مشاكل الازواج

زوجي لا يتحمل المسؤولية

أنا زوجة من سبع سنوات و أم لطفلين تحملت مع زوجى كل شئ . علشان المركب تمشى و من أول سنه جواز و هو عديم المسئوليه و ضعيف الشخصية و مش بيفكر غير فى نفسه و بس و يشتغل يوم و يقعد شهور في البيت لان الشغل مش مريح ليه . رغم كل الالتزمات الماديه الى عليه أقل شئ أكل و شرب الأولاد و ايجار السكن . لاكن هو بيفضل انه يروح يطلب من مامته بحجه انه مش لاقى شغل . نزلت اشتغل من أول سنه جواز و تحملت مسئوليه أولادى رغم ان والدى ثرى و كنت مرفهه جدا في بيت بابا . لاكن كان ده الحل الوحيد و فضلت عايشه ياخد مصروفه منى لحد ما خلاص تعبت . و الى زود تعبى اكتر انى قابلت شخص فيه كل المواصفات الى انا طول عمرى احلم بيها و عرض عليا حبه رغم انه متزوج و اكبر منى ب 15 سنه بس فعلا اتعلقت بيه و حكيت ليه على كل حاجه فعرض عليا الزواج و طلب منى اترك زوجى لانه مايستحقش الحياة معانا و هو هيكون ليه زوج و راعى و اب انا و أولادى مع العلم أنه متيسر ماديا جدا و أنسان على خلق فعلا و عمره ما فكر يتصرف معايا بشكل غير محترم بالعكس . أنا محتارة بجد مش قادرة اتحمل و أشيل لوحدى المسئوليه اكتر من كده . أرجوكم لو حد عنده حل يقولى

مشاكل وحلول ذات صلة

اضيف بتاريخ: Tuesday, October 11th, 2011 في 06:36

كلمات مشاكل وحلول: , ,

9 رد to “زوجي لا يتحمل المسؤولية”

  1. سما فير
    25/02/2016 at 12:18

    السلام عليكم اختي الحبيبة اني حاسة بالقهر اللي انت فيه من عدم تحمل زوجك المسؤوليه وووووووو لان وضعك اشبه بوضعي بكتتتتتتتتتير وكل حاجه مسؤوله منك انتي وهو عايش حياته علي كيفه ومفيش اي حاجه في دماغه ولا بيفكر في اي حاجه غير نفسه يعني اناني لان اهله ربوه للاسف علي كدا من صغره وانت تتحملي نتيجه تربيته فانك لازم تقفي موقف حازم لان دا مستقبلك ومستقبل اولادك وانك اللي عارفه اللي ممكن ياثر فيه جامد انك تروحي علي بيت اهلك وتسبيلو الاولاد او تسيبي الشعل وتقعدي في البيت او تحاولي معاه ومتياسيش لانه عمود البيت لو اتكسر ينهدم البيت وتحفزي فيه رجولته فاني اللي شايفه اللي ينفع من دول وع جوزك واهمممممممم من دا انك تدعيلو في كل صلاتك ان ربنا يصلحهولك ويجعلك قرة عين ليه وهو قره عين ليكي اما بالنسبه لتفكيرك في راجل تاني ايا كان هو
    يبقي انت بتفكري تهدمي بيتك وعيالك ازاي بانك تهربي وخلاص ومش عارفه ايه النتيجه كفايه انك بتغضبي ربك طب ازاي يبارك فيكي وفي عيالك ويهديلك جوزك
    وربنا يوفقك للافضل دائما

