انا شاب عندي 22 سنة مشكلتي والدي متوفي من يوم ما اتولدت ليا 3 اخوات غيري لما والدي اتوفى كان أكبرهم عنده خمس سنين كنا عايشيين الحمد لله لما بدأت أكبر وأفهم لقيت الناس اللي حواليا بتعاملني أقل من ولاد عمي ومن كل الأطفال كان عندي احساس ان الواحد عشان يتيم الناس مبتحترموش وكان في مواقف كتير بتحصل في المدرسة كان الاهتمام بيا قليل مع اني كنت نابغة وكان الاطفال كلهم بيكرموا عشان والدهم اللي والدة تاجر واللي مدير بنك والدي كان مقاول الله يرحمه وكان مهتم بأهله جداً لدرجة انه بنى لكل أخ من اخواته بيت وجوزهم ولما اتوفى كله بعد عننا وملقيتش الا جدي من أمي الله يرحمه كنا كل حياته أنا واخواتي وكان مهتم بينا جداً وكنت حاسه أبويا وكانوا اخوالي بحبونا قوي جدي اتوفي وأنا في أولى اعدادي حسيت اني يتيم بجد واخوالي بدأوا يتجوزا واهتمامهم بينا انعدم وبالعكس بدأوا يستغلونا أنا واخواتي اللي فتح شركة واللي فتح سوبر ماركت كبير وكله كان بيريح نفسه علينا اختي الكبيرة دخلت كلية تجارة وأخويا اللي بعدها دخل تجارة هو كمان وأنا اللي عليا الدور في الثانوية ربنا مكرمنيش وملحقتش الا معهد تعاون في القاهرة طبعاً عرضت عليهم الموضوع اخوالي ثاروا عليا وازاي ومفيش فلوس وهتبهدل أهلك معاك اخواتك ووالدتك معاك في المصاريف كانوا خايفيين لا أطلب منهم فلوس سبت خالي اللي كنت شغال معاه واشتغلت فترة الصيف وجبت فلوس المعهد ومصاريفي كمان صمموا برده اني مدخلوش وكانوا عاوزيين يدخلوني معهد أي حاجة قريبة من المنصورة عشان ما اتغربش ومصاريف مشوا اللي في دماغهم عليا ودخلت خدمة بورسعيد سقطت نفسي في أول سنة وكذلك في تاني سنة والدتي بدأت تحس بيا وبالذنب وجالها احساس ان اخواتها ظلموني بس أنا مكنتش عاطيلها فرصة انها تتكلم معايا كان معاها فلوس اعطيتني 5000 جنيه وقالتلي شوف المعهد اللي عاوز تدخله وخلي الباقي مصاريفك بس أنا كنت خلاص مليت وحسيت ان المستقبل ضاع ومرضيتش أخدهم وبدأت مرحلة الانعزال التام عن أهلي وبقيت أخرج بالـ 4 شهور ما أرجعش البيت أشتغل على مراكب سياحية وأشتغل في مطاعم في شرم الشيخ وبدأت أمسك فلوس وأعطي لوالدتي فلوس والأمر تعب اخواتي وأمي لاني كنت بغيب عنهم كتير وكنت لسه صغير بس مكنتش بطيق أدخل بلدنا وبصراحة أنا كنت عشت حياة الرحالة خلال سنتين لفيت مصر كلها من وبقيت أطلع رحلات سفاري في الصحراء وعلى يخوت عشت الحياة اللي أي شاب يتمناها في الدنيا وعملت كل حاجة الا السجاير والمخدرات والجنس والحمد لله أخويا اللي أكبر من كان ربنا كرمه وسافر السعودية واشتغل شغلانة كويسة وبعتلي فيزا وانا كنت رافض أسافر وفضلوا يضغطوا عليا ييجي 3 شهور لغاية ما اقتنعت وسافرت وطبعاً رايح على صحاب واخوالي كانوا هناك واعمامي رحت السعودية ورفضت ان اخويا يجيبلي شغل وقررت اني أتعب نفسي شوية عشان ما أرهقوش بمشاكلي وسبت البلد اللي هو فيها ورحت الرياض وكان ليا قرايب