مشاكل الخطوبة

فرحي كان خلال ايام والجوازة افتركشت

انا مخطوبة من 3 سنين و3 شهور من شاب عمره 30 سنه يعمل في أحد المحلات “الفراخ” ومستوى تعليمه فوق المتوسط “معهد سنتين” وانا بنت متوسطة الجمال من أسرة طيبة جدًا وعمري 24 سنه ومعايا بكالوريوس تجارة.
حياتي كلها كانت مقتصرة على التعليم وبيتنا وبس، وجه الشاب ده واتقدم لي ووافقت، ومن أول خطوبتي وبينا مشاكل أولها أني روحت فرح أخت زميل لي في الجامعة (بموافقه اخويا وبابا وبابا كان معايا) وشدينا في الكلام بسبب أني رحت الفرح وقال لي: يأما تختاري بيني أنا أو اصحابك لأني مش هخطب واحدة بتصاحب شباب.
اشتكيت لبابا وجه يأخذ شبكته، مرديش يأخذها وقال هو شاريني وميقصدش وهو بطبعه عصبي وأتأسف ورجعت بعدها عادي حصلت مشكلة تانيه وكان عدى على خطوبتي 5 شهور كان عندي أمتحان وكنت متأخره وزوج أختي راح وصلني اتخانق معايا لما قولتله أنه وصلني وقالي كلام كتير ضايقني زي “مش هقبل …. كذا وكذا “.
قولتله بسيطة موقفك تأخذ شبكتك – لأني انهارت من كلامه – اتصل ببابا وقاله حصلت مشكلة بيني وبين بنتك وجهزلي شبكتي وحاجتي كلها مع العلم أن كل حاجة كان بيجيبها (دبدوب ـ عروسة) أي حاجة كانت بالخناق – لأنه مش هيجيب وعن تجربه معاه – لأنها مناسبة بتفرح وانا زي أي بنت بس مكنتش بحس بفرحتها، مع أني كنت بحوش من مصروف الجامعة بتاعي علشان أجيب له هديه تفرحه ومشاكل تانية كتير عادية بس كنت بعديها ويرجع يقول معلش مكنتش أقصد وكنت بعدي لأني كنت حلباه وحبه أكمل معاه وكنت شايفه أنه طيب وبيرجع يصالحني لحد ما جيه يوم وروحت كتب كتاب أخوه وعزموا عليا آكل عند العروسة وانا مش رضيت لأني مش بأكل عند حد حتى لو كان من عائلتي وهو عارف ومع ذلك دخلت احترامًا للناس التي قالت.
أخته قالتلي “لو مش هتأكلي هخليه يتخانق معاكي النهاردة” وأخته دي من نفس سني ولكن مش مخطوبة وانا كنت مقدره انها كانت بتحب خطيبي أوي وانا أخذته منها وفعلا لما روحنا خطيبي اتخانق معايا بسبب الموضوع ده وقعدنا أسبوع على الوضع ده مع أنه كان موافق أني مش آكل وبعد كده عرفت منه أنها هي ومامته اللي خلوه يتخانق معايا مع العلم اني علاقتي بيهم كانت كويسه جدًا وفجأه اتغيرت معاملتهم معايا وبقت سيئه جدًا أولها كان موقف الأكل وبعد كده فضلت المشاكل برده بينا وانا بقول مفيش حد مش عنده مشاكل طالما في الآخر بنحب بعض وبنتصالح، ودخلت على اصعب مرحله وهي توضيب الشقه كانت كل حاجه بيجيبها بالخناق وبتكون زهوتها راحت وانا والله كنت مقدره الغلاء وكنت بعمل أقصى ما في جهدي اني اجيب كل حاجة كويسة وسعرها كويس _ في حدود الإمكانيات ¬_ وده كان ضعط كبير عليا اني انزل ادور الأول واحدد الأماكن وبعدين هو يروح معايا نشتري ده غير اني روحت وقفت مع صنايعيه – في وجود بابا معايا – الشقة