مشاكل الشباب مع البنات

بحب بنت و خايف من فرق السن او ارتباطها بغيري

السلام عليكم ورحمة الله وبركاته
أنا شاب مصري مسلم عندي 18 سنة ، وعندي بنت خالي أصغر مني بسنتين بس
هي بتحبني جداً ، وانا حبها ليا خلاني أحبها ، والكلام ده من زماان جداً ( يمكن من وأنا في ابتدائي ) ، بس الحقيقة عمري ما كلمتها خاالص عن أي حاجه ليها صلة بالموضوع ولا هي كلمتني
هي بنت كويسة جداً ومحترمة وشخصيتها حلوة ( من وجهة نظري ) ، وحاسس انها بتبادلني نفس الاحساس برضو ، كنت في الأول بتكسف من مجرد التفكير في الموضوع ، وأنا من أسرة متدينة وهي كمان
البنت مؤدبة جداً وبتحفظ قرآن وهتخلصو قريب ، وطموحة جداً ونفسها تدخل صيدلة وهي شاطرة في الدراسة ، وبتشارك في الجمعيات الخيرية التطوعية زي رسالة وصناع الحياة
وده خلاني أحاول أطور من نفسي علشان أقدر أجاريها وأخلها تحبني أكتر وتثق فيا وفي قدراتي أكتر ، وده الي خلاني أعمل حجات كتييير أوي منها مثلاً اني شديت حيلي جداً في الدراسة وفي الثانوية وجبت الحمد لله 97.8 % ودخلت هندسة عين شمس الحمد لله
وده كمان خلاني أقرب من ربنا أكتر وبقيت بأنتظم في دروس شرعية وأحفظ القرآن
وكمان التحقت بدروس لتعليم تجويد القرآن
و كمان ده دفعني لإني أهتم بصحتي ، ورحت اشتركت في جيم وظبطت نفسي على الآخر ، لأني كنت رفيع ومعصعص قوي وكان طولي حوالي 187 ووزني 58 كيلو وليك انك تتخيل شكلي كان عامل ازاي ، دلوقتي وزني بقى 78 كيلو معظمه عضلات
وكمان بقيت بروح أساعد مع جمعية رسالة في الصيف
أنا عملت حجات كتييير أوي بطور بيها من نفسي علشان أقدر أثبتلها ان انا انسان كويس
أبوها و أبويا دفعة واحده هما الاتنين هندسة الاسكندرية ، وأبوها ( الي هو خالي ) بيحبني جداً
أنا بدأت متكسفش من حبي ليها لأني حسيت انه بيخليني أطور من نفسي للأفضل مش العكس خالص ، وكمان حبها ليا خلاها تطور من نفسها هي كمان
بس في قدامي مشاكل وتحديات كتير :-
1- فرق السن بينا صغير حبتين ، أنا شخصيا مقتنع ان فرق السن بين الراجل ومراته لازم يبقى 4 سنين على الأقل
2- أنا لسة بأدرس ( لسة هبدأ السنادي انشاء الله أولى هندسة ) ، ولسة مش قبل 6 – 7 سنين على ما أتقدم لها
3- خايف حد يتقدم لها خلال السنين القليلة الي جاية

في النهاية بأكد على انها بتحبني جداً جداً من صغرنا وأنا متأكد من كده ، وده خلاني فعلاً بحبها أوي من زمان
أنا كمان كان نفسي أكلم والدي ربنا يحفظهولي او والدتي بس مكسوف جدااااااً ، مع العلم ان والدي طيب وبيعاملنا كويس و كمان والدتي نفس الحكاية
يا ريت حد يساعدني بأي حل يا جماعة ، بس حل الجواز حاليا صعب جداً لأن زي ما قلت هي احنى لسة صغار قوي
وطبعا محدش من الي حوالينا من قرايبنا وأهلنا يعرفو أي حاجه عن الموضوع ( لأن مفيش موضوع علني أصلاً لأن احنى مبنتكلمش خالص عنه ، وكلامنا مع بعض محدود جداً علشان الظروف الاجتماعية والدينية )
أنا فرحان ومتفائل وآمل خير ان شاء الله
وشكراً مقدماً

مشاكل وحلول ذات صلة

اضيف بتاريخ: Saturday, September 7th, 2013 في 11:18

كلمات مشاكل وحلول: , ,

3 رد to “بحب بنت و خايف من فرق السن او ارتباطها بغيري”

  1. نصيحة
    09/09/2013 at 00:15

    متعرفش فرحت ازاى لما قريت كلامك لانى حسيت فيه بصدق جامد بجد ربنا يباركلكم فى حبكم بس يفضل بنفس النقاء دة اوعى تحاول تعمل حاجة تشوه بيها الحب الطاهر دة
    بالنسبة لموضوع السن دة بالعكس انا شيفاة مناسب جدا يعنى انا الفرق بينى وبين جوزى سنة واحدة ومتفاهمين جدا الحمد لله ولما السن بيكون قريب من بعض بيزود نسبة التواصل بينكم فى الحياة
    تانى حاجة بقة انا خريجة هندسة عين شمس وبجد ربنا يعينك لانها مؤرفة بس ناس كتير زمايلنا كانو خاطبين من بدرى يعنى قصدى ممكن على سنة تانية كدة اخطبها رسمى بس دة ميمنعش انك تكلم اهلك من دلوقتى وتخليهم يكلموا اهلها علشان اعصابك تكون مرتاحة ومطمن انها مستنياك
    ربنا يسعدك يارب

    قَـيّـم هذا الحل: Thumb up 3 Thumb down 0

  2. اخصائية اجتماعية
    08/09/2013 at 22:45

    على فكرة فرق السن مش مهم ما هو الرسول عليه الصلاة والسلام اتجوز السيدة خديجة رضى الله عنها وكانت اكبر منه مش شرط خالص اهم حاجة مادام انت بتحبها خد الخطوة وروح قولها انك بتحبها وقولها عشان محدش تانى يدخل فى حياتها وممكن تخطبها اما تبقى هى فى اولى جامعة بس المهم لازم تقولها عشان تعرف هى بتحبك ولا لا عشان متفضلش عايش فى وهم هى بتحبنى ولا لا لازم تصارحها وربنا يوفقك معاها ان شاء الله

    قَـيّـم هذا الحل: Thumb up 4 Thumb down 0

  3. riham mosa(u r soul )
    08/09/2013 at 14:01

    البنت مدام طموحه كده يبقى اكيد مش هتفكر فى الجواز وهى صغيره ..ومدام بتحبك يبقى اكيد بردو مش هتوافق عالجواز من اى حد تانى .بس انت عرف مامتك بمشاعرك دى علشان حتى لو اتقدم للبنت اى شاب مامتك تقول لباباها انها عايزة البنت دى ليك ..وانت مش بردو تستنى 7 سنين كتير اووى فكليتك 5 سنين حاول تخطبها وانت فى اخر سنه او او ما تخلص على طول يعنى كمان 4 او 5 سنين
    وحاول تتقى الله فيها لانك داخل كليه والكليه دى عااالم تانى بمعنى الكلمه وربنا يسعدك يااارب ويوفقك فى حياااتك ويرزقكم الخير يارب

    قَـيّـم هذا الحل: Thumb up 3 Thumb down 0

اترك رداً أو حلاً لهذه المشكلة