انا كنت رافضه تماما فكره ان بنت تتكلم مع ولد بأى وسيله و أى شكل من الاشكال , و حصل اللى كنت عمرى ما اتوقعه و اتعرفت على ولد ادى ف العمرعلى النت و مع الوقت بدأ يبان توافق كبير ف شخصياتنا و طلعنا زى بض بنسبه كبيره جدا , و هو كان بيحب بنت و هى بتحبه و كان بيحكيلى ع المشاكل اللى مابينهم لان انا ظهرت ف وقت ما كان فى مابنهم مشاكل جامده , و كنت اتعلقت بيه جدا و كانت حصلت مابينا مشكله و بعدها انا قررت انى ابعد خالص مع تفكير ان اللى انا بعمله ده غلط بجميع الاشكال انى اكلم ولد و ع النت و هو اصلا بيحب واحده جدا و انا كده ممكن اتسبب ف مشاكل اكتر ما بنهم فقررت انى ابعد و فعلا ده اللى حصل , و من بعدها و هو دايما على بالى و كنت بفكر فيه بطريقه بشعه , لحد ما لاقيته بعد فتره حوالى شهرين او اكتر بيحاول انه يتكلم معايا و انا رفضت اكتر من مره , لحد ما ف مره بعد فتره طويله برضو لاقيته بيكلمنى تانى اتكلمت معاه ساعتها و عرفت ان هو و البنت اللى بيحبها سابو بعض و كان كلام كتير, كل ده و كنا لاسه مشوفناش بعض خالص , و ف مره حصل اننا اتفقنا ان نشوف بعض و ف يوميها على طول لما روحنا و فتحنا النت قالى انه بيحبنى و انا مترددتش انى ارد عليه بنفس الكلمه , و كنت سألته من قبلها ” انت متأكد انك مش عايز تنسى حد بحد تانى؟ ” قالى “متأكد” و احنا مع بعض دلوقتى بقلنا سنه و انا على طول بحس انه لاسه متعلق بحبيبته الاولى و انه مبيفكرش فيا اصلا بقدر ما بيفكر و مشغول بيها و هو قالى كتير انه عمل كل حاجه عشان ينساها و معرفش, لان هى كانت كل حاجه بالنسباله و اكيد طبعا الكلام ده بيضايقنى لاكن مش ببينله و بقف جمبه على طول و حاولت معاه كتير انه يغير تفكيره للاحسن و انه يكون انسان ايجابى بس هو مش بيستجيب و بئيت حاسه ان مفيش اى احساس من نحيته ليا خالص , و انا مش عايزه اتخلى عنه زى اللى قابلى ما عملت و بحاول بقدر الامكان انى اكون جمبه للنهايه
مش عارفه انا كده صح و لا غلط و المفروض اعمل ايه و انا ف ثانويه عامه و حاسه انى بضيع واحده واحده و بجد تعبت معرفش هو عايزنى و لا لا و فنفس الوقت عمرى ما هطلع قليلة الاصل معاه
اولا- العلاقة من خلال النت محرمة وغيرصادقة تماما وفيهاالكثيرمن الكذب والخداع والزيف ولايعول عليهالاجل الارتباط نهايئا ثانيا- الشاب متعلق بالفتاة الاولى وقاعد يتسلى بك ويضحك عليك وعمره لاحبك ولاعاوزك دي الحقيقة ثالثا- لوعندك ذرة من الكرامة وعزةالنفس لقطعتي العلاقة به فورا وبلاتردد بعدماعرفتي ان قلبه ومشاعره وكل تفكيره في البنت الثانية استردي عقلك وكرامتك واتركيه وربي بيكرمك باحسن منه وهتلاقي ابن الحلال اللي فعلا يستاهلك ويقدر مشاعرك ويصون كرامتك ويسعدك في الحياة
سبيه صدقينى مفيش حب على النت بيبقا حقيقى
ابنتي كل اللي تعمله غلط كبيرفي حق نفسك وفي حق اهلك مجرد الكلام مع الشاب حرام ومايجوز شرعا لاجل ماتحفظي شرفك وكرامتك اقطع فورا العلاقةمعه واتركيه نهايا ولوهوشريف ومحترم يتقدم لاهلك من الباب غيركدا يبقى يلعب بك وعاوز يتسلى ابعدي عنه وربي يكرمك بخيرمنه وفقك الله
يا صاحب السعادة انت قريت المشكلة و لا بس بتجاوب و خلاص بتقولك هي فثانوية عامة و قالت نها هي و هو في نفس العمر يعني صغار و انت بتقولها يتقدم و يتجوز ز كمان بتقولك هو متعلق بحببتو الاولى يا حبيبتي مادام انتي قلت بنفسك انو متعلق بها يبقى المسألة كده منتهية هو بيحبها و لازما هيكي و قت الي هيرجع لها فيه اكيد الي بيحب بجد عمرو ما بينسى الحبيب مافتكرس انو بيحبك انت بديل ومهما كان و الله هيرجع لحبيبتو الاولى مدام لسه بيفكر فيها و حاجة ثانية انت منجحتيش ف انك تنسيه حب ده و متحوليش مدام فشلت ف الاول و لو استمريت يبقى بس هيشفق عليك و هتفسري انتي ده على انو حب متخديش كلامي على ان تجريح ديه الحقيقة و انا نصحتي تبعدي قيل متتعودي عليه اكثر و تتعب منو زيادة
h انا معاكى فى رايك خليكى معاه واكيد مادام مرتاح ليكى وبيحكيلك على مشاكله الشخصيه يبقى اكيد ليكى معزه فى قلبه ويا عالم فى يوم هيقرب ليكى اكتر ويتعلق بيكى وميقدرش يستغنى عنك
انتى كدة بنت اصول بجد اعملى اى حاجة تلفت انتباهة اهتمى بية اكتر اعدى معاة فترة اطول وماتعمليش اى حاجة تضايقة وبكدة هيشوفك احسن من التانية لانك مش بتعملى مشاكل وبتعملى كل حاجة هو بيحبها
ياماما ده قدامه 4 سنين كليه وسنه جيش وتستنى لما يشتغل يعنى حوالى 6 او 7سبع سنين أنا اهو طالب فى بكلوريس هندسه واتعرفت على وحده قولتها انا لسه قدامى 3سنين عشان الجيش ولما اشتغل وبصراحه حرام تتعلقى كل السنين دى حراااااااااام وطول النسنين بجيب خلااف
انتي في ثانوي عامه وهو قي ثانوية عامه مش هاقولك ده سن صغير والكلام ده لأنه معروف طبعا
لكن سؤال واحد ثانوية عامه يعني مش هيرتبط بيكي رسمي الا بعد ٣ او اربع سنين ده لو حصل هتستحملي السنين ده من غير حاجه رسمي تكلميه وده غلط وحرام وكمان تشيلي هم هو بينسى واحده بواحده ولا لأ ومستقبلك هيضيع كده لأنك ثانوية واكيد عاوزه كلية معينه لو بيحبك وبتحبيه ركزي الاول ف مستقبلك وبعد ما تدخلي الكلية لوحدك هتعرفي اذا كان فعلا بينسى واحده بواحده ولا لأ لسه بدري عليكي والله
اطلبي منه انه يجي يتقدم ولو تردد هتعرفي دماغه فيها ايه