كتير فيها ومنهم اخوالي واعمامي وبعد اسبوع اكتشفت ان الكل بيهرب مني مش عاوز يشيل مسئوليتي ولقيت عزومات للكل وأنا لا وخروجات والكل متجاهلني ريحت قلبي وبعدت عنهم وربنا كرمني بشغلانة في أكبر بنك هناك وفي الادارة العامة بتاعته كمان مع العلم اني ما أخدتش كلية وربنا كرمني آخر كرم واشتريت سيارة ووضعي بقى أحسن من وضع اللي بقالهم عشر سنين في السعودية بدأ الكل يتقربلي بصورة غريبة وكل اسبوع عزومات ويفوتوا عليا في سكني اتصالات غريبة وناس تتصل عليا من مصر اخوالي يتصلوا بيا كتير ده بعد سنة ونص في السعودية مكنش حد بيقلي سلام عليكم بنت عم أمي تتصل عليا وبناتها يتصلوا عليا علطول والبنات بدأوا يتقربوا مني وحاجة لا تطاق لو واحد غيري ميعرفهمش هيقول دول بيحبوه بس أنا عارفهم كويس وانا شايف نفسي بعد كرم ربنا اللي أنا فيه مش كبير يعني بس هما شايفيني كبير قوي كاره تصرفاتهم معايا وبقول صلة الرحم بس كل واحد منهم عاوز مصلحة اللي عاوزني أشفله شغلانة واللي عاوزني أشغل نسيبه واللي طالب مني فلوس واللي عاوز تجوزني واحدة من بناتها وكل أما أقعد مع نفسي أحس اني اتظلمت كتير قوي من ناس كتير وأفضل ابكي ونفس الناس دول هما اللي بيحاولوا يستغلوني دلوقتي على فكرة أنا مش معقد بالعكس والله أنا مرح جداً مع كل الناس بس حساس جداً والناس اللي كانوا تاعبني بتجاهلهم وعدم الاهتمام والظلم في التعليم هما الناس اللي بينافقوا دلوقتي واللي مش عارف اتصرف معاهم لأن الناس كلها شايفة ان هما كويسيين بس انا عارفهم كويس
مشاكل الشباب النفسية
احساسي بالظلم هيقتلني وكل ما افتكر أبكي
اضيف بتاريخ: Saturday, November 27th, 2010 في 17:41
كلمات مشاكل وحلول: اخوات, ام, خال, مشاكل الشباب, مشاكل نفسية, يتيم
ابعد عنهم و الله مش لوحدك اللي مظلوم اللي زيك مظلوم انا برده زيك مرحة و بهزر و كل حاجة بس احزاني لما بتيجي عليا بنهار من العياط و الله انا مش عارفة اقولك ايه بس ربنا يكرمك و يبعتلك ولاد الحلال في كل حته ان شاء الله معنديش غير كده عشان اقولهولك و ربنا معاك و يعينك ان شاء الله
حسبي الله ونعم الوكيل
والله انت راااجل وربنا كرمك علشان طيب
ابعد عن الناس دى ميستاهلوش مساعدتك
ونصيحة منى ليك اللى كسرك وانت صغير
ونزلك تحت رجلية مترفعهوش وانت كبير
وتحطة فوق راسك..
واتجوز واحدة بتحبك ومش طمعانة فيك
واقهرهم كلهم
شكراً لكل اللي اهتموا وردوا وانا قريت كل الردود وبإذن الله أحاول إني أستفيد منها وبالنسبة للأخ خالد عبد الراضي أنا حالياً سبت شغلي في البنك وربنا كرمني واشتغلت في هيئة الهلال الأحمر السعودي ولو عاوز تساعدني بجد أنا بنزل مصر في الصيف بإذن الله وعاوز أدخل في كورسات لغة وثري دي ماكس وأوتوكاد لو حد يقدر يساعدني يبقى مشكور بجد أي حد عنده فكره عن الكورسات دي مكانها فين وقيمتها كام ومدتها قد إيه يبقى كثر خيركوا جميعاً ولو معندوش يبقى برده كثر ألف خيركوا.
