مشاكل البنات مع الشباب

زميلي في الشغل بيلعب بيا ولا محترم

انا مشكلتي بسيطة انا بنت عندي 25 سنة اشتغلت من شهرين ونص في مدرسة خارج محافظتي وبالتحديد في مكتبة في مدرسة ومعايا زميلي في المكتبة راجل في منتصف العمر لكن عنده صديق زميل مدرس بس مش مدرس مكتبة اكبر مني ب7 سنين متزوج وعنده بنتين ممكن نسميه ( أ )في بداية شغلي حصلت خناقة ما بيني وبين الأستاذ الكبير اللي معايا في المكتبة فقام المدرس الشاب ده بالإصلاح ما بينا وبصراحة اتعامل مع الموقف بمنتهى اللباقة والشياكة خلتني استريح له وانا لإني كنت حسه بالغربة فمكنتش عاوزة اتعرف على حد لكن المدرس ده هو الوحيد اللي كنت بستريح له وكنت بحكي معاه واحكي له على أي مشكلة وكان ممكن نقعد سوا ومفيش حد معانا في المكتبة بس كنا بنقعد في وش الباب طبعا وكان كلامنا عادي كله عن الشغل أو ممكن يتكلم عن بناته وعمرنا حتى ما سلمنا على بعض بالايد وكنت بنفسي بقول له اني بعتبره اخويا الكبير وطلبت منه لما يبقى فاضي يقعد معايا في المكتبة ووافق ولكن بره الشغل عمرنا ما كلمنا بعض لحد من اسبوع واحدة بعتت لي واحدة طلب صداقة ع الفيس وطنشته فبعتت لي رسالة ان احنا الاتنين اصدقاء مشتركين عند (أ) وسألتني هو انا خطيبته عشان كده مش موافقة على طلب الصداقة ولمحت لإني حبيبته فشتمتها وعملت لها حظر في نفس الوقت دخل استاذ (أ) وبعت لي رسالة بعت له الكلام اللي البنت دي بعتته فاتفاجأت بيه بيقول لي وانتي ايه اللي مزعلك عشان خطيبك يعني وانتي تطولي فحسيت بالإهانة الشديدة وقلت له لأ شكرا مش عاوزة اطول فقال لي هو انا وحش كده قلت له ايوه وكنت مستغربة جدا من اسلوبه لإنه في منتهى الأدب في المدرسة ومبيتكلمش بالأسلوب ده معايا حتى انه مش بيخاطبني إلا باستاذة وكمل كلام وقال لي طب لو اتقدمت لك توافقي فمردتش عليه وقلت له إني اضايقت منه لإني توقعت اسلوبه يكون مختلف وإنه يزعل لي بسبب الطريقة اللي البنت دي كلمتني بيها وانه يمسحها من عنده فقال لي طيب وقال لي انتي عسل وانتي متنرفزة فمردتش عليه وبكرر انه عمره ما كلمني بالإسلوب ده فقلت له إني مضايقة من كلامه لإنه بأسلوبه بدأ يحسسني إني مش محترمة وانه ليه مكانة كبيرة عندي ومحبش انه يكلمني بالإسلوب ده فقال لي عاوزاني مكلمكيش تاني يعني فبدل ما اقول اه او لأ لقيت نفسي بقوله بحبك لقيته بيقول لي وبعدين قلت له مفيش قال لي انا كمان بحس بحاجات وسألني إذا كنت فرحت لما عرفت كده قلت له اه قعد يقول لي حب من غير فايدة ولقيت نفسي بقوله اني بحس بالذنب لإني بحس كده سكت وبعدها بخمس دقايق اتصل وقال لي ان في رسايل بتوصله مني وان دي مش منه وشدد على إنها مش منه واحسن حاجة اني مأردش عليه انا طبعا في لحظتها كنت متأكدة انه بيكدب عليا لكن مردتش وقلت له لو سمحت امسحهم وسألني ليه صوتي زعلان مردتش عليه بس وبعدها بقا اوف لاين ومحدش بقا بيبعت وبعد ساعة لقيته بيبعت يسألني اخرة الحب ايه كنت هتجنن رنيت عليه لقيته مغلق سألت اللي بيبعت يعرفني منين قال لي على اسمي واسم المدرسة لكن دي بيانات اي حد يعرفها من الفيس سألته عرفني منين فمردتش قلت له انه الأكاونت مسروق واني مش هرد عليه اتصلت بيه وسألته إذا كان قرا الكلام اللي بعته فرد بعصبية اه وبعد كده قال لي انا كلمتك عشان ألحقك ومخلكيش تبعتي حاجة تاني اعتذرت له لإني قلت الكلام ده وطبعا كان قصدي لإني قلت بحبك فقال لي مقلقش من اي حاجة اليوم اللي بعده قعد يقول لي انه كان هيتجنن إزاي حد يعرف يدخل على حسابه طبعا انا مكنتش مستريحاله وقررت امسحه من عندي وفعلا مسحته وبعدها لقيت زوجته بعتالي بتسألني إذا كنت واحدة اسمها كذا كذا فجاوبتها قلت لها لأ انا كذا كذا واني زميلة جوزها في الشغل وقلت لها حضرتك مدام كذا فقالت لي عرفت منين فقلت لها من أستاذ (أ) فقالت لي هو انتوا اصحاب اووي كده حسيت بالإهانة وهي بتقولي كده فسألتها إن اسلوبها مش عاجبني وإذا كان في حاجة عاوزة تقولها قالت لأ انتي فهمتي ايه عادي يعني وبعد كده قالت لي اصل اسمك غريب انتي مش من هنا صح قلت لها اه قالت لي اه يبقى انتي من كذا افتكرتك قال لي انك كنتي عاوزة تزوري اخته في المستشفى وهو اخته كانت عيانة فعلا قال لي انها عيانة وبتتعالج في محافظتي وقلت له لو انت مش هتقدر تروح اروح انا واطمنك عليها فقلت لها كده فشكرتني وبعدها الصراحة حذفتها وعملت لها حظر اليوم اللي بعده كنت في منتهى الغيظ وكنت مقررة اني هشتمه واقوله اني مش عاوزة اي علاقة بيه لكن للأسف القطر فاتني فاتصلت بيه وقلت له إني في 48 ساعة اتهانت اكتر من بقية حياتي بسببك او منك او الله اعلم من مين فلو سمحت انا مش هتكلم معاك تاني بس إذا سمحت مش عاوزة حد من ناحيتك يكلمني تاني فاعتذر لي وقال له انه هيسأل مراته ليه بعتت الكلام ده وبعد 3 ساعات حسيت بالذنب لإني عملت كده اتصلت اعتذرت له فقال لي انه مش زعلان رحت بعدها بيوم مجاش يقعد في المكتبة وقعد بره يحضر بس دخل صبح عليا وصبحت عليه من غير ما ابص له وكنت مش قادرة ابص في وشه وحسه بالضيق منه هو سمعته كويسة في المدرسة وكل تصرفاته تدل على انه محترم حتى انه لما كان بيجي يقعد في المكتبة مكنش بيتكلم معايا ولكن كان بيقعد يحضر دروسه وانا اللي كنت اقعد اتكلم معاه لكن اللي حصل ده يقول ان العقل بيقول انه مش محترم انا عاوزة اعرف هل هو انسان محترم وانه فعلا مبعتش الكلام ده ولا هو انسان بيلعب بيا وبيمثل انا عارفة اني غلط اني قلت له بحبك بس دي الغلطة الوحيدة لكن في تعاملي كنت بتعامل معاه معاملة عادية بالعكس انا كنت بحس انه اخويا ومكنتش بفكر فيه كده

