مشكلتي أني مش عارف أتأقلم مع الناس .. في كل مكان بروح فيه بحس أني مغترب عن الناس و عن الواقع , كنت دايماً و أنا صغير بفضل أقعد مع نفسي .. كنت بفضل أني أرسم ..أشخبط بقلم ع الحيطة ..أقر في كتاب .. أعمل تجربة من تجارب المدرسة ..كنت دايماً وحيد حتي لو مع أقرايبي أو أصحابي كنت بحس أني بعيد عنهم و مش عارف أفهمهم , كنت بعوض وحدتي بأني أقرا كتب من أي نوع حتي لو كانت مش مناسبة لسني .. لدرجة أني مبقتش تقريباً بشوف حد من صحابي .. هم اعتبروني مغرور أو بحاول أتكبر عليهم بس أنا مكنتش عارف أتواصل معاهم , مكنتش شايف أني عارف أفهمهم , كنت في عالم تاني , بقيت ببعد كل يوم عن الناس .. في مرة كسبت في مسابقة للعلوم كتاب عن العالم “ألبرت إينشتاين” و من ساعتها و أنا بقيت مهوس بنظريته و بأفكاره عن الزمن و النسبية و الطاقة , حبيت شخصيته و إنجازاته .. بقيت مش بحب أشوف أصحاب زمان , و حتي قرايبي مبقتش أحب أشوفهم زي الأول كل اللي عايزه أني أفضل لوحدي .. أكتب شوية .. و أقرا شوية .. كانت كل حياتي مركزة علي جانب واحد , بقت كل أفكاري و إهتماماتي مختلفة مع اللي حوليه , لما أجي أتكلم مع حد مبقاش عارف أتكلم في أية .. أبقي مش لاقي موضوع نتكلم فيه .. لغاية أم لقيت نفسي منعزل عن كل شئ .. والدي و والدتي ماحولوش مرة أنهم يحلوا مشكلة أغترابي عن الواقع .. كانوا دايماً شايفين أن دي حاجة كويسة أني أفضل شاطر و هادي و مبكلمش حد , بس دلوقتي أنا عرفت قد أيه أنا كنت غلطان ..دلوقتي حاسس أني لوحدي ..حاسس بإغتراب حتي لما دخلت الكلية ماحبتش أني أفضل موجود في البيت اللي أنا فيه مع والدي و والدتي كان عندنا شقة فاضية مش بنقعد فيها غير في الصيف قريبة من الكلية قررت أني أقعد فيها و أبقي قريب من الكلية .. و أبقي أزرهم كل أسبوع .. كنت شايف أن دي فرصة كويسة أني أبقي متفرغ لحياة جديدة و أقدر أنجز في دراستي بس اللي حصل أني بقيت حاسس بالوحدة أكتر .. مبقتش منتظم في الدراسة .. بقيت محبط و مش عارف أعمل أية ..حسيت أني لوحدي ..فكرت في أي حد يساعدني من قرايبي ..جيراني ..ملقتش أن أعرف حد .. كل الناس علاقتي بيهم غاية في السطحية .. أنقطعت عن الدراسة .. بقيت بشتري بالفلوس اللي معايا سجاير .. بقيت عاوز أغير من نمط حياتي .. بقيت عايز أنتقم من كل لحظة أنا أصريت أني أعشها بعيد عن الواقع و الحياة والناس في أحلام و أفكار تافهه .. في مرة كنت لسة أخد فلوس من والدي مكنتش عارف أعمل بيها أية .. مفيش دراسة .. مفيش صحاب .. مفيش قرايب ..لأول مرة في حياتي أشتري بيرة .. كانت الفكرة في الأول مرعبه .. بس لقيت نفسي في الآخر مش عارف أعمل أية غير أني أضيع أي فلوس معايا .. حاسس بفشل … محدش بيسأل عني .. حاسس بوحده فظيعه .. كان والدي فاكر أن التربية أنه يجبلي كل حاجه أنا محتاجها ..مرة طلبت منه أني أفتح حساب جديد في بنك , حساب للشباب , طلبت منه أنه يديني فلوس أفتح بيها الحساب عطاني 10000 أنا في البداية أستغربت من المبلغ بي كانت فاكر أني هستغلها صح أخدت الفلوس و معملتش حساب .. بقيت بضيع فلوس ع اي حاجة .. مش حاسس بوجود أي إهتمام من ابويا اللي مسألنيش حتي بعدها أني فتحت الحساب ولا لا ..لغاية ما كنت ماشي في يوم و لقيت محل لبيع الخمور .. فكرت أني أجرب .. بس ترددت في الأول .. لما ملقتش أي حاجة أعملها رحت المحل .. مكنتش عارف أي نوع .. لدرجة أني مبقتش عارف أقول للبياع أية لما سألني عايز أية .. بصيت حوليه و شورت علي صندوق و قولتله أنا عاوز صندوق .. و من ساعتها و أنا حياتي مدمرة .. حتي الكلية بقيت مش بروح المحاضرات ولا السكاشن و مرت السنة و مدخلتش الإمتحانات و حاسس بفشل أكتر و أكتر , المشكلة أنهم في البيت معندهمش أي رد فعل و كأن الموضوع عادي ..
مشاكل الشباب النفسية
غياب التفاعل الاسرى و تاثير ذلك على الابناء
اضيف بتاريخ: Friday, April 12th, 2013 في 07:55
كلمات مشاكل وحلول: شاب, مشاكل الشباب
