السلام عليكم
انا مطلقة وعمري 30 سنه عشت معظم عمري في دولة عربية واتجوزت واحد مصري في نفس البلد واتطلقت منه بالمحكمة في نفس البلد عندي ولدين لسه صغيرين لما سبت ابوهم كان الولد الكبير عنده شهور وكنت لسه حامل في الثاني كانت الحياة معاه مستحيلة مفيش حاجه ما كنش بيعملها ضرب واهانه حتى وانا حامل بياخد فلوسي اول باول بيمنعني عن اهلي دا غير اني انا وسيرت اهلي كنا ملطشة عيلته كلها الكبير والصغيروهو كان رافض يطلقني مش حب فيا لا بس لانهم عايزين ياخدوا مني كل حاجه اولادي وفلوسي وكل حاجه دايما هو و والدته يقولولي مالكيش حقوق عندنا وحتى اولادي مش عايزينهم يعرفوني او يعرفوا اهلي انا كل دا متعايشه معاه تماما واتعودت عليه بقالي دلوقتي اربع سنين بين المحاكم والاقسام والمشاكل كل ما اقول هو اهو ابتدا يهدا يطلعلي مشاكل من تحت الارض رغم انه اتجوز وخلف بس مش سايبني في حالي يسجل ابنه في مدرسة و مايدفعش المصاريف وبعدين يرجع يقول مش عايزه يدخل غير على ابتداثي انا مش ملزم بقبل كدا و كل شويه خناقات انا عارفه اني اقدر اخد حقي منه بالمحاكم بس انا تعبت ماديا و معنويا من المحامين و المحاكم بضطر احط محامي عشان القضايا كتير و ماقدرش استأذن كل شويه من شغلي دا غير ان المحاكم بتاخد وقت من الاخر كدا هو بقا مستبيع كذا مرة اطلبله الشرطة ما بقاش يبطل غير بيها دا كله كوم و من ناحية تانيه انا مضغوطة من الشغل المرتب تعبان والدنيا بتغلى وهو اللي بيدفعه مابيكفيش حضانه الولد الصغير على طول مزنوقه في الفلوس ايوة اخواتي جنبي و بيحاولوا يساعدوني بس مش دايما لان هما كمان عندهم مسؤلياتهم دا غير اني كنت متجوزاه اصلا غصب عنهم فبحاول اني مااطلبش منهم حاجه دا غير اني معرفش اعيش معتمده على حد والدي عايش في مصر وظروفه عالاد وماما متوفيه
دلوقتي اللي حاصل ان والدي واخواتي كل شويه يزنوا عليا في موضوع الجواز وبيقولولي انتي عايشه خدامه لولاده و ذله نفسي وهو عايش حياته و مبسوط و المفروض اسيبله الاولاد واتجوز وابقا اشوفهم كل اسبوع زي ما هو ما بيعمل
انا اولا رافضه موضوع الجواز دا لكذا سبب انا نفسيا مش عايزه ارتبط باي راجل تاني يمكن من اللي شفته منه دا غير ان اولادي مش حشوفهم تاني لاني عارفه و متأكده انه اول ما حياخد الاولاد حينزلهم مصر و مش حعرف عنهم حاجه ولا حعرف اوصلهم خصوصا انهم لسه صغيرين بس في الوقت نفسه مرة اختي قالتلي انهم ممكن يعيشوا احسن عنده لاني مش دايما بقدر اوفرلهم حتى الاساسيات يعني مثلا السنه دي هما محتاجين هدوم مش قادرة اجيبلهم حاجه دا غير اني من كتر الضغوط اللي عليا بقيت عصبية معاهم جدا وبيصعبوا عليا هما بيروحوا كل اسبوع عند عيله ابوهم وطبعا العكس تماما على طول فسح ولعب انا بحاول على قد ما اقدر ابسطهم بس حتى لو عملت كدا مرة مش دايما يعني من الاخر انا هاريه نفسي و مش قادره نفسيا ولا ماديا اني اريحهم وفي الاخر طبعا حيحبوا عيلة ابوهم عشان ما بيشفوش منهم غير اللعب والفسح ساعات بحس اني انانيه اني مخلياهم عندي بس انا عارفه انهم لو حياخدوهم بس انتقام مني و كمان محدش حيكون حنين عليهم زي امهم انا بحاول اني اشوف شغل احسن بس الموضوع صعب ومقفل دا غير اني خايفه ان بعدين لما الاولاد يكبروا اكيد حيحبوا يروحوا عند ابوهم اكتر من انهم يبقوا عندي انا بجد مش عايزة منهم حاجه بس الفكرة في الوحدة هو انا كدا مش بفكر في بعدين وبضيع عمري زي ما اهلي ما بيقولوا ولا المفروض اني استحمل عشانهم خصوصا ان قرار الجواز والطلاق كان قراري لوحدي
اسفه على الاطالة وشكرا لكل اللي اهتم وقرا مشكلتي
مشاكل المطلقات
مطلقة واهلي يطالبوني بالزواج وترك اطفالي
اضيف بتاريخ: Wednesday, December 30th, 2015 في 07:07
كلمات مشاكل وحلول: الحب, الزواج, الطلاق, حامل, مصر, مطلقة