مشاكل وحلول ذات صلة

اضيف بتاريخ: Monday, December 28th, 2015 في 02:58

كلمات مشاكل وحلول: , , , , ,

3 رد to “زميلي في الشغل بيلعب بيا ولا محترم”

  1. ابوالبتول
    02/08/2017 at 00:43

    اتفق مع كل ماذكره -مجنون نساء- للاخت صاحبة المشكلة فهو عين الصواب والراي الصحيح واتمنى انها تنفذ كل ماقاله لها وتحافظ على شرفها واخلاقها وكرامتها وسمعة اهلها وثقتهم فيها وتبعد عن هذا الزميل الفاسق الخاين المخداع وتقطع علاقتها به للابد والله يسترعليها

  2. مروة
    29/12/2015 at 00:44

    اولا هو فعلا بيلعب بيكي وكان بيختبرك ولما لاقاكي اندلقتي في الكلام خلع وكلل الكلام دا حوار عليكي فاياريت تبعدي عنه فا انتي غلطانة انك قولتيله كدا المفروض ماكنتيش فتحتي المجال اوي كدا بينك وبينه

  3. مجنون نسوان
    28/12/2015 at 22:09

    اختي الفاضلة قرات قصتك بالكامل وحاب قولك الحقيقة اعلمي ان الاستادزميلك ده شخص خاين وغيرمحترم ولاينبغى ان يستمر في الضحك عليك والتسلية بك لازم تعرفي انه شيطان رجيم يتظاهرلك بالطيبةوالودوالاحترام ويخفى وجهه القبيح العاري من الشرف والنخوةوالشهامة ويتحين الفرص للانقظاظ عليك والنيل من عرضك وكرامتك فوجدك قتاة غريبة عن البلدةاومحافظتهم اللي تعملي بها وفي عزشبابك ولااحدمعك من الاهل وماتعرفيش احدفي البلدة دي فنصب حولك شباكه لكي يوقعك فريسةله واوهمك بالحب الكاذب والمشاعرالخادعة وانت لاحول لك ولاقوة صدقتيه وقدر يستحوذ على قلبك وعقلك من غير تفكير منك في عواقب ماتفعليه من تصرفات قدتندمي عليهاطوال عمرك وتجلب لك ولااهلك وصمةالعاروالخزي والفضيحة فوقي لروحك وارجعي لرشدك قبل فوات الاوان وقبل ماتقع الفاس في الراس واقطعي علاقتك بخهذالكلب الحقير الواطي نهايةوبلاتردد وارجعي لااهلك وعيش وسطهم وارضي بالعيشة في بلدتك مع اهلك والارزاق بيدالله عزوجل اهم شئ ماتخسري شرفك وكرامتك وتلوث سمعةاهلك وربي يسترعليك ويكرمك بوظيفةمحترمة في بلدتك وقريبةمن اهلك

اترك رداً أو حلاً لهذه المشكلة