  2. المخنوووقة
    29/06/2012 at 06:39

    ههههههه ولا اااااااه المشكلة يا حبيبتي تعتك بتكرر كتير اوي الزمن ده وانا وحده زيك لكن وعيت قبل ما دخل نفسي في دوامة قهر اكبر من المشكلة الي عندي وكل الكلام الي قالوه زملاءك صح الصح وفارس الاحلام الي متهيألك ماهو الا شيطان من الانس هيخرب دنيتك والله كنت عامله زيك بس وعيت قبل ليطيح الفاس بالراس خليكي مكملة قصة كفاحك وتعبك مع جوزك التعبان الخايب معلش ده ربنا رايدلك الخير وعايز يبتليك بالدنيا علشان يعوضك بالجنه ياسلااام الجننننة ويجي ايه تعبنا بالدنيا مقابل جنات الخلد دايما اذكري الله واقراي قران واستمعي لمجالس الذكر وانت صدقيني هيهون عليكي تعبك وقهرك من جوزك وبكرة انشالله الاولاد هيكبروا وهيعوضوك لانك كنت الام الحنونة الصابرة الي ضحت بسعادتها عشنهم وياما في الدنيا مظالييييييم بس الصبر الصبر مفتااااح الفرج وموفقة ياغالية

  3. جنات
    29/01/2012 at 01:28

    اتقى اللة فى جوزك ولو هو اللى عمل كدة كنتى قلتى الخاين رمانى انا والعيال بصى قر الكلام مجرد التفكير فى واحد تانى غير جوزك يعتبر زنة وانتى بقى مش فكرتى وبس لاء انتى بتخونى الراجل اللى معيشك فى بيتة وحملة اسمة ياترى ربنا راضى عنك باللى انتى عملتية ولا لاء لان رضا اللة من رضا الزوج وربنا يهديكى

  4. ابو عمر
    11/11/2011 at 20:38

    اختى الطيبة…بمجرد ما رزقنا الله بالاولاد فتتحول حياتنا من اجلهم ولم نعد نعيش من اجل انفسنا
    اقسم لكي لم اقصر قط مع زوجتى واولادى الثلاثة ولم ادع فى نفسهم شىء الا ووفرته لهم ولها طبعا فى حدود امكانياتىولم اخونها يوم ولم اتركها تعانى الام مرضها يوم وحدهاولم اجرى وراء نزوات او مخدرات ابداولم اشترى لنفسى ملابس ابدا الا ادا وفرت لهم هم الاول ملابسهم ….ومع ذلك تدعى اننى ضعيف معها و ذو شخصية ضعيفة حيث اننى لا احب الصوت المرتفع و لا احب ان اضرب اى احد هى او الاطفال …هادىء و مسالم بطبيعتى …….تخيلى لو ان زوجكى مات و صار معكى اولادك و تزوجتى بمن تريدين هل سيكون لهم بمثابة الاب هل سيهتم بهم وبك معا او هل سيجد الوقت الكافي في حين ان لديه بيت واولاد ….هل سيوفر ماله من اولاده من اجل اولادكى , واذا فعل هل ستدوم الحياة بينكم بلا مشاكل؟……..فكرى جيدا ولا تغضبي الله و اصبري و احتسبى الاجر عند الله فحلتك الان افضل من المطلقة ذات الاولاد او الارملة او العانس

  5. Knight
    18/10/2011 at 04:04

    اكيد كنتى عارفة شخصية زوجك قبل الزواج وفى فترة الخطوبة ما اكتشفتيش دة فجاة لكن اللى حصل حصل ولازم تشوفى حل ولكن انك تعرفى رجل تانى معتقدش دة الحل المناسب دلوقتى انتى فقط من همومك وتعبك بحثتى عن رجل تانى واول شخص هايفتح صدرة ليكى هاترتاحى لة وهاتحبية لكن اسمحيلى دة هروب اكتر منة حب. اعتقد انك لازم تحطى زوجك تحت الامر الواقع ان تيجى فى مرة تقولى مفيش فلوس لا لاكل ولا لبس ولا شرب واتصرف وتكونى متفقة مع مامتة انها ما تعطية فلوس وتسيبية يتصرف ويبقى الضغط عليه من كل ناحية علشان يعرف ان الحل لازم يكون عندة هو لوحدة ولازم يتحمل الوظيفة حتى لو صعبة وانا رايى ان مشكلتة نتيجة تربيتة من الاساس فى ان اهلة عودوة على ان كل حاجة سهلة ولما يحتاج يلاقى اللى يديلة لكن امة او اهلة مش عايشين لية على طول. بس موضوع انك تبحثى عن رجل تانى مش دة الحل مع انى عذرك فى انك تعبانة ومحتاجة لحد تتكلمى معاه ويشعرك بحنيتة وعطفة لكن تفتكرى ان دة الحل انك تتزوجى من رجل متزوج وممكن بدل ما مشكلتك يكون حلها فى الزواج دة تكون مشكلة اكبر والله اعلم. فكرى كويس قبل اى خطوة تاخديها

