مشاكل الثانوية العامة

ادرس الثانوية في مصر ولا السعودية

معلش أنا هتعبكوا معايا شوية بس أرجوكوا استحملوني أنا هكون في تانية ثانوي السنة الجاية وأنا بطلع من الأوائل في مدرستي في مصر. ماما (دكتورة) كان جايلها عقد عمل في السعودية من سنة وسافرت وروحت معاها أنا وبابا على أساس إني أخد الثانوية السعودية بس لما وصلنا اتفاجئنا بوجود امتحانات القدرات (امتحان معتمد على الإختيار من متعدد ونصه في أسئلة رياضية تعتمد على التفكير والمطلوب حل كل سؤال في دقيقة ونصه التاني أسئلة عن معاني كلمات صعبة) والتحصيلي (امتحان في مناهج الرياضيات والفيزياء والكيمياء والأحياء والإنجليزي بالمرحلة الثانوية وبيجي 20% من الأسئلة من أولى و40%من تانية و60%من تالتة) والإمتحانات دي بتمثل 60% من المجموع بينما امتحانات المدرسة بتمثل 40% فقط واحنا قاعدين في مكان متطرف (بينه وبين وسط المدينة 75 كيلو) ومفيش في إلا مدرسة سعودية حكومية (وفي ناس كتير بتروح مدارس خاصة عشان تضمن انها تاخد 100% في امتحانات المدرسة) ولا يوجد أي مدرسين مصريين عشان أخد عندهم درس خصوصي في القدرات والتحصيلي زيما ناس كتير بتعمل وفي نفس الوقت بردو في ناس أعرفهم (وإن كانوا قلة) مش بياخدوا أي دروس ومع ذلك بيجيبوا درجات كويسة جدا ويدخلوا طب بس الإمتحانات دي وخصوصا التحصيلي في أمل إنها تتلغي لإنها كانت أصلا معمولة علشان تنشط سوق الجامعات الخاصة في عهد مبارك بس بردو ممكن متتلغيش ويبقى الحال كما هو عليه بالإضافة إلى ان الدراسة في السعودية بالعربي وأنا في مدرسة تجريبي في مصر يعني الدراسة بالإنجليزي بس أنا كنت كل سنة أفتح كتب الوزارة بتاعة المدراس العربي لمجرد حب الإستطلاع فعارفة شوية حاجات بالعربي يعني ولو فكرت أني ألغي حكاية الثانوية السعودية دي وأروح مصر ماما مش هينفع تنزل معايا لأنها جددت العقد بتاعها تاني ولازم على الأقل تعقد لمدة ست شهور وبعدين تفكر في الإستقالة يعني مش هتنزل قبل شهر11 فبالتالي أنا هأضطر أنزل مع بابا وده معناه أني هبقى مسؤولة عن نفسي لان بابا (اسفة على الكلمة دي) مكبر دماغه أوي وكمان لازم أروح المدرسة وبعدين أرجع البيت عشان ألبس وأنزل تاني عشان الدروس ولما أجي لازم طبعا أقعد أذاكر على الأقل خمس ست ساعات ما أنا في ثانوية عامة بقى فهل هقدر أعمل كل الحاجات دي ده بالإضافة إلى حالة الإنفلات الأمني اللي موجودة في مصر وانعدام وجود الشرطة تقريبا إلا في الشوارع والميادين الرئيسية والحرامية كترت أوي خصوصا أني ساكنة في منطقة هادية وكل يوم والتاني لازم بيت يتسرق أو حد يتقلب أو عربية تتفتح يعني الواحد لما ينزل من بيته ممكن ميرجعش سليم ربنا يستر على الناس كلها طبعا بس أنا بجد تعبت وحاسة إني فاضلي شوية وأتجنن من كتر التفكير أرجوكوا قولولي أعمل إيه

مشاكل وحلول ذات صلة

اضيف بتاريخ: Saturday, April 17th, 2021 في 09:03

كلمات مشاكل وحلول: , , , ,

اترك رداً أو حلاً لهذه المشكلة