انا رايى ان اولادك اهم مافيش راجل يستاهل انك ترمى والادك عشانه ويمكن يعاملك اسوء منه ماترميش ولادك للهلاك بايدك يمكن معاكى مابياكلوش كويس والا بيلبسوا كويس بس فى حضنك احسن من مرات اب تجوعهم وتبهدلهم اوعى تقسى على اولادك وارصى بنصببك
(ليس أقدر من الشخص نفسه على حل المشكلة فأنا لا أحل المشكلة جذريا ولكني أضيء لك الأنوار لترى جوانب لن تراها من نفسك )
بسم الله الرحمن الرحيم – قبل بداية مواساتي لك وبحث الأمر
أسألك : ولماذا تم تطليقك من زوجك ؟
لابد أن تعرفي أنك لازلتي صغيرة في السن وحملتي الهم بدري بسبب زواج غير متكافئ نفسيا وأدبيا مع إنسان عديم الإهتمام *أولا : إذا كنتي طلقتي عن طريق المحكمة هل لم يشمل الحكم النفقة للأولاد ؟ قد لايكفي ما تم الحكم به لسد حاجتهم – لكن اليوم لابد أن تعلمي أن صحتك بالدنيا ولو لاسمح الله جرت لك حاجه لاقدر الله محدش هينفعك أولادك هيروحوا لجوزك وخلص الكلام – إنتبهي لصحتك لأنها الحاجة الوحيدة التي قد تتسرب كالماء بين أصابعك ولا تعلمي –
*ثانيا : اتركي الأولاد ينطلقون لزيارة أبيهم ويطالبونه بمزيد من الإنفاق والإهتمام واتركيهم ينطلقون إلى أهل زوجك حتى يحسوا على دمهم ويخففوا عنك حمل وأعباء المعيشة هم أولادك لوحدك وأولادك ملهمش ذنب في الحرمان الذي كتبه عليهم أبوهم وأرى أنك تعيشي في دوامة من الفكر والقلق والضيق النفسي والتشتت الفكري – أنتي لم تظلمي أولادك ولذلك لاتحقني في نفسك الغيظ والفكر أراكي في شكواكي مهمومة ومقهورة ومشتتة –
*ثالثا إذا كان معك شهادة علمية حاولي الإلتحاق بعمل شريف يعينك عل الحياة وتحركي سريعا فالوظائف حاليا مقصورة على من هم تحت الثلاثين من العمر – وإذا كنتي ذات حرفة يدوية نشطي نفسك وشقي طريقا في العمل والانتاج – وإذ لم يكن لديك هذا ولا ذاك
رابعا : هل حاولتي رفع قضية نفقة وماذا تم فيها ؟ مهم جدا أن تقلقي زوجك بنفقة الأولاد حتى يعلم أن الله حق لعله يرتدع ويرعى فلذات كبده –
خامسا : يجب أن يجتمع أهلك ويعينوكي على الزمن ويساعدوكي وليس عيبا هذا فصلة الرحم تطيل العمر وتبارك الرزق – بارك الله رب العزة الجلال عمرك ويكفيكي الله شرالمستخبي ربي يرزقك من حيث لاتعلمين ويرزقك رزقا واسعا طيبا ويحفظك
اختي المطلقة قرات مشكلتك بالكامل وعايز قولك تفكيرك خاطئ مليون مرة مهماكان الاولاد مصيرهم يرجعوا ويروحوا لابوهم وماتقدريش انت ولااي قوة تمنعه من ذلك هم الان صغارفي السن والحضانةتبقى للام حسب الشرع والقانون حتى يصلوا لسن البلوغ عندها من حق ابوهم ان ياخذهم منك ودام انهم لسه في الحضانة معك فالنفقةوالمصاريف ملزومة من والدهم ولازم يعرف الشئ ده ويلتزم به حتى لوتطلب الامرترفع قضية نفقة عليه في المحكمة في بلداللي انتم فيها والمحكمة تجبره دفع النفقة شهريا حسب الشرع والقانون ولايمكن التهاون اوالتساهل في حقوق اولادك ابدا ومسالةانواهلك يريدون ان تتزوجي وتشوفي حالك وتعيشي مثل كل بقية النسوان فمعهم حق ليه ماتتزوج وتعيش حياتك مثل ماهو عايش حياته وممكن تلاقي الزوج الصالح اللي يرضى بوضعك كمطلقة ومعك اولادك ويساعدك على تربيتهم والعناية بهم ويكون احن لهم من ابوهم اللي تخلى عنهم وماسال فيهم نشاءالله ربنابيكرمك بابن الحلال الصالح اللي يستاهلك ويعرف قيمتك وتلاقي معه كل الخيروالسعادةوالهناءوالاستقرار في حياتك القادمة وفقك الله وسترعليك وبارك لك في ولادك واطعمك ثمرتهم في خيروعافية
انا رايي من نفس راى اهلك بالظبط انتى بتضيعى عمرك وانتى لسه صغيره ومش عشان شخص وحش يبقى الكل وحش اكيد هتﻻقى ابن حﻻل يعوضك احسن من اﻻول بس المرة دي يا ريت تحسنى اﻻختيار انتى هتكونى زعﻻنه على اوﻻدك بس هما مع اهل زوجك هيكونوا مرتاحين حتى ماديا وانتى مش هتقدري على تربيتهم وحدك هتشتغلى وﻻ هتربي مش هتقدري على اﻻتنين