التحرش الجنسي

تعبت نفسيًا بسبب تحرش زوج امي بي، كيف اتصرف الآن؟

مرحبا
انا حابة احكي قصتي ونفسي حدا يسمعني ويفهمني كيف اتصرف، لانه جد تعبانة نفسيا وما حدا عارف الوجع اللي جواي.

انا بنت امها وابوها تطلقوا من لما كنت صغيرة كتير، ابوي تركني وما اله دخل بالمرة وضليت مع امي.

امي كانت صغيرة وحلوة واجاها عرسان، ومتل كل هالنسوان اجاها واحد ووافقت عليه، وهو رضي انه اعيش معهم ويربيني ويكون اب الي.

بس المشكلة انه انا اصلا كان عندي عقدة نفسية انه ابوي تركني وزتني وما سأل عني.

المهم عشت مع امي وزوجها اللي رباني وصرف علي وكان ابوي، بس لما كبرت شوي حسيته بلش يتحرش فيي والمشكلة انه هو كان يفوت علي بالليل بحجة انه يغطيني، وانا كنت عارفة وشايفة وفش بايدي اشي، وهاد الحكي بس لما اكون نايمة، مستحيل يعملي اشي قدام الناس او حتى لو فش حدا بالبيت لانه هو ما بده حدا يعرف.

المهم القصة استمرت ٣ الى ٤ سنين عهالحال وانا ما حكيت، انا هدفي كان ما بدي اخرب بيت امي لمرة تانية، وكمان انا عندي اخوان من امي يعني هي خلفت من زوجها التاني ٣ ولاد بنت وولدين.

اقسم بالله في ليالي انام ودمعتي ع خدي ومو طالع بايدي اشي، وهاد الاشي كمان عمل عندي عصبية شديدة يعني من كتر ما ما انا كاتمة جوا قلبي كله بطلع ع شكل غضب، واحيانا كتير ما بتحمل كلمة من حدا حتى امي كتير بتهاوش معها، والله ضميري بضل يأنبني وبخاف من عذاب الله تموت وهي غضبانة بس انا جد مش مرتاحة نفسيا نهائيا.

المهم لما قصة التحرش استمرت وما طلع بإيدي اشي ضليت اقوم بنصاص الليالي اعيط وادعي الله يكف ايده عني.

هلأ هو بطل يفوت علي بالليل، بس في مشكلة انه مش قادرة احبه ولا حتى اطيقه، مع انه كل الناس بتحبه وبتحترمه وامي اولهم بتموت عالارض اللي بمشي عليها.

هو ملاك ملاك قدام الناس وانا لاني عصبية الكل دايما ضدي وانه انا الوقحة وانا قليلة الادب.

انا احيانا بتخطر عبالي شغلات وافكار انه هي المفروض ما كان تجوزت وكان المفروض تركتني عند دار جدي واكتر من مرة حكتلها هيك بتحكيلي تجوزت عشانك عشان يكون الك اب طيب.

بالله عليكم ساعدوني هو صرف علي وكبرني وعلمني وحنون بس اجا وقت من الاوقات وتحرش فيا مد ايده علي، هاد ممكن اقدر احبه او احترمه بالرغم من كل محاسنه؟؟.

وهلأ صاير عنا قصة بالبيت، غلطت قبل فترة وقام ضربني، وهو بضرب فيا لاني مولعة منه حكيتله انت بالذات ما الك حكم علي، وهو عصب من هاي الكلمة.

والقصة الها شهر وما بحكي معي، المشكلة مش هون المشكلة انه امي ما بتحكي معي ومش راضية تصالحني لانه هو زعلان مني، بتحكيلي انت قليلة خير والمعروف ما بنفع معك واحد صرف عليكي وكبرك ورباكي هاد بتحكيله ما الك حكم علي.

انا عارفة انه امي ما بتعرف بس جد انا تعبت، هو كان يتحرش زمان مزبوط بس مو قادرة اطيقه خلص ما بقدر اسامح على هيك اشي ابدا، لانه صرت اخاف لو هو زي ابوي فعلا كان ما خطر ع باله يعمل هيك صرت اخاف لانه نظرته الي مو نظرة اب لبنته.

وهيني متهاوشة مع امي ومتهاوشة مع الكل وطول نهارها بتسمع حكي، وهي اصلا عصبية وكل شي بحياتها هو هو بالنسبة الها كل شي لانه عمل معها خير وانا مستحيل احكيلها واخرب بيتها لو بموت.

واساسا ما حتصدقني لانه زي ما حكيت هو ملاك وماشي عالارض.

يارب حدا يرد علي ويبرد قلبي ويحكيلي انه انا مو غلط، وانه الظروف خلتني هيك، وانا جدا تعبت نفسيا كل هالقصص خلتني احس اني شخص ناقص وما اله حظ بهالحياة 💔

مشاكل وحلول ذات صلة

اضيف بتاريخ: Sunday, August 1st, 2021 في 05:54

كلمات مشاكل وحلول: , , ,

6 رد to “تعبت نفسيًا بسبب تحرش زوج امي بي، كيف اتصرف الآن؟”

  1. نهي
    21/05/2022 at 10:49

    ربنا يبرد قلبك انا حاسه بيكي لاني في نفس مشكلتك

  2. هلا
    22/04/2022 at 04:34

    لما تشوفيه يجي عندك شغلي قراَن بتلفونط و بيهرب و اذا حاول يقفله شغليه من جديد و يبتعد عنك لا تتركي هذه الحركه لان القراَن يطرد الوسواس

