مشاكل الازواج

حماتي نصحتني اخد بنتي وانفذ بجلدي

بسم الله الرحمن الرحيم
السلام عليكم ورحمة الله قبل ما اكتب اي حاجة ياريت الكل قبل اي رد يتأكد ان مفيش انسان معصوم من الخطأ واننا بشر
حكايتي تبتدي من وانا عندي 19 سنة اتخطبت لشخص قريبي من الدرجة الاولي كنت رافضاه جدااا بس بحكم القرابة بقا مينفعش اقول حتي مجرد كلمة رفض دي والا كدا هبقا بفرق كل العيلة اقول ياناس مش مرتاااحة محدش سمعني المهم هو النصيب اتجوزت وانا المفروض تكون اجمل ايام عمري اللي هي ايام الفرح لقيت ان الدموع مش بتفارقني ومن قلبي حزينة جدااا طبعا الكل هييجي في تفكيروا اني كنت بحب شخص تاني والله ابداا كل الحكاية اني لقيت كل الاحلام الوردية اللي طول عمري بحلم بيها بقت سرااااااب ولقيت نفسي مع شخص مش حاسة باي نوع من انواع حتي الاعجاب بيه ومن اول اسبوع وهو انشغل بحياته ولا كأن دخل حياته شيئ جديد معظم وقتي كنت مع اهله وهو يخرج مع اصحابه وعايش حياته عادي جداااا بقيت بتألم من جوايا وحاولت اتكلم لقيت الرد انا كدا ودي طبيعتي ومش هتتغير بقيت ابكي واكتم في قلبي وخلاص وقولت اهي عيشة والسلام ويمكن ربنا يكرمني بالحمل اللي يلهيني ومرت شهور ومحصلش وهو سافر وكان كل شهر او شهرين يتصل مرة ويكلمني قدام اهله وكلام عادي لحد ما تعبت نفسيا جدااا وفكرت اسيبه لقيت بس بمجرد الفضفضة ان انتي هتفضحينا انتي عاوزة تتطلقي بعد كام شهر جواز بس الناس تقول علينا ايه وكالعادة انطويت علي ضعفي وقولت هصبر واديني عايشة علي امل الحمل ورجع الاستاذ من السفر ورجعت معاه دموعي وحسرتي علي عمري اللي بيروح من غير ما افرح بيه باللي المفروض اجمل ايام عمري وبردو محصلش حمل وعرفت ان المشكلة عندي انا واني محتاجة علاج طبعا كان الرد منه علي الموضوع دا التريقة والاهانة والتجريح قدام اهله وملاحظش حتي دموعي وانا مدبوحة من كلامه المهم بقي ييجي عليا اوقات كتير افكر بيها في الانتحار واني فعلا بكره الشخص دا ولازم اسيبه مش متقبلة منه اي حاجة بخيل جدا في كل حاجة حتي في مشاعره والدكاترة وقتها قالوا مينفعش تسيبها كل المدة دي لازم عشان يحصل حمل تكون معاها مدة طويلة واهلي اقترحوا عليه ياخدني معاه قالهم التكاليف بالنص وافقوا المهم سافرت وهناك حسيت بمعني كلمة حرمان ربنا ما يكتبها علي حد ابدا يارب حرمان من كل شيئ والله العظيم مع العلم انه الحمد لله ميسور جداا كمان ومرت سنين وانا لوحدي منكرش اني غلطت وبقيت اهرب من حياتي للنت واتعرفت علي ناس كتيير اوي من كل العالم تقريبا وهو بطلت حتي الومه في غيابه وقلة سؤاله عني واهتمامه بيا لما لقيته في يوم بقوله هو مش فارق معاك وجودي في النت كل المدة دي قالي المهم اجي بالليل الاقيكي ليا حسيت وقتها احساس وحش جدااورجعنا بلدنا ومعايه بنت وهو زي ما هو ولا اتغير منه اي شيئ بالعكس بقيت حاسة ان بينا بعد زي اللي بين السما والارض انا تعبت ومش بقيت قادرة اتحمل العيشة دي وفي نفس الوقت ظروف اهلي متسمحش اني اروح ازود همهم بهمومي وبالمناسبة انا قعدت مع والدته وحكيت لها علي كل اللي حساه واللي ابنها بيطلبه مني في العلاقة بس علي اساس انها مشكلة صاحبتي وكان كل كلامها والله العظيم اهانة له ولوم عليه في كل شيئ ومن ضمن كلامها قولي لصاحبتك تاخد بنتها وتنفذ بجلدها وتلحق اللي باقي من عمرها الحياة يابنتي بتتعاش مرة واحدة لو معشنهاش مع حد بنحبه تبقي لزمتها ايه دا يعتبر ذرة من حكايات وحكايات جوايه للاسف مينفعش اتكلم فيها حتي بيني وبين نفسي انا اسفة عالاطالة بس اتمني الاقي حد يقولي اعمل ايه انا الحمد لله ملتزمة نسبيا وبحاول علي قد ما اقدر اقرب من ربنا اوي وهو اعتقد ان الفاتحة حتي مش حافظها ومش بيصلي طبعا ادعولي بالله عليكم ربنا يهديه ويبعدني عن الاحساسيس اللي جوايا دي

