انا بحب انسان وهو بيحبنى بقالنا 7 سنين بس اهلى ضد زواجي منه وانا عارفه انهم رفضينو من اول ماحبيتو يعنى من 7 سنين بس انا بحبه ومش قادره احب حد غيره ونفسى اعمل اى حاجه لاهلى عشان يوافقو عليه هو طيب وحنين وكويس بس العيب فى اهله وده سبب رفض اهلى لانهم مختلفين عننا فى حياتهم يعنى فيه فى عيلته حد كان مسجون وبيحشش بس هو كويس اوى غير اهله وبعدين انا بقول لاهلى انا هتجوزو هو مش اهله يقولولى لا بردو انا بجد مش عارفه اعمل ايه ومحدش يقولى اسيبو لانو روووحى بجد
انا بحب واحد وعايزه وهومحترم جدا مافيش غيره هو وامه وجي اتقدم ليا بس هو بعيد عننا في محافظه تاني وكلم اخويا واخويا رفضه علشان بعيد وهو قالي مش هكلمك من وراء اخوكي لحد ما يوافق وانا مش قادره اعيش لحظه من غيره اعمل ايه علشان اخويا يوافق
شوفي يابنتي دا زواج مش لعب عيال أي نعم الشاب كويس ومحترم ولكن المشكلة في اهله فيهم اللي يتعاطي الحشيش وخريج السجون كما ذكرت فدا يخلي اهلك معهم كل الحق في رفض زواجك هذا لانو دول اهله وعيلته ولايمكن له ان يستغنى عنهم او يعيش بعيد عنهم دي الحقيقة والسمعة فوق كل شيء عايزه احد يتكلم عليك انت واهلك ويقول عنكم كلام وحش طبعا لا وصدقيني زواجة بالشكل ده محكوم عليها بالفشل في النهاية وانت الف من يتمناك وهتلاقي نصيبك مع احسن منو مع ابن الحلال اللي يستاهلك ويقدرك ويسعدك طوال حياتك
عاوز احكي لك قصة والله العظيم انها حقيقة حصلت لابنة خالي كانت فتاة شابة وعلى دين وخلاق واهلها ناس طيبين جدا تقدم لها زميل لها في العمل وكانت تعرفه من 5سنوات وعاوز يتزوجها ولما سالوا اهلها عن الشاب هو كويس ومحترم لكن المشكلة في اهله اثنان من اخوانه كانوا مسجونين وعليهم قضايا تجارة مخدرات وسرقات بالاكراه واعتدى واغتصاب وسيرتهم وحشة جدا ورفض خالى زواجها من ذلك الشاب لكن البنت وامها كانوا عاوزين الشاب واستطاعوا اقناعه عشان يوافق مع اني تكلمت مع خالي في دا الموضوع وقلت له لازم تمنع الزواجة دي باي طريقة فقال ياابني البنت وامها موافقين وماقدرشت عليهم وتم الزواج وراحت البنت تعيش مع اهل زوجها لانهم في بيت العيلة وشافت الذل والعذاب معهم ناس ماتتورع عن الحرام وحياتهم كلها خداع وغش واكاذيب الاب والام مايعملوش حاجة اخوات زوجها واخواته عايشين على اكل المال الحرام والسب والشتائم والطعن في اعراض خلق الله حتى ا لصلاة مايصلوا ولايودوا حق الله عليهم كلدا الزوجة عرفته من خلال معاشرتها لهم والعيش معاهم وزوجها مسلوب الارادة وضعيف الشخصية لايتكلم معاهم ولايقدر يقولهم شئ حتى وقعت المصيبة جاءاخو زوجها سكران ذات ليلة وراها وحاول الاعتداء عليها لكنها صرخت في وجهه وهربت لغرفتها واقفلت بابها على نفسها وزوجها موجود ولم يحرك ساكنا بعدها رجعت الزوجة لبيت اهلها واخبرتهم بكل شئ وقررت ان تطلب الطلاق منه وانها كانت غلطانة لما وافقت على الزواج منه والعيش مع اهله وحاول زوجها ان ترجع له لكنها رفضت هي واهلها وطلقت منه وربي اكرمها بعد الطلاق بالزواج من شخص اخر ابن حلال متدين وعلى خلق ويقدر الحياة الزوجية ويصونها
الحب بيعمي عن معرفة الحقيقة وانت حبك للشاب دا اعماكي وجعلكي تتحدي رغبة اهلكي ولاتفكري الا في نفسكي فقط اما سمعة اهلكي فطز فيها انت بتقولي انو احد من اهله كان مسجون وبتاع حشيش والله العالم ايه كمان ثاني ومع ذلك مصرة على زواجك من الشاب دا السمعة فوق كل شئ يابنت الناس ولو فقدت تلك السمعة صار الانسان منا بلاقيمة له في هذة الحياة ترضي احد من اهلك يكون مسجون او بتاع حشيش وفي شاب محترم عاوز يتقدم لك ولما يعرف الحقيقة انو في احد من اهلك بالشكل دا سوف يرفض تماما الارتباط بك لانو حريص على سمعته وسمعة اهله مش زيك انت اللي عاوزه تهيني سمعة اهلك وتبهدليهم معاك بالجوازة دي
ما حدش هيقولك سبيه ولا حاجه بس أنا هقولك كلمتين وانتي حره.. اكيد بعد الجواز في مشاكل واوعي تقولي لأ لازم يحصل أي حاجه..طيب لو حصل مشكله ترضي لأهلك البهدله وده وارد..بلاش كده لو خلفتي طفل منه وكبر هتحطيه في نفس مشكلتك دلوقتي لأن السمعه بأفضل مع الإنسان لأجيال وأجيال والناس ما بتصدق..اسمعي كلام أهلك لأن الجوازه دي محكوم عليها بالفشل.فكري كويس جدا جدا بعقلك لأن بعد الجواز هتبقى وسط أهله اكتر من أهلك.. وربنا يوفقك.