مشاكل الشباب النفسية

تربيت بدار رعاية ايتام وسخرية الناس مني

شاب 27سنة تربيت بدار رعاية ايتام منطوي جدا ومنعزل عن الناس لاسباب كتيرة اولها التربية في الدار لانها كانت سيئة جدا كنت بخاف من زمايلي الاكبر مني لأنهم كانوا بيشربوا حاجات حرام وسرقة وبنات وكانوا بيضربوني لاني مش بوافق أعمل زيهم كنت بخاف منهم مش كنت بختلط باي احد في الدار كنت بجلس بعيد.عنهم في اخر العنبر وربنا رزقني بموهبة في الرسم على الزجاج والحمد لله ملتزم ومش بسبب أي فرض وبخاف من ربنا ومن صغري في حالي مليش اختلاط باحد دائما بمشى لوحدي بروح أي مشوار او للدراسة لوحدي مش ليا أي اصحاب كنت بختار دائما الوقت اللى الشارع يكون فاضي عشان بحس ان كل الناس بتنظر ليا بخاف ان احد يعرف اني من الملجأ والله حتى طول ايام الدراسة زمايلي كانوا يسخروا مني في الفصل ويقولوا عليا جيت الدنيا بالحرام وروح دور على امك واسألها مين يكون ابوك نفسيتي بتتعب من نظرات الناس ليا كنت برجع الدار واقعد لوحدي في الظلام وابكي اشتغلت في اكتر من مكان اشتغلت في زهراء مدينة نصر ومناطق كتير في القاهرة واشتغلت فى اكتوبر واشتغلت في العاشر من رمضان والسادات واشتغلت في المنصورة ورحت مدن كتير أي شغل بلاقيه طالما حلال مفيش فيه أي غضب لربنا بشتغله وكل ما احد يسخر مني او يتريق عليا ويجرح كرامتي اسيب الشغل واهرب واروح ادور على شغل في مكان تاني اشتغلت في دهانات الارصفة مع مقاولين واشتغلت في افران عيش واشتغلت في مطاعم وعامل نظافة وورش ومحلات فاكهة وبغسل سلالم وانظف شقق طلبة عزاب واعتمدت على نفسي كافحت كتير جات عليا ايام كنت يبكي من البرد لغاية ما كملت تعليمي والحمد لله حصلت على بكالوريوس تجارة مشكلتي مش عارف اعيش وسط الناس مش عارف اتأقلم معاهم دائما بخاف ان احد يعرف اني من الملجأ لما احد بيسخر مني بتخنق بسرعة وببكي في الظلام اعتبروني زي اخوكم ازاي أحل مشكلتي وخائف اروح لدكتور نفسي

مشاكل وحلول ذات صلة

اضيف بتاريخ: Thursday, February 18th, 2021 في 13:36

كلمات مشاكل وحلول: , , ,

4 رد to “تربيت بدار رعاية ايتام وسخرية الناس مني”

  1. ليالي
    17/03/2021 at 16:21

    Be as you are days when you wait for people to praise, damn them all

  2. الساهر
    02/03/2021 at 15:31

    تحياتي الى كاتب المقال ..
    اعرف يا صديقي أن العالم بالخارج جداً موحش ..
    فأنا أؤمن ان البشر لم تتعلم منذ بداية خلقتها من الحيوان سوى الدفن فقط ..
    عليه لاتهتم ..
    فانت لا ينقصك شئ ..
    ولو كانت القضية قضية نسب ..
    فالكثير بهذه الحياة نسبهم لم يغني ولم يشفع لهم ..
    صديقي ..
    لست وحدك من يتألم ..
    فلكل شخص بهذه الحياة جحيمه الخاصة ..
    لذا انت شخص مناضل ، فقد كونت نفسك بعد توفيق الله وحدك ، وتخرجت و اشتغلت و ربيت نفسك بنفسك ، وتذكر أن مسالة النسب الخاص بك ليست كل شئ بالاضافة ليست جريمتك ، فانت ضحية
    عليه لاتحمل نفسك ما لا طاقة لك به ، وتجاهل سلبية الاخرين ، فالشر لا يفنى من الناس و إن قبروا اي حتى داخل القبور لا يفنى شر الناس لانه ان مر حي على قبر لتمنى صاحب القبر لو كان مكان الحي و الحي مكانه ، عليه استمر بهذه الحياة و تجاهل السلبية ولا تتحطم بل امضي فقط كما انت فانت صدقاً شخص جدا عصامي حتى على صعيد الوجع و ذلك لانه حتى بالالم فأنت تتألم وحدك ، عليه انت شخص ناجي ولست شخصاً مثيراً للشفقة ..
    و أخيراً ….
    انا من الاشخاص الذين املك الكثير من الاصدقاء الذين بنفس ظرفك و افتخر جداً بهم صحيح ان بعضهم ليس صالحاً انما الكثير منهم مذهلون بطريقة خيالية جداً وهكذا هم البشر يوجد الصالح و الطالح وهذا شئ لا دخل له بالنسب ، عليه تأكد أنه ذات يوم ستجد الرفقة الملائمة لك حينما تبلغ لمرحلة الكمال النفسي ، فحينها فقط ، سينجذب لمدار فلكك الاشخاص المشابهون لك روحياً ، فالطيور على اشكالها تقع
    أسأل المولى العظيم أن يهبك فرحةً تفوق فرحة يعقوب بيوسف

  3. وائل
    28/02/2021 at 12:45

    حبيبي اولا انت افضل من اي حد
    ثانيا انسي الفترة دي ومتتكلمش فيها مع اي حد مهما كان ولو خريج جديد ممكن اساعدك في شغل في شرم الشيخ بس بيكون معاك الموقف من التجنيد وانت انسان طبيعي جدا وافضل الف مرة من طلبة فاشلة تواصل مع لو ينفع

    تقبل تحياتي

  4. Ms
    27/02/2021 at 21:44

    مش عارفة اقولك ايه ولا عندي حل لان العيب في الناس اللي نفوسها مريضة مش فيك وبجد بحييك انك برغم ان اللي حواليك كانوا بيعصوا ربنا انت متاثرتش بيهم و كل اللي عايزة اقولهولك ان اجرك عند ربنا كبير اوي و مش قادرة اصدق ان في ناس وحشة لدرجة انها تاذيك بكلام زي دا بدل ميكونوا كويسين معاك عشان اتحرمت من حاجة و انت مش باديك بس مسيرك هتلاقي اللي يقدرك و،يقدر شخصيتك الجميلة دي و ميشوفش ان فيك عيب لان فعلاً العيب مش فيك ابداً سواء كان اهلك هما اللي سابوك للملجأ او توفاهم الله فانت اتظلمت و محدش ليه الحق يعايب فيك و متخليش حد يكسرك ولا يوجعك بكلمتين انت يتيم زي الرسول و مكانك يوم الايامة انشالله جمبه ❤

اترك رداً أو حلاً لهذه المشكلة