في كل مرحله لأنه في الشغل، كنت مبهدله بابا وأخواتي معايا في كل مره بروح فيها ولكن هو مكنش بيقدر وكان بطئ في كل حاجة ومكنش بيوفي بوعده مع بابا في المواعيد بتاعة الجواز وكانت حجته مره مش معاه فلوس ومره اخوه أخذ فلوسه بتاعت الجمعية من وراه كان داخلها معاه ومره في بينه وبين والده مشاكل ومن ضمنها كان ضارب والده وعمه ووالده طرده من البيت هو وأخوه ومامته واخته قعدوا 8 شهور بره البيت ورجعوا يوم موت والده وبعد العزاء بحوالي خمس أيام قالي مش هينفع نتجوز دلوقتي يأما لو عاوزه جواز يكون من غير فرح قولتله مش وقت الكلام ده دلوقتي، وبعدها بيوم حصلت بينا مشكله لأن جوز أختي مش راح يعزيه فخطيبي مكنش عاجبه وبابا وأخويا راحوا ال3 أيام كاملين، ومع ذلك والدي خلى زوج أختي راح يعزيه مرديش ينزل ليه ولا حتى يطلع ليه البيت يعزيه وزوج اختي مشى وروح وزعل جدًا بس مرديش يبين حاجة علشان انا وبابا منزعلش، وخطيبي قالي حتى لو جيه جاي بعدها بكام يوم؟
والسبب التاني من المشكله اني روحت بعد موته والده أول وتاني يوم بس ومقدرتش اروح اليوم الـ3 لاني فعلا تعبت من المجهود وكنت معاه بالتليفون، في حين ان خطيبة اخوه أصلا مراحتش غير بعدها بـ20 يوم والحجة انهم كانوا متخانقين ولا حتى أصلا اتصلت تعزي.
وعدت المواقف كلها واكتشف انه كذااااااااااااب وكل حاجة مفيهاش أي صراحه، وكنت انا بكتشف ده لانه قالي مش هينفع نتجوز علشان موت ابوه وبعدها بشهر اخوه اتجوز وعمل فرح وعرفت يوم الحنه بالصدفه واتخانقنا وقالي متزعليش انا مش بخبي بس جوازته غصب عننا كلنا لان مرات اخوه كانت حامل وكانت في السادس وكنت هسيبه لانه كذاب كذب كتير قوي في مواقف كتير ومكنش صريح بالمره ورجعنا تاني واتأسف انه غصب عنه وحددنا ميعاد الفرح ونزلنا نجيب العفش كالعاده واحنا بنجيب أي حاجة نتخانق طالما الموضوع فيه فلوس هو بيتلكك على أي حاجة انا أنا اتكلمت مع الراجل اللي في المحل فزعقلي وفرج عليا الناس كلها أختي الكبيرة كانت معانا -41سنه- وزعلت وانا كنت بسكت لأني مكنتش بحب ازعله أو اضايقه وبابا عرف اللي حصل واتضايق جدًا بس سكت، ونزلنا يوم تاني نتفرج برضوا على العفش زعقلي تاني بس المره دي بقى كانت قدام العمال وبابا وأختي ومعملش أي احترام ليهم خالص وروحنا بالعفش ومجبش عمال تطلعه (العمال خليت بيه وقفلوا الموبايلات) وطلعته انا واخواتي البنات وبابا وأخويا، واتصل بامه قالها تصحي اخوه يجي يشيل معانا قالتله مش راضي يقوم من النوم، ولما عاتبته اننا اتبهدلنا واخوه يعمل كده ليه وهو يزعقلي كده ليه وميحترمش بابا ولا يحترمني ليه كده، رد قالي مطلبتش منك تشيلي لا انتي ولا أهلك هو أنا طلبت من حد فيكوا يشيل؟
وقام قالي: أصلًا خسارة فيكي العفش اللى انا جيبهولك ده.
فقلتله انت بتندمني على أني بقف جنبك.
