هو انا جاهله فعلا ولا وسوسه شيطان

انا بنت عندى 23 سنه خريجه جامعه من اسره كويسه الحمد لله ومترابطه انا مش عارفه ابدا ازاى ممكن تكونوا شايفين مشكلتى هايفه او عاديه بس انا فعلا اكتشفت الموضوع ده
من وانا صغيره كان عندى مشاكل فى الثقه بالنفس اقرب ليا كتير كانوا بيحاولوا يهزوا ثقتى بنفسى وفعلا نجحوا انا كتير باستغرب ازاى انسان كبير وناضج يعمل عقله بعقل طفله صغيره ويحاول يحط من نفسيتها ويحسسها انها ولا حاجه ومع ذلك كان ربنا معايا دايما مع انى كنت طفله بس كنت عارفه ان التجاهل للانسان ده اكبر هزيمه له المهم كبرت ومريت بظروف كتير صعبه وحاجات كتير كنت بحلم بيها وهى اللى عايشه عشان احققها وربنا مقدرش انها تحصل والحمد لله عديت منها
بدات اقوم نفسى اشوف ايه اللى كان غلط فيا وفى شخصيتى واحسنه اشوف انا بعامل بابا وماما ازاى واحسن واحاول ارضيهم باى طريقه والحمد لله نجحت فى كده وهما كمان حاسين بحبى ليهم لانى عارفه ان رضا ربنا عليا بيبدا من رضا الوالدين
علاقتى باخواتى الحمد لله كويسه بحبهم ومش برفض لحد طلب اه طبعا انا بشر واكيد بضايق او بزعل منهم ساعات بس بحاول انى احسن من نفسى دايما
اما موضوع الثقه فدا فضل موجود معايا ساعات كتير اقول انا ليه مش واثقه فى نفسى مظرى ممكن مش عاجبنى بس برجع اقول دى خلقه ربنا وربنا مبيخلقش حاجه وحشه وانا شكلى مش وحش الحمد لله بس انت لما تلاقى الناس بتحاول انا تقلل منك او تهد منك فاكيد دا بياثر عليك
وساعات اقول اللى بيحاول يعمل كده اكيد انسان مريض او بيغير منك والا مكنش حاول انه يضعفك ويهز ثقتك بنفسك
المهم انا دلوقتى خلصت تعليم واخدت قرصات ع قد مااقدر لانى مش عايزه اتقل على بابا فى المصاريف كفايه اخواتى حرام وطبعا مش لاقيه شغل
يعنى وقتى كله يبقى فى البيت انا اعتبر اللى شايه البيت طبعا فى الدراسه لان بحكم ان انا اللى قاعده فى البيت وليا اخت بتشتغل واخوات فى الدراسه انا مش زعلانه من كده انا بحب اريح ماما واساعدها وبفرح بكده
بس المشكله انك اوقات كتير بتحس ان ملكش لزمه فى الدنيا بحس ان الدنيا كلها بتجرى حواليا وانا محلك سر مفيش جديد
كل الناس بتروح وتيجى وتعمل وتسوى وانا لا انا مش من النوع اللى كسول وكده لا انا نشيطه اوى
المشكله ان كل حاجه عايز تعملها لازم بالفلوس اخد قرصات بالفلوس تشتغل لازم وصته
انا بحمد ربنا والحمد لله بس الدنيا بتتغير كل ثانيه بتظهر حاجه جديده الدنيا بتتغير والاحتكاك بالناس مفيد جدا وبيعلم الانسان كتير حاسه ان كل قدراتى بتضيع وانا قاعده فى البيت بدات احس انى فعلا جاهله الجهل مش انى مش متعلمه الجهل ان مفيش ثقافه واسلوب للحوار والكلام
حتى لغه الشباب مع بعضهم اتغيرت بقيت بحس انى غريبه ع المجتمع ده بسمع بقصص وحاجات عمرى ماكنت اتخيل انها تحصل
انا عايزه اغير من حياتى عايزه اعمل حاجه مفيده عايزه يبقالى قيمه فى المجتمع عايزه اكون مواكبه كل جديد فى الدنيا اللى يكلمنى اعرف ارد عليه واقنعه عايزه احتك بالناس واتعامل معاهم واخرج للدنيا بس مش عارفه ابدا منين
هل انا فعلا كده جاهله واحساسى بانى زى مابيقولوا مخى بدا يتخن ؟
طب هى قعدتى فى البيت هتضرنى ولا دا المكان الطبيعى للبنت مع انى بخرج فى اى وقت بس التغير مهم
عايزه اعرف اتكلم واتحاور واعمل حاتجات كتير بس فى نفس الوقت متكنش مكلفه لانى بصراحه بتحرج اطلب من بابا فلوس مش عارفه ليه بس يمكن مقدره الحياه والمعيشه وكده
اسفه ع الاطاله بس انا حبيت اتكلم واعرف راى اللناس ايه فى تفكيرى ده وهو فعلا صح ولا غلط وازاى ممكن ابدا ومنين ؟
شكرا

مشاكل وحلول ذات صلة

• جوزي عايش لنفسه ورفعت عليه قضية خلع
• انا فقيرة بمجتمع غني
• طلبت منه نتجوز اتخانقنا وسابني
• تشتت ذهني، قلة الحظ واكتئاب
• امي بتقطع نصيبي وبتوقف بطريقي
• امي تسبب لي الالم المزمن فكيف اساعد نفسي
• جوايا غل وعايزه اخد حقي منه