انا عندي 22 سنه ولد وحيد علي بنتين اكبر مني والدي متوفي واحنا اسره علي قد حالنا
البنتين اتجوزو والحمد لله ومفيش في البيت الا انا ووالدتي . ربنا كرمني وبعد ما كنت بشتغل في محل برفاتات شاركت واحد صحبي وفتحنا محل علي قدنا وكان اكبر محل
في بلدنا . شويه والشيطان لعب في دماغي اني اجيب عربيه . بدأت القصه بعد ما جوزت اختي التانيه وكان باقي عليا فلوس في جوازتها مش كتير . اطريت اني اجيب قرض عشان يعوض المديونيه الي عليا والباقي ارميه في المحل .
شويه واطريت اني اخد من راس المال عشان نسد القرض وبعدها انا متعلمتش خلصت القرض من هنا وحاولت اني اجيب عربيه من هنا بقرض تاني . تراكمت عليا الديون اكتر واكتر . لحد ما دلوقتي خلاص صافينا المحل والعربيه اتباعت . وانا قاعد مش لاقي شغل وعليا ديون باقيه كتير . اطريت اني استلف من هنا وهنا عشان احاول اسد الببان القديمه والدين القديم بس كل الي عملته اني سديت ديون قديمه بديون جديده مع ناس مبترحمش . حاولت اني اقدم في شركه اوبر وكريم عشان اشتغل واهو الدخل بتاعها بيعوض شويه واعرف اسد منه . لاقيت اني لازم اآجر عربيه واروح اشتغل بيها . لاقيت ان العربيه بتاخد لوحدها 7 الاف جنيه في الشهر وانا يا دوب شغلي بيجيب 9 الاف بالعافيه
وحاليا مش عارف اعمل ايه وطبعا رجعت العربيه لاصحابها عشان مراكمش ديون اكتر من كده وحاليا قاعد وبدور علي اي شغل يكون مجزي اعرف اعيش منه انا وامي واسد منه ديوني مش لاقي . ومش عايز ابيع البيت عشان امي متتبهدلش . اطريت اني امشي واهرب في اي حته عشان صحاب الديون دي ميبهدولنيش بس النتيجه اني هربان فكرت اني اشتغل في اي حاجه ممنوعه بس مش عارف فكرت اسرق انهب بس مش جايلي قلب اغضب ربنا .
ودلوقتي صحاب الفلوس رافعين عليا قواضي وبيطردوني ومش عارف اعمل ايه . كل الي بعمله اني بقول يا رب وبستغفر ربنا … والنبي يا رب حلها من عندك
هموم الشباب
عايش مطارد ومش عايز اتسجن
اضيف بتاريخ: Saturday, November 4th, 2017 في 08:00
