بسم الله الرحمن الرحيم
فى الاول انا عاوز اقول اني متابع لموقع مشاكل وحلول ده بقالى سنة ونصف او سنتين كمان
تقريبآ كل المشاكل اللى هنا انا حافظها ولاحظت اثناء الفترة دي
ان قسم الحب بنسبة 99.99% كل المواضيع فيه للبنات
مفيش غير 2 او 3 بالكتير ولاد حاطين مواضيع ومشاكل
عمومآ حبيت النهاردة اعرض مشكلتى على الجميع ومستنى منكم حلول بجد
اولآ بلاش التعليقات اللى بشوفها فى معظم الموضوعات ان الحب حرام !! لأن بحثت كتير اوي عن المعلومة دي ووجدت ان الحب النظيف اللى غرضه شريف عمره مكان حرام
ثانيآ مشكلتى ان من سنة بالظبط كنت قاعد فى درسى عادي جدآ لقيت فتاة بصراحة اجمل منها مشفتش ابدآ دخلت الدرس وكان اول حصة ليها
طبعآ انا كنت احسن واحد فى الدرس
بس فى اليوم ده هي كانت احسن مني بكتير رغم انه اول يوم ليها
بدأت اذاكر واذاكر واستمرت المنافسة بينى وبينها والكل كان بيتحدث عن المنافسة دي
فى الآخر تفوقت عليها شوية بس كنت بحبها جدآ
واحد يقولى والمشكلة ايه
المشكلة اني بقالى سنة بشوفها فى دروس كتير وفى الشارع كمان وواقف عند المرحلة “الصفرية” اللى هي مرحلة المتابعة من بعيد
بتابعها وبس
نفسى اتقدم خطوة على الاقل اعرف اذا كانت بتحبنى ولا لأ !!
هي محترمة جدآ وجميلة جدآ وذكية جدآ وكمان متدينة
وعارف انه صعب اني اعرف حاجة زي كده بس نفسى اعرف
نفسى حد يساعدنى يقولى اعمل ايه عشان اثبت حبى واتأكد من مشاعرها
هي برده كانت فى بعض الدروس بتفضل تبص عليا بال5 دقائق متصلة وانا كنت ببقى باصص فى نواحي اخرى بعيد عنها
بجد يا جدعان نفسى حد يساعدنى بأي حاجة والله احيانآ بحلم اني بتكلم معاها او بكلمها فى التليفون او على النت
وبصحى ببقى فرحااان جدآ وكأن الحلم حقيقة
ولما بشوفها ممكن اقعد بعدها اسبوع فرحان وبتتنطط من الفرحة !
ملحوظة انا وهي 16 سنة
اسف على الاطالة وياريت ميتحذفش الموضوع لأنه ممكن يكون تافه بس بالنسبة لي يعنى الكثير