  6. shosh
    13/10/2011 at 19:45

    انامش هلوم حضرتك كتير بس واضح انى حضرتك اكتشفتى انك غلطانه فى حق نفسك اولا وفى حق اولادك اللى ملهمش زنب فى اى حاجه بينك وبين ابوهم وغلطتى فى حق زوجك اللى مبيتحملش المسؤليه بدليل انك لجاتى لهذا الموقع لحل مشكلتك لانك لوعلى حق مكنتيش احتجتى مساعده من حد
    ليه اغلب الزوجات اول متلاقى زوجها فى شوية مشاكل اول حاجه تفكر فيها….. مش هقول الخيانه بس اول حاجه تعملها تتشد لاقرب واحد فيه صفات عكس الصفات اللى فى زوجها
    ليه حضرتك ماحولتيش تصلحى من زوجك لو مش عشانك عشان اولادك
    لما زوجك بيفكر فى نفسه ونسيكى ونسى اولاده ليه طاب ما حضرتك فكرتى فى نفسك ونسيتى اولادك ورحتى فكرتى فى واحد تانى معلش حاولى تستحملى عشان ولادك زى مقولتى انك مستحملاه من اول سنه جواز
    وعلى فكره اكيد اللى حضرتك فكرتى فيه اكيد فيه عيوب لان مفيش حد خالى من العيوب واكيد انتى متعرفيش ايه عيوبه ومش هتعرفيها الا اذا عاشرتيه بس انتى عشان محرومه من الحب والحنان حبيتيه من غير ماتفكرى
    ارجوكى يااختى دورى على الحجات الكويسه فى زوجك ولونك مش هتقدرى تلاقى لانك شايفه غيرو احسن منه حاولى تحافظى على كرامتك وكرامت اهلك وكرامت اولادك اللى بكره هيكبروا ومش هيغفرولك هذا الخطا ولو شافو ابوهم مش كويس برضو هيلموكى ويقولولك ليه محولتيش ياماما ربنا يهديكى يااختى بالله عليكى حكمى عقلك شويه وارجوكى ارجوكى حاولى تفكرى ولو مره واحده بعقلك مش بقلبك واضح من اسلوب حضرتك انك انسانه مثقفه ومحترمه وبنت ناس
    بالله عليكى ما تظلمى اولادك وارضى بنصيبك وربنا يهدى جوزك ويصلح حالك يارب

  7. كنزى
    13/10/2011 at 14:44

    فى مثل بيقول جوزك على ما تعوديه انتى السبب فى الحال اللى انتى وصلتى ليه يبقا اكيد فى ايدك الحال انك تحسسيه بكميه المعاناه اللى بيتعبه علشانه علشان يحس على دمه