  3. ساره
    23/03/2022 at 21:27

    حبيبتي انتي الله يسعدك ويعوضك عن كل اللي عشتيه يارب الحكي اللي عم تقوليه خطير وانتي ابدا مش غلطانه بالعكس هي جريمه من الجرايم اللي بتقترفها الناس المريضه حاولي ضلك محتشمه وما تلمسيه ابدا وضلك من بعيد احكي معه وبلا ما تحكي لإمك وما تصدقك او تحقد عليكي صدقيني ما في حتلاقي اي زوج ام منيح بهالدنيا حتضلك مش قطعه منه متل الاب الحقيقي بس مش معناته انه يتحرش فيكي ويتسغل قاصر حسبي الله ونعم الوكيل فيه

  4. lost
    03/11/2021 at 21:02

    الانسان مش ملاك، كلنا عندنا جانب سيء بنحاول نداريه ونغيره، لكن لما نوصل بالجانب السيء بتاعنا اننا نئذي حد ،يبقي كدة احنا شياطين مش بشر، مفيش داعي للتناقض في المشاعر، هو رباكي مش عشانك ،ده عشان والجتك شارطة كدة في اللي هيتجوزها، ده مقابل الجواز منها، انتي بتكرهيه، واللي عمله جريمة، وإن أبوكي ميسألش عنك دي جريمة أكبر، المهم إن انتي حاليا نفسيتك مش متزنة وعمرها ما هتبقي متزنة، اللي حصل مش قليل، ولكن فيه أمل بس عاوز مجهود منك
    واضح انك أقل من 18 سنة، هتحاولي تتجاوزي اللي فات، تعامليه أكنه غريب، متحتكيش معاه وابعدي عنه لو لمسك، انا عارف صعب والدتك بالذات تصدقك، بس لو الموضوع اتكرر حاولي تمسكي دليل، او حتي لو مفيش دليل لازم تعرفيها، وتشوفي حد ينفع تعيشي معاه ،جدتك خالتك عمتك، او لو ينفع تتجوزي، بس قبل ما تنجوزي هتخافي نفسيا منه، انتي حاليا بسببه هتحسي انه كل الشباب كدة، المهم انك تعرفي ان كل انسان صورة مختلفة عن التاني، كلنا فينا الخير والشر، مش معني ان ابتلائك كان مع أشباه رجال، ان نفيش شباب كويسة، المهم لازم ده يقف حتي لو هتقفلي علي نفسك لحد ما تشوفي مكان تاني.. ولو لقيتي انك خلاص جبتي اخرك، ومش مستحملة ،افضحيه عالاقل ادام امك ،لان حتي لو مصدقتكيش فدي الحقيقة ولازم تتعرف.. انتي مش واصي عليها عشان تشيلي هم تخربي عليها، العكس هي واصي عليكي ودي مسئوليتها تتشقلب وتخلقلك بيئة آمنة، كل الدعم والدعوات ليكي، صدقيني انتي ملكيش ذنب واللي جاي أحسن بس خلي عندك قابلية للحياة

  5. نسيونا
    03/08/2021 at 15:09

    انسي حكاية اولاد العم والخالة ،كانت زلة مني وخطأ ، ممكن يستغلوك او يقتلوه ، الموضوع يحتاج لتصرف حكيم لا يفضحه ولا يكبره

  6. نسيونا
    03/08/2021 at 15:04

    هذا الامر يحدث غالبا من ازواج الامهات ،امرأة في بيته ليست من اهله ولا بنته ولا اخته ، مع انك محرمة عليه ، لكن قلبه مريض ، اذهبي لاهلك ،لن يحترمك الغريب، الى اخوانك او والدك ،عمك خالك ،اولاد عمك ،او للحكومة ، اي ملجأ غير بيته ،المشكلة كمان بلدگكم حالته صعبة ، عندنا لو تروحي شئون اجتماعية او محكمة يعطوك سكن وعمل ، المهم لا تقعي كمان في طريق ابن حرام العن منه يستغل ظروفك ،
    لا يوجد لدي حل اخر ، ممكن يكون هو جپان وضعيف ،بعض هؤلاء أذا رأى الجد وسمع اسم الحكومة او الانتحار يخاف ، قولي والله اي كلمة منك او حتى تخطر لك فكرة وسخة احرقك انت وبيتك ، والله ما تعيش بعدها بسلام واحرقك وانت نائم او اسمم اكلك

    على فكرة انا لست ارهابي ، لكن احب التمثيل ،، مرة ابي ازعجني عملت مشهد خلاه يبعد عن طريقي 15 سنة ، وعملت مشهد ثاني مع ناس صار بيننا مشكلة ، مع اني ضعيف وارتبك لكن اروح امام ناس عشان يمسكوني بالقوة، كأني محتاج لعشرين يوقفوني ،صرت مرعب واروح غرفتي اضحك ما اقدر امسك نفسي ، انا معروف اني بلطجي شرس مجنون ممكن اعمل اي شي يخطر ببالي ، بس والله انا ضعيف جدا ،لو يلطمني واحد على وجهي اروح غرفتي أبكي ، من ايام المدرسة كانو يسموني البكاي ،

    والسلام عليكم ورحمة الله اخوكم البلطجي المرعب مزلزل الناس الجبناء ، في واحد اذا شافني يروح من طريق اخر ، نأس بني ادم ما يجيبهم الا العين الحمرا ، ممكن تدليك العينين ثواني تصير عيون محشش، والكلام والصوت مهم والله لاوريك واعلمك ال،، خلاص ط صارت رواية ، اارجو احد غيري عنده فكرة او حل

اترك رداً أو حلاً لهذه المشكلة