اجمل حاجه فيك انك عارفهم كوبس على فكره انت رائع بجد ورجل تتحمل اى مسئوليه وتشرف اى حد يا ابنى
بس انا زعلان منك لازم تاخذ شهاده عاليه وتفرسهم انت لسه صغير وفرصه الان لا تكسل
ما تزعلش دى طبيعة ناس كتير ليس لديهم ادب ولا احساس ولا يعرفوك الا لمصلحه .. تاكد انهم سقطو من نظرك ونظرنا جميعا
هى بس علشان صلة الرحم .. وحذارى ان يضحكون عليك وياخذو منك مبالغ صغيره او كبيره لا تكن مغفل
انت الان كبير فى نظر جميع من فى الموقع لرجولتك وتحملك للمسئوليه وبرك بامك الست المحترمه التى تشعر بك وتقف معك
وللاسف كبير فى نظر اهلك بسبب مالك هم عباد الفلوس يزلون نفسهم علشان قرشك خليهم يتزلو شويه يا ابنى تعبوك واهملوك وكنت فى امس الحاجه لهم
لا تثق فيهم الا من رحم ربى وكان جدير باحترامك لا تفقد ثقتك بنفسك ابدا وعفا الله عما سلف منهم
وكل واحد فيهم هياخد على قدر نيته ادعيلهم بالهدايه
ولما تتزوج بنت الحلال التى تقدر اخلاقك ابق طمنا
بس لا تنسى ان تزيد فى علمك مع العمل لتعوض لذاتك ما فات والله الموفق
السلام عليكم
اخي الكريم ربنا يصلح حالنا وحالك وانشاء الله دائما الى الامام
معلش مهما كان هم اهلك وربنا وسيدنا النبي وصى على صلة الرحم لا فيها سعة للرزق وانت في غربه وسامح يا اخي المسامح كريم والاجر والثواب عند الله اامنك امنه الفاتحه بالستر وصلاح الحال عند الحبيب المصطفى شفت انا بكتبلك علشان مصلحي ابقى قول عليا زي الناس التعرفك علشان مصلحتها
والله ولي التوفيق
الله عليك بجد مفيش كلام اقدر اقولهولك يوفيك غير اني ادعيلك بمزيد من التقدم وتحقيق كل ما تتمناه
الله يوفقك انتا بار بوالديك اكيد اخوانك فخورين فيك وامك كمان والله لو كان ابوك حي لكان فخور وفرحان فيك الله يعطيك العافيه
ربنا يسعدك ويوفقك يارب في حياتك ويكرمك انا عارفه ان الظلم حاجه صعبه جدا وانا برده حسيت بيه كتير لكن احنا برده قلوبنا اطيب واكتر بكتير من الظلم يعني ممكن تسامحهم وربنا ال هيجازي اي حد اسأء معاملتك انت اتعامل معاهم عادي عامل الناس زي مابيعملوك الوحش عاملوه باقل معامله ممكن تقدر عليها والكويس معاك حتي لو نفاق عامله برده كويس واكتر كمان وربنا ال هيجازيك في الدنيا والاخرة وربنا معاك ويصلح حالك ……………..
الله معاك يااخي ويقويك على ظلم الدنيا والناس بس يابخت من بات مظلوم ولا ظالم كل واحد انظلم بطريقه ثانيه كلنا انظلمنا ومن اقرب الناس انا من اخواني وصبرت وهم الان لايتكلمون معي مش كلهم وايام واشهر وانا ابكي وبعدين صبرت حالي وانت كمان اصبر وصله الرحم اهم شي الحلو في الموضوع انك عارفهم لا تتزوج منهم حتى لا تنصدم اكثر منهم والله معك
اخى فى اللة السلام عليكم اقسم باللة ان قلبى كان يكاد يقطلع وعينى مازالت تبكى وانا اكتب اليك انت انسان محترم بجد يابخت اخواتك بيك انا مش هقولك حل.. الناس اللى هنا جزاهم اللة عنك خير الجزاء قالة بما يريح بالك لاكن انت شخص اكرم عند اللة من ناس كتير ناس كل حياتهم ظلم وبس واكتر مااثر فيا موقف ولدتك معاك وهى بتدى لك الفلوس تعرف اخىااااااااااااااة لو تعرف كم هيا كانت فى احتياجهم حاول ترضيها بوس رجليها وديها تحج اعمل لها اى حاجة واقسم باللة دا كلة بسبب دعوة زاحدة منها وانا بجد اتمنى اننا نكون اخوات وربنا يعلم انا اد اية مشتاق للحديث معك وربنا يوفقك ويهدى جميع المسلمين ويرقق قلب اعمامنا واخوالناعلينا وينصر كل مظلوم وكل انسان يشهد ان لاالة الا اللة وان محمد رسول اللة ويهدى كل ظالم انة ولى ذالك والقادر علية.