  8. ♥♣♥ قاضى الغرام ♥♣♥
    12/10/2011 at 01:02

    امرك فعلا عجيب والله اول مشوفت العنوان حسيت ان انتى متعلقه بحد غير زوجك وفعلا طلع احساسى صادق 000 المهم نروح لموضوعك والاهم فيه هو الحبيب مش الزوج او بمعنى اصح العشيق هو انتى فاكره انك احسن من مراتو ام عيالو هو انتى فاكره انك هتديلو اكثر من الى مراتو ادتهولو هو انتى فاكره انك هتعوضيه حنان اولادو هو انتى فاكره انك هتكونى الملكه التوجه على عرشو هو انتى فاكره انك هتكونى سعيده بزواجك لما هتسيبى زوجك وعيالك وانتى بتحسى بالذنب انك عشقتى على زوجك هو انتى فاكره انك هتمتازى عن مراتو بحاجه انا لو قعدت اعددلك مش هانتهى على فكره بقى الراجل المتجوز الى يبص لواحده متجوزه ويخرب بيتها يبقى راجل ديوس يبقى راجل شيطان يبقى راجل شهوانى هو مبيحبكيش هو حب فيكى بس مواصفات معينه لما هيوصل لها هيرميكى بعدها بس وقتها هتبقى خسرتى زوجك الحقيقي وخسرتى اولادك وخسرى اهم حاجه خسرتى نفسك ووقتها كمان هتتمنى تعيشى لو خدامه عندو بس ميرميكيش وتصبحى مطلقه من واحد واتنين وبعدها بتكثر النظرات على انك خطافه رجال وهات يا كلام بعد كده 000 اما بالنسبه لزوجك بقى انت مش ملزمه انك تشتغلى اقعدى فى البيت او روحى عند اهلك اشرفلك الف مره من الفعل الشنيع الى هتقعى فيه ده ثم انتى بتقولى بباكى ثرى خلاص روحى اقعدى هناك لما جوزك يشوفلو حل فى نفسو او خلى بباكى الثرى يشغلو عندو او يفتحلو مشروع هيعود على الاتنين بالنفع بدل متخربى على نفسك وعلى بيتك وعلى اولادك باتمنى من كل قلبى تتحكمى فى عقلك وترجعى لصوابك وبكفياكى خيانه لزوجك اصعب حاجه فى الكون كلو الخيانه صعبه اوى صعبه اوى صعبه اوى تخيلى لو زوجك هو الى خانك والله كنتى هتولعى فيه وفى نفسك لان الخيانه صعبه انتى فى نهايه رسالتك قلتى اريد حلا اختارى الحل الى يعجبك واتماشى معاه وشكرا

  9. الطيار الرايق
    11/10/2011 at 07:48

    صباح الخير اولا موضوع ان زوجكك مش متحمل المسؤليه ده انتى عارفاه من اول ما تزوجتى وصبرتى وسكتتى على كده لحدما بقى عندك اولاد الله اعلم كم سنه زواج المهم ان بقى فى اولاد وانتى رضيتى بكل ده من الاول اما انك تدخلى الاهل فى انصلاح حال زوجكك واعتداله او انك تتحملى وتحافظى على اولادك وده نصيبك وقدرك ثانيا موضوع انك تعرفى واحد ومتزوج هوه كمان من ورا زوجكك وتحبيه دى خيانه مهما ان كان الزواج مش كويس معاك دى خيانه وربنا ميرضهاش ومتخربيش بيت انسانه تانيه الا هيه مراته الاهبل الا انتى قبلتيه وبيدعى الحب عليك ونصيحه مفيش حد بيربى اولاد حد شهر والتانى بعد الزواج واولادك بتكبر هينفر منهم بسبب انه ممطن يكون عاوزك على انفراد ومش لاقيك او مش لاقى فرصه من وجود اولادك دى نصيحه خاصه مفيش راجل بيربى اولاد غيرو التزمى ببيتك ودخلى الاهل بينكم لالتزام زوجكك واهتمامه لبيته اكتر من كده وعرفينا الا بيصير معاك وانشاله نساعدك للقرار الصحيح وربنا يفقك ويهديلك زوجكك واقربى من ربنا وصلى صلى كتير وسيبك من الا عاوز يخرب بيتك ده والزمى زوجكك انه يصلى ساعديه يمكن ربنا يصلح حاله موفقهانشاء الله / المحامى

اترك رداً أو حلاً لهذه المشكلة