروا وبلاش تطلبوا مهر او مؤخر عالى فى غير مقدرة الشباب وان الانسان ينكح ذات الدين ولما ذكرت لواحدة اعرفها قالتلى ان دى علامة من ربنا.
عاوز اسمع رأيكم بما يرضى الله

مشاكل وحلول ذات صلة

• استخرت الله بحبيبتي وحصلت بعض العقبات
• اهلي رافضين ارتباطي بحبيبتي لاني عرفتها من النت
• اتفقنا على الزواج لكن حبنا بيقل
• احببته ولكن عاداتى وتقاليدى ضد استمرار علاقتنا
• ادوس على قلبى وانسى ولا اكمل
• ممكن البنت تحب بجد في السن ده
• حبيته وهو مصمم يكدب عليا