السلام عليكم
اولا بشكر كل القائمين على مقع مشاكل وحلول الجميل اللى ساعد ناس كتير جدا تتجاوز مشاكل جزاكم الله خيرا
أنا طالب بالثانوية العامه
فكرت كتييير جدا قبل ما ابعتلكم مشكلتي لاني مش بقدر اوصف اللي حاسس بيه كويس لكن الحمدلله بدأت دلوقتي اكتب واتمنى مزعجكمش معايا
اول شئ مضايقني اني مش بقدر اتعامل مع المجتمع بالشكل الجيد بكره اروح افراح مياتم أى مكان فيه ناس كتير ولو روحت بروح مع حد وافضل طول الوقت قاعد ساكت ممكن افضل ساعتين ساكت احسن من اني اقوم دقيقه اكلم حد معرفوش
لو مدرس سألني سؤال في الدرس وأنا عارف الاجابه كويس بتلعثم وبعرق وممكن انسى الاجابه
علشان كده انا حياتي تعتبر حياة افتراضيه على النت كل اصحابي على النت معنديش ولا صديق في الحقيقى الآن غير اصحابي اللي في الدروس مش بشوفهم غير وقت الدرس فقط
وكمان بعض الردود للكلام الشعبي العادي بين الناس مثلا لو حد شرب شئ والتاني قاله هنيا…مش بعرف ارد اقول ايه وبقول الله يخليك,لو خلص اكل وقال سفره دايمه مش بعرف وبقعد ساكت او اقول الله يخليك باي موقف زي ده وبعد كده بفكر بالموقف بتكسف اوي من نفسي
مشكلتي التانيه ودي مرتبطه بالاصدقاء….كنا اصدقاء بل اخوات تؤأم معروفين بكده عمري مافكرت حتى في مره اني اخون الصداقه..كان هو صديقي الوحيد قبل ما اعرفه كنت بقضي فتره الاجازه الصيفيه وكمان فتره الدراسه في البيت مش بخرج ابدا غير للدروس يعني اكيد البنات بتخرج اكتر مني بعد ماعرفته عرفت اماكن وطرق اكتر لاني مكنتش اعرف طرق وشوارع خالص وكان معظم وقتنا مع بعض تمشيه طويله تدوم ساعات ومسافات تصل لـ20 كيلومتر متواصل
كان بيتمنى اني كنت اكون اخوه وأنا كذلك
أنا كنت دايما بتصل بيه في آخر ايامنا كنت بتصل بيه وميردش ممكن حتى عشرين مره يوميا واكتر وميردش وانا اقول يمكن نايم مخدتش باله
وكان لما يرد يقولي معلش مخدتش بالي اقوله ولا يهمك وعلى طول كنت بنصحه يذاكر وجيت في يومين متصلتش بيه لانه مكانش معايا رصيد افتكرني بتجاهله راح اتصل بي وانا كنت نايم مردتش اتصل مره واحده فقط بعدين بعتلي رساله قالي فيما معناها قبل ماتشوفني اني فاشل بص لنفسك الاول انت مش مقطع كليات القمة اوي وللعلم انا مستوايا وحش بالدراسه فعلا المهم اتصلت بيه وفهمته اني كنت نايم قالي اوكى بس كده
وتاني يوم كان عاوز يجيلي ياخد شويه اغاني وكنا بنتكلم عالمسنجر قولتله سوري مش هينفع لان بابا لسه مزعقلي علشان المذاكره وانا قاعد من وراه افتكر بقوله كده علشان ميجيش قعد يضحك وقفل وفتح وقالي كنا بنقول ايه قولتله مش فاكر ضحك وقال كلام يوجع جدا من ضمنه انه مش عاوز يعرفني تاني وان حياته بقت اسوء من وقت ماعرفن
رديت عليه قولتله اوكي شكرا يا– سلام ومن وقتها مكلمتوش
انا بصراحه مش عاوز ارجعله تاني حتى لو رجعنا هكون شايل منه جامد غصب عني بجد كمان كان كل خروجتنا وكلامنا مشاكل عنه وكان زي مابيقول المثل من صاحب التعيس يتعس وده كان شئ مضايقني جدا
دلوقتي انا مش بعرف اكون صداقات وفي الكليه شكلي هكون وحيد كمان لاني مش بقدر اتعامل مع اى شخصية لازم يكون حد كويس مش بيشتم خالص وكلامه محترم وحتى لو لاقيت ممكن ميتقبلنيش لسبب ما
مشكلتي الثالثه اني بحس ان والدي ووالدتي خنقني اوي في المصاريف انا باخد مصروف قليل حوالي 150 جنيه شهريا وربعهم طاير في المواصلات والباقي بجيب بيه اى لبس أو حاجات لنفسي محتاجا ودايما بحوشهم واشتري لبس او شئ محتاجه ومعرفش هعمل ايه في حياتي الجامعيه
بالنسبه لاكتر شئ مضايقني اني مش عندي لبس غير قليل جدا حوالي 3 تشيرتات وبنطلونين عامل جدول وبكتب فيه اليوم ولبست فيه ايه علشان مروحش درس معين كذا مره بنفس اللبس
دي مشكله خنقاني ولما بكلمهم يقولولي بدل مابينهم واحمد ربنا ووو اكيد الحمدلله على كل شئ لكن هم باستطاعتهم انهم يجيبولي لبس اكتر بس مش حاسين بي بجد لانهم عندهم لبس كتير وبيجيبوا من اماكن كويسه جدا-المشكله دي تعباني جدا ومش مخلياني امشي وانا واثق من نفسي بالشارع وسطس النس
انا مش عندي لبس بيت غير واحد بس اللي كويس والباقي بلبس اي تيشيرت قديم مع اي بنطلون في البيت
ولو رايح اجيب حاجه من محل جنب بيتنا لازم البس لبس خروج وكوتشي وبرفن ووو ممكن اقعد عشرين دقيقه اظبط نفسي علشان انزل اجيب ازازه بيبسي
اخر مشكله دي تعتبر الاقل تعب لي
بحس اني مش شاب داخل جامعه خلاص لا حاسس اني في اعدادي مع طريقة تعاملي مع الناس ولما اكلم حد بالذات لو بنت بطريقه لا اراديه برفع صوتي مش عارف ليه ومش حاسس اني شاب كبير
بالمختصر حاسس اني لسه عيل
طبعا مشاكل كبيره وطويله اووي انا حاولت اختصر على قد ماقدر لكن لغايه دلوقتي حاسس اني مخرجتش كل اللي جوايا لسه….
شكرا ليكم جدا وآسف لرسالتي الطويله جدا جداا
وهل انا اعاني من مرض نفسي..اذا نعم ما اسمه؟
واتمنى لكم السعاده 🙂