مشاكل وحلول ذات صلة

اضيف بتاريخ: Sunday, December 10th, 2017 في 05:05

كلمات مشاكل وحلول: , , , , , , , ,

4 رد to “حماتي نصحتني اخد بنتي وانفذ بجلدي”

  1. البرنس
    05/09/2019 at 02:29

    اتفق – مع اسلام وابوالبتول- في كل ماقالوه لك ياصاحبة المشكلة ده هو الراي الصح والصايب وربنا يكرمك بالزوج الصالح ويعوضك خير منه ويبارك لك في بنتك الصغيرة ويؤفقكم ويسترعليكم ويصلح حالكم

  2. اسلام
    26/05/2019 at 19:02

    رأيي مع رأي حماتك المرأة ليها الحق في طلب الطلاق في حالة كراهيتها لجوزها وكونها مش قادرة تأدي حقوقه ولا يجوز ان اهلها يجبروها على الزواج وليها حق تطلب الطلاق لما يكون بيأذيها ،وليها حق تطلب الطلاق لما جوزها يقصر في حق ربنا وخاصة الصلاه لما يسيبها في علماء يقولوا واجب عليها تفارقه لو ساب الصلاه وبنتك ربنا يتولاها وطالبي بجميع حقوقها واحسن ما تتربى تربية وحشة من ابوها لكن ما تمنعيهوش من زيارتها ولا تكرهيها فيه وخليها تحترمه لانه ابوها …

  3. ابوالبتول
    25/05/2018 at 02:38

    شوفي يابنتي الغالية مع احترامي للاخ -رجل بسيط – الا انني اخالفه الراي في كل ماقاله لك فهو بيقول كلام مش واقعي ولافي عاقل يقبله ولااظنه يرضى بهذا الوضع لاخته او بنته مهما كانت الظروف دعيك منه واستمع لماقول لك منذ بداية زواجك من هذا الشخص وانت في عذاب ومعانات كبيرة واهلك هم السبب في كلهذا لانهم زوجوك من شخص لاترغبين في الزواج منه وهذا ظلم كبير وربنا يحاسبهم عليه وانت الان معك بنوته ربنا يحفظها لك ويبارك لك فيها فالقرار يرجع لك وحدك لانك انت المتضررة الوحيدة من العيشة والبقاء مع شخص كهذا لايقدر الحياة الزوجية ولايقيم لها وزنا ماذا تتاملي من شخص كهذا لايخاف الله عزوجل ولايصلي وعلاقته بربه تكاد تكون معدومة لاخير والله فيه ولافي العشرة معو صار الطلاق لابد منه ولاتهتم بكلام اهلك ومايقولوه عنك ان تطلقت فلست باول ولااخر من تتطلق في هذة الحياة توكل على الله وتطلق منه واستردي كرامتك وحقوقك والزمية بالنفقة لابنتك الصغيرة واياك والتفريط في حقوقها وتاكدي ان ربنا عزوجل بيكرمك بحسن منه بالزوج الصالح اللي تقرى به عيينك وتلاقي معو الخير والسعادة والرضا والاستقرار طوال عمرك ان شاء الله تعالى

  4. رجل بسيط
    15/12/2017 at 23:39

    ربنا يصلح حالك يا ربنت بلدي
    ويهدي زوجك
    واضح من اسلوبك انك بنت ناس ومتربية
    عموما نصيحتي ليكي بجد حافظي علي علاقتك بربنا هو ابقي لك من الكل
    ربنا يديكي الصبر ويعينك علي الحياة مش عايز انصحك بالبعد عن زوجك عشان ظروف اهلك واهو ع الأقل بنتك تتربي في بيت ابوها بين ابوها وامها
    تحياتي لك

اترك رداً أو حلاً لهذه المشكلة