بسم الله الرحمن الرحيم
فى البداية انا لقيت موقع مشاكل وحلول ده ولقيت مدى التفاهم اللى فيه بين الناس والاحترام بينهم حبيت اطرح مشكلتى يمكن الاقى ليها حل معاكم .
انا عندى 17 سنة ربما يكون سنى صغير عن التفكير بالحب والانشغال به ولكنى استطيع السيطره على نفسى كاملا فى الدراسة وكبح عواطفى وابعادها عن تهديد مستقبلى ودراستى لذلا فلا خطر للحب على دراستى ومستقبلى واحببت ان اطرح موضوعى لاجد حلا له ليس لاجد نصيحة مثل (انت لسه صغير وسيبك من الحب وركز فى مستفبلك ) .
فى بنت قريبتى من جهة والدتى تبقى بنت عم والدتى ومن صغرنا واحنا متربيين مع بعض ولكن عندما نتحدث مع بعض نتحدث كاصدقاء واتعامل معها بارتياح كبير واحكى لها على كل شئ بحياتى وهى كذلك ايضا ولكن فى الفترة الاخيرة وجدت ان نظراتنا تتلاقى كثيرا وبنبص لبعض كتير فده خلانى احاول انى اجر كلام معاها واحاول انى اوصل لحاجة فحاولت كتير احط بعض الجمل فى كلامى تكون تاثيرها ملفت للانتباه فى الكلام ولكنى بلاقى ردها بيكون بطريقة اقوى منى وبتزنقنى فى اكلام اكبر منه فحاولت اعبر فى الزنقات دى ببعض الكلام عن اعجابى بها ولكنها كانت تصدنى بكل الطرق فحاولت مرارا وتكرارا وكل مرة اقول لنفسى انا لما حشوفها حعترفلها باعجابى بيها ولكنى لما بشوفها واتعامل معاها بلاقى نفسى تلقائيا بتعامل معاها كصداقة واخوة وببقى نسيت كل حاجة عايز اعملها والمشكلة الاكبر انى خايف انى لو قلتلها حاجة ممكن تحصل مشكلة بين امى وعمها ومازاد الطين بله انها فى مرة كانت زعلانة ومتضايقة فلما كنت بكلمها فكانت بترد على قد الكلمة فأمى فهمت الموضوع على انها بتتقل عليا (لانى قايل لامى عن اعجابى بيها ) وطبعا امى قعدت تقولى سيبك منها بكره ربنا يديك الاحسن منها ولا دى اول ولا اخر واحدة حتقابلها وبدات معاملة امى معاها تتحجر معاها شوية بس بطريقة مش ملحوظة اوى علشان عمها (والد البنت) ميلحظش وكنا من حوالى سنتين كانت امى نفسها تجوزهانى لما اكبر بس طبعا دلوقتى الوضع مبقاش سهل زى الاول بس طبعا انا علاقتى بيها مش عارف حتوصل لايه يعنى احنا بنتعامل كاصحاب لكن هى من جواها مش عارف فى ايه وانا معجب بيها بس نظرا للروابط العائلية فصعب انى اقولها فمش عارف اعمل ايه .
