السلام عليكم
أنا إمرأة متزوجة من سنتين وعندي طفل عنده سنة
لما إتقدم ليا زوجي وشفته أول مره محستش نحيته بأي مشاعر لا كره ولاراحة
قلت يمكن عشان لسه أول مره أشوفه
ولما جه كذا مره إحساسي بيه متغيرش وتمت الخطبه ولما بدأ يكلمني كنت أحس بضيق منه وكنت أتمني تنتهي أي مكالمه بسرعة ولما كان بيجي كنت بتمني الوقت يجري عشان يقوم يمشي
وكنت دايما بقول بيني وبين نفسي بعد الجواز والعشرة ححبه وبعد 4شهور إتكتب كتابي وكان يوم حزين بالنسبالي محستش فيه بسعادة أبدا وقلت برضو بالعشره ححبه وبعد كام يوم كان فرحي
وكنت زي أي عروسة مشاعري مختلطة بين الخوف وفراق الأهل
وخلص الفرح ورجعنا البيت
ووقتها قعدت أعيط جامد وبعدين هو حاول يهديني وبعديها دخل أخد دش
أنا كان المفروض ألبس فستان ليلة الدخلة بس معرفش ليه لبست بجامة عادية وبعد ماطلع قعدنا شوية في غرفة التليفزيون وراح حاطط راسه علي رجلي وبدأ يقرب مني شوية شوية
أنا من النوع اللي لو قلقت من حاجة بحب أنهيها بسرعة فسلمتو نفسي وإستحملت الألم عشان أخلص
وبعد ماخلصنا ودخلت أستحمي حسيت وكإنه أغتصبني
وحسيت بحزن شديد بس متفهموش من كلامي إنه كان متوحش لأ كان عادي زي أي راجل منتظر الليله دي
ومره بينا شهر عسل سئ لإني مكنتش مبسوطة معاه نفسيا أبدا معرفش ليه
وبالنسبه للجنس كنت بتهرب منه أو بعمله معاه إرضاء لربي
وخلص شهر العسل وبدأنا الحياة بجد ورجع هو شغله
كان لما ينزل من البيت أرتاح ونفسيتي ترتاح بس لما كان يرجع من الشغل كنت أحس بضيق منه كنت بخلي شغل البيت كله لحد ميرجع عشان ألاقي حاجة تشغلني عنه وفي أجازته كنت أروح أقضي اليوم مع أهلي وحدي وكنت أبقي مبسوطه إني مش معاه وكان ولازال كل شوية عايز بوسه وعايز حضن والحاجات دي بتضايقني جدا منه وكانت دي مشكله مابينا لإني كنت أوقات كتير بصده والجنس لحد دلوقتي بعمله إرضاء لربي
وبحاول أمثل عليه إني سعيده بس الحقيقة إني من أتعس مخلوقات الله لإني مقدرتش أحب زوجي لحد دلوقتي رغم إنه طيب وفيه صفات حلوة كتير بس دايما بلاقي سعادتي بعيد عنه
أنا نفسي جدا أحبه ونفسي نبقي زي الناس العادية نتفسح مع بعض أستناه علي الغدا أحب لقاءه حاولت أحبه بس قلبي متقبلهوش مش عارفه قريت عن الحكاية دي كتير بس كل اللي قريته كان كلام إنشاء غير واقعي
نفسي حد يقولي ليه مش قادره أحبه وإزاي أقدر أحبه؟
مشاكل الازواج
حاولت أحب زوجي بس قلبي متقبلهوش
اضيف بتاريخ: Monday, January 1st, 2018 في 09:00
كلمات مشاكل وحلول: الخطبة, زوج, طفل, فستان, ليلة الدخله, متزوجة
شوفي يااختي العزيزة يمكن فترة الخطوبة بينكما كانت قصيرة ولم تجدي معه الارتياح او التفاهم اثناء تلك الفترة مما انعكس سلبيا على حياتكم الزوجية صرت تتضايقين من زوجك ومن تواجدك معه ولاتشعري بالحب والسعادة معه رغم انه طيب معك ويعاملك بمنتهى الاحترام والتقدير بدي اسالك سؤال هل اهلك اجبروك على الزيجة دي ام لا وهل كنت على علاقة باخر قبل زوجك وعايزك تجاوبي بكل امانة وصراحة على دي الاسئلة وماتحاوليش اخفاءالحقيقة لانو من غير المعقول انك تعاملي زوجك بالشكل ده وتكرهيه من غير سبب انت بتصرفك هذا تجعلين زوجك يغير معاملته لك للاسوء وربما يطلقك او يتزوج عليك باخرى او يروح خياله لبعيد ويفكر انك على علاقة بشاب اخر وتخونيه لاتخرب بيتك بنفسك واستهدي بالله وابعد عن تلك الافكار او التصرفات التي تفسد عليك حياتك وتقرب من زوجك واهتم به جيدا وبادليه الحب والمشاعر والعواطف وغيري من معاملتك له وربنا يصلح حالك ويسترعليك ويبارك لك في زوجك وابنك الصغير ولايحرمك منهما ويؤفقكم ويسعدكم طوال حياتكم الزوجية ويخليكم لبعض