كنت شغال في مكان واتعرفت على بنت كويسة محترمة وبنت حلال بس متكلمناش كتير لاني بعد ما عرفتها بشهرين كنت سبت المكان وروحت مكان تاني بس فضلت على تواصل معاها من خلال الفيس وبقيت كل فترة ادخل اسأل عليها ونتكلم شوية في مواضيع عادية زي الشغل وغيره وانا بحاول اختار الوقت المناسب عشان اصارحها بحبها.. وفي يوم دخلت كالعادة اسأل عليها وقولتلها اني معجب وعايز اتقدملها بس انا اتسرعت وقولتلها اني كنت متجوز وانفصلت من فترة فحسيت انها ارتبكت ومكنتش تتوقع حاجة زي كده المهم انها قالتلي مبتفكرش ف الموضوع ده واننا منعرفش بعضينا اوي وحاولت تهرب مني وتبرر حجج مش مقنعة المهم اني قولتلها خدي وقتك وفكري وسبتها فترة تفكر ورجعت كلمتها تاني فلقيتها بتقوللي نفس الكلام وبتاكدلي اني موضوع جوازي السابق ملهوش علاقة بالرفض وان سبب الرفض هو انها مش مشدودة لي ومفيش مشاعر ناحيتي فقلتلها تديني فرصة تعرفني وتحكم عليا فقلتلي ان صاحبتها كانت بتحب واحد كان ليه ماضي وسابها بعد ما حبته صاحبتها ورجع للحب القديم فحسيت انها عايزة تقولي خايفة اني ارجع لطليقتي المهم موصلتش معاها لحاجة بس ف الاخر قولتلها احنا ف الاخر اصدقاء وانا مش هفقد الامل.. وعدى كذا شهر وانا بحاول انساها بس كل ما اشوف صورتها ع الفيس بحس اني لسه مشدود لها وبيرادوني فكرة اني افاتحها تاني بس ف نفس الوقت كبريائي مانعني لانها رفضتني قبل كده وعايش ف صراع داخلي كل يوم ما بين افاتحها تاني او اني احافظ على كبريائي وكرامتي
شوف يااخي الزواج يكون بالرضا والقبول والبنت صارحتك بالحقيقة انها ماتفكرش في الزواج حاليا بلاش تضغط عليها اكثر او تزل نفسك وكرامتك لها كل شئ قسمة ونصيب والدنيا مليانه بنات احسن منها الف مرة هتلاقي نصيبك مع بنت الحلال اللي تقدر مشاعرك وتصونها وتسعدك العمر كله