اخى الكريم بجد ربنا يجزيك خير على اللى انت استحملتة دة من اقاربك والحمدلله ربنا مش بيضيع حق مجتهد وانت اجتهدت والحمدلله ربنا كرمك من وسعة انت لو حد عايزك فى خدمة انت على قدر انك تعملها فاعملها ودى قاعدة اتمنى انك تتبعها طول حياتك انك تعامل الناس فى ربنا كانه سبحانه وتعالى هو الشخص اعمل كل شئ لله وباذن الله اجرك موجود عندالله والله لايضيع اجر احد مثلك
اولا انت ابن حلال وعشان انت ابن حلال ربنا كرمك وحاول تنسى وتتعامل تانى مع قريبك وافتكر صلة الرحم عشان ربنا يديك كمان وكمان ويحميك من العين انت راجل كويس وعشان انت بتفتكر دة يدل على انك راجل راجل اخوك فى الله حسام عبدالغنى *****
على فكرة يمكن انت شوفت ظلم في حياتك واتبهدلت زي ما قولت وعملت كل حاجة وبعدت عن الحاجات الحرام السجاير والمخدرات والستات وعلشان كل دة في الأخر ربنا كرمك ووقفلك اولاد الحلال واشتغلت شغلانة كويسة انا كمان وتقريباً حكايتي نفس حكايتك بالظبط وتقريباً هي هي وكأنك كاتب الكلام دة بأيدي أنا بس الفارق انك في السعودية وانا في الكويت ههههه المهم اعمل زي أنا وأبعد عن اي حاجة تضايقك وكبر ونفض لكل اللي بيحاولوا يستغلوك واعمل زي انا واصنع علاقات تانية جديدة مع ناس كويسة ومحترمة اصدقاء بجد مش بيعرفوك علشان فلوسك او علشان وضعك وتقرب الي الله لأنة هو السبب في كل نجاحك دلوقتي تقبل تخياتي وربنا يوفقك
“هى ديه الدنيا” وكأنك بتحكى فيلم بنشوفه كل يوم “معاك قرش تسوى قرش …” انا معاك انك اتعرضت للظلم وظروفك كانت صعبه بس ربنا كريم ما بينساش حد وزى ما ربنا افتكرك واكرمك انت كمان لما تيجى تتعامل عامل الناس مهما كانو لوجه الله وحاول تمحى الزكريات السوده اللى عندك وبص لقدام جايز لو كنت دخلت احلى كليه ماكنش هتكون نص اللى انت عليه دلواتى يعنى ربنا بيراضيك وفى الاخر مفيش اى حد من اللى حواليك يقدر يجبرك على حاجه انت مش مقتنع بيها وخليك انت احسن منهم وجزاءك وجزاءهم عند ربنا وربنا يهديك للصواب.
انت لك حق تزعل وتتضايق لكن اعلم ان الذي وفقك هو الله ومن ترك شيئا لله عوضه الله خيرا منه فلوتقدر تساعد اي حد ساعده مش عشانه هو ولكن ساعده لله ابتغي الاجر والثواب من الله ولتكن هذه نيتك واعلم انك لو فعلت هذا سيوذيدك الله من فضله اما المقاطعه والممانعه فلن تصنع شيئا الا العدوات والطغائن والمشاحنه فلا تصنع عكس ما كنت تتمناه ان يصنع معاك من قبل وربنا يوفقك الي ما يحبه ويرضاه
بص انا مش عارفة اقولك اية
بس انا حاسة زيك بالظلم دة والنفاق اللى بقى الايام دى فى الناس انا بردة اعتبر زيك
انا محدش بيفتكرنى الا لما حد يكون عايز منى حاجة
انت بقى متشغلش نفسك باى حد منهم بس بردة تقضى واجباتك من صلة الارحام انما جواز وكدة لا
انت اختار واحد بنت حلال ترتحلها وتحبها وهى تحبك وصدقنى هتنسى كل اللى فات من حياتك بس بجد تلاقى واحده تحبك انت لنفسك ربنا يفرج كربنا جميعا وكرب المسلمين اجمعين خلى بالك من نفسك وانت شكلك طيب وتستاهل كل خير
السلام عليكم
بجد حضرتك شاب في قمة الاخلاق والا دب والتدين
وتاكد ان ربنا هيكرمك علي نبل اخلاقك
وبجد حضرتك الطيبة دي مبقتش موجودة في الزمن دي
واياريت حضرتك تهون علي نفسك شوية
انت شاب ولسة صغير وقدامك الحياة كل اللي عليك انك تعاملهم بالحسنة علي قد ماتقدروان شاء الله هيبقي ليك ثواب كبير اوي عند ربنا
وبص لمستقبلك تزوج وانجب اطفال وكون اسرة عشان متبقاش وحيد
ربنا يكرمك يارب
ويوفقك
انا مش هقعد اوعظك واخطب وكدة انا هقللك الى عندى بكل بساطة
واحد قال رسول الله صلى الله عليه وسلم لا يلدغ المؤمن من جحر مرتين ومتهيالى انتا اتلدغت واتعلمت .
انا مش بقللك اقطع صلت بيهم حاش لله صل رحمك بس ولو فى حاجة فى ايدك ممكن تعملها لحد منهم اعملها خليك انتا الاكرم والافضل ولكن فى حدود
وكن دائما على حرص شديد منهم
واخر كلامى كل الى انا عايز اقوله انا والدك رحمه الله ده راجل طيب اوى اوى وكان بيخاف ربنا وبيعمل خير مع ناس كتير عارف ليه علشان الى انتو فيه النهاردة بسببه مش انا الى بقول ده الله تبارك وتعالى يقول :
وليخشى الذين اذا تركو من خلفهم ذرية ضعاف خافوا عليهم فليتقوا الله
ووالدك كان بيتقى الله وادى النتيجة .
اشترى منى واسمع كلامى وكن زى والدك مع الاحتراس دائما
وربنا يوفقك يارب لما فيه الخير