مشاكل الشباب مع البنات

بحبها ونفسي اخطبها بس حاسس انها بتعتبرني أخ او كزميل

انا ولد عندي 22 سنة .. ف الكلية ف سنة تالتة كلية تربية .. انا شفت واحدة زميلتي من اول ما دخلت الكلية و حبيتها من اول ما شوفتها و هي حبوبة جدا و جميلة و محترمة بس انا كنت خايف اكلمها ف سنة اولى عشان كنا لسة صغيرين و كدة و هي شكلها من نوع البنات المحترم اوي و مبتكلمش ولاد خالص .. فضلت احبها بيني و بين نفسي لمدة سنتين لغاية من فترة قريبة اتجرأت و عملتلها ادد ع الفيسبوك و هي قبلت الادد تاني يوم و اتكلمنا على طول من تاني يوم ع الفيسبوك و الواتساب و كنا بنتكلم كأننا نعرف بعض من سنين و علاقتنا بدأت قوية اوي .. المهم جة يوم انا نويت اني اقولها اني بحبها و فعلا قولتلها اني بحبها بس هي احرجتني و قالتلي انها مش بتفكر ف كدة دلوقتي و قالتلي خلينا اخوات .. انا طبعا زعلت و اتقهرت جدا لأني خفت انها تبعد عني بس انا قولتلها ماشي خلينا اخوات اهو اي حاجة تخليني جمبها .. المهم علاقتنا فضلت حلوة جدا طول فترة امتحانات اخر السنة و اول اسبوعين من الاجازة لغاية ما جت فجأة و قطعت معايا لمدة ٣ شهور بدون اسباب ولا حتى مكالمة او رسالة رغم اني كنت ببعتلها رسايل كل يوم على امل انها ترد عليا بس للأسف مكنش في رد .. انا عرفت ان بالمنظر دة كأنها بتقولي متكلمنيش تاني و انا سلمت للأمر الواقع و فوضت امري لله و قولت خلاص بقا مفيش نصيب رغم ان هي عارفة اني بحبها اوي و بموت فيها و عارفة ان انا محترم و عارفة ان نيتي كانت خير و عارفة غرضي منها انه كان كويس و عارفة اني عايز اخطبها .. خلصت الاجازة و رجعنا للكلية تاني بس انا بصراحة كنت زعلان منها انها مكنتش بترد على رسايلي ف فترة الاجازة لغاية فجأة لقيت صاحبتها بتتصل بيا و بتقولي انها عايزة تكلمني .. المهم روحتلها و اعتذرتلي على عدم ردها وشرحتلي الاسباب اللي خلتها تبعد وانا سامحتها لأني بحبها اوي و مقدرش اعيش من غيرها .. و فضلت تشكر فيا اوي و تقولي انا مش متخيلة ان في حد زيك كدة دلوقتي عشان كنت بعاملها بما يرضي الله و كمان انا طول فترة المقاطعة مكنتش بلمح عليها بأي كلام ولا حتى جبت سيرتها مع حد لأني فعلا بحبها و بخاف عليها و على سيرتها اوي من اي كلمة و خصوصا انها محترمة جدا فوق الوصف .. المشكلة دلوقتي ان انا لسة بحبها و عايز اعرض عليها اني اخطبها بس خايف انها تبعد عني تاني انا مش عارف اقولها ولا لأ ارجوكم قولولي اعمل ايه و ادعولي .. انا اقدر اخطبها الحمد لله لان عيلتنا قادرة الحمد لله .. انا عندي شقة و عربية و عندي باسبور اوروبي و ليا شغلي برة ف انجلترا .. بس انا خايف اقولها عشان انا حاسس أنها بتحبني و تحترمني كأخ او كزميل بس مش بتحبني الحب الأنا بحبهولها .. اسف اني طولت عليكم بس ربنا يعلم انا عامل ازاي من غيرها .. ارجوكم ادعو انها تكون من نصيبي

مشاكل وحلول ذات صلة

اضيف بتاريخ: Saturday, November 2nd, 2019 في 08:50

كلمات مشاكل وحلول: , , , ,

اترك رداً أو حلاً لهذه المشكلة