السلام عليكم..انا شاب عمرى 23…..مشكلتى …انا عندى 4 اخوات بنات…وانا وحيد….هم والحمد لله ربنا مديهم جمال بنسبه كبيره…وكلهم فى سن المعاكسات والمضايقات والكلام ده…ودايما بعمل مشاكل كتير بسببهم….هم الحمد لله متربيين كويس ولبسهم كويس واخلاق عاليه….. ولكن زى ما انتو عارفين ان فى الزمن ده الشباب مش بيرحم اى واحده……….المشكله اللى انا بكتب عشانها بقى….ان فى شباب كتير جيرانى مثلا او معارف من بعيد او اصدقاء لناس قرايبى….منهم كتير بيحاولو يتقربو منى….ويصاحبونى….وطريقتهم بتبقى غريبه جدااا……بشك طبعا انهم عاوزين كدا عشان بنت من اخواتى دول…مثلا لما يبقى صاحبى اوى وناخد على بعض..طبيعى انه ييجى يزورنى…ومثلا يشوف واحده من اخواتى…….انا مش قادر اعبر بالظبط بس اتمنى تكونو فاهمين قصدى…….بجد الموضوع ده شاغلنى جدا وتاعبنى جدااا…….بخاف على اخواتى جدااا…..ولتانى مره بقول بردو انهم متربيين تربيه عاليه اوى وواثق فيهم الحمد لله….. انا مش هقولكم انى انا متاكد من نوايا الشباب دول انهم فعلا قصدهم كدا…بس بردو شاكك بنسبه 90% انه عشان كدا فعلا وده احتمال كبير وشبه متأكد…………..وعلى فكره انا مش ضعيف ولا حاجه…واقدر كويس جدااا احافظ على اخواتى الحمد لله…….بس انا لو عملت مشاكل مع الشباب دول هيبقى ايه السبب؟؟ هم ما عملوش حاجه؟؟ وفى نفس الوقت ببقى نفسى اكلهم بسنانى…….انا مش عاوز اعرف حد وعاوز ابقى فى حالى والناس فى حالهم…………..واقرب مثل من يومين كدا جانى واحد صاحب ابن خالى….والله ما اعرفه الا شكلا بس مش اكتر…….قالى يا (ونادانى باسمى) وطلب منى حاجه هو عاوزها…عرف انها عندى يعنى من ابن خالى اللى هو صاحبه…..وانا شبه متاكد انه مش محتاجها…وقالى هرجعهالك تانى لحد عندك؟!!!!! كل ده بيخلينى اشك……………………أرجوكم ساعدونى بحل كويس عشان اخلص من كل ده………واسف للاطاله
ماتخليش حد يدخل بيتك مهما كان ومتنساش ان صاحبي وصاحبك علي القهوه واللي انت شايفه مش كويس ابعد عنه وعامله ناشف وبغباء ومن رأيي ان تحكي حكايات بالكذب عنك تظهر فيها قوتك وبلطجتك وانك مش سهل علشان محدش يتجرأ عليك او علي احدي اخواتك للاسف الناس مش محترمه وبتخاف ومابتختشيش
انت عايز تقول ان الشباب دوول عاوزين يستخدموك كسلم يوصلوا بيه للبنات اخواتك وانت عندك حق تفكر كده لأن الناس دلوقتى مبيقربوش من حد الا اذا كان لهم غرض…الخوف من موضوعك ده ليكون حد من اخواتك البنات سمعته مش طيبه وده اللى مخلى الشباب دوول عاوزين يقربوا منك وجايز عاوزين يقربوا منك عشان يناسبوك ويتجوزوا اخواتك لان زى ما انت عارف البنات الجميله مبتقعدش والرجاله بيتخانقوا عليهم…
على كل حال متدخلش حد منهم بيتك الا اللى انت تثق فى اخلاقه ودينه اما لو شبان مش تمام تبقى تديهم الوش البلاستيك وخليك خشن معاهم عشان ميطمعوش فيك ويحسوا انك سهل
شوف يااخي خوفك على اخواتك البنات ده شي طبيعي ومن حقك تخاف عليهم لكن عاوزك تكون واثق تماما في اخلاقهن وتربيتهن وده يعطيهم الشعور بالامان والطمانينة وعمرهم مايفرطوا في الثقة دي ومسالة اصحابك اواقاربك ممكن تجتمع بهم برا البيت مش لازم يجيوك للبيت خلي لقاءاتك معهم تكون خارج البيت في قهوة اوكافتريا اونادي واياك ان تهين احد من اخواتك اوتجرح مشاعرها بكلام او بحاجة كهذة انت كون القدوة والمثل الاعلى لهم في كل اقوالك وافعالك وعاوزك تبطل الشك وتحسن الظن بالاخرين واكثر من شغل اوقات فراغك بطاعة الله عزوجل من اداء الصلاة في وقتها وقراءةالقران والاكثارمن الاستغفار والصلاة على النبي والدعاء لنفسك ولاخواتك بصلاح الحال والستر في هذة الدنيا والخير والسعادة والله يصلح احوالكم ويسترعليكم اجمعين
صلي ع رسول الله .. انت حريص ودا مش عيب اولا متدخلش حد بيتكم سوا اصحابك او قريبك من سنك ف حاجة اسمها شارع كافتريا قهوة خلي مقابلاتك بره وزاكر مع نفسك لو ف دراسة ومترح بيت حد فيهم علشان ميدخلوش بيتك قلهم انا مش بحد اروح لحد ولا حد يجيلي وطلاما اخواتك تمام متجيش عليهم ولا تجرح واحدة بكلمه ولا تلفت انتباهم لحاجة زي دي … انت اكيد عندك وقت فراغ والشيطان متمكن منك صلي دايما ف مواعيد الصلاة وادعي ربنا يستر عليك وعلينا اجمعين