بابا رفض تمامًا ان المهزله دي تكمل ولا اني اكمل في الخطوبة دي لان اخرتها فشل ووافقت بابا وأخويا في رأيهم فخطيبي اتصل بـ بابا طلب هداياه وفلوس الهدايا والهدوم وكان مدي نقطه لجوز اختي طلبها (رغم اني قضى اليوم معاهم واكل شارب) بس متكسفش في طلباته وبابا قاله كل طلباتك موجودة لان سعادة بنتي مش بالفلوس.
صالحني بعد محايلات ورجعت ليه رغمًا عن أخي وبابا وكل أخواتي ومن بعدها معاملته لي بقت أسوء من الأول بكتير في كل حاجة حتى الكلمه مني مبقاش طايقها.
اكتشف انه لما بيتكلم لازم يتكلم وامه واخته والدنيا كلها جنبه ويسمعوا بيقول ايه، فشتكيت ليه انه مينفعش لازم يكون في خصوصيه اكتر من كده يقولي مجال الكلام عادي ايه المشكلة.
فمبقاش عندي ثقه ولا أمان تجاهه بقيت أحس أني هبقى في بيت الدنيا كلها هتبقى عارفه ايه بيحصل فيه وخصوصًا لما عرفت اني في حاجات بينا مامته واصحابه عرفينها (لان كل مره زعل يجيب واحد صاحبه) وعاتبته انكر كتير وكذب أكتر وفي الآخر قالي: هو انا كده وأسلوبي كده هو أنتي أصلًا مكمله معايا ليه؟ زهلت وسكت الجمله وجعتني قوي قلتله مكمله معاك علشان بحبك مكمله علشان وعدتي ألف مره انك هتتغير وانا عايشه معاك على الأمل ده.
كل ده عدى على وفاة والده سنه
حجزنا القاعة (عربون) فجه في نفس اليوم الشقه عليها إيجار 4 شهور ومش معايا فلوس أدفع هاخذ الغويشة بتاعة شبكتي يسدد الايجار وعربون القاعة. وبعد حجز القاعة جيه قالي مش معايا فلوس للفرح هاتي الغويشة التانية فقلتله لما انت مش معاك فلوس الفرح هتجيب باقي حاجات الشقة منين قالي ملكيش فيه دي بتاعتي ولما زعلت بابا قالي هديله فلوس الغويشة وهو وافق وقبلها بابا كان مديله 15 الف دفعهم مقدم الشقة لما اختها وهو سددهم بعدها بس انا اعترضت على اقتراح بابا في قصة الغويشة لاني حسيت اني مكسوره كل حاجة بابا اللي يعمله بابا ينزل يجيب حاجات الشقة بابا يتابع الصنايعية بابا يدبر امورة بابا يستحيل 4 سنين وهو متفق سنه ونصف سنتين بالكتير
قلتله لو انت عايز الغويشة تعال خذها قالي دي حاجتي وبتاعتي انا مش عاوز جمايل من حد ده فضلت خيري عليكي، بابا اضايق جدًا من الجمله ده واتقبل لخطيبي أي بصيص امل جوه بابا وخصوصا اخويا اللى خطيبي مش هاضمه لانه مش بيعرف يتعامل معاه لانه مش بيعرف يضحك عليه وهو الوحيد اللى بيحرجه بالكلام ويطلعه كذاب قدام نفسه وهما قاعدين لو في مشكله.
واخواتي كلهم قفلوا من ناحيته فطلب حاجته كلها برضوا وفلوسه وفلوس الـ 2 فستان اللي كان جايبهم والعدايا كلهم أصلا طلعوا 2500 جنيه اخويا قاله هدفعهملك لان الأمور الماديه بتروح وبتيجي وطلع الفلوس وادهاله خصوصا نقطه زوج اختي واخذها برده، ولما خطيبي روح البيت اتصل بابا قاله معلش يا حاج اصلي حسبت الحسبه غلط ولسه لي فلوس وامه تقول في التليفون خساره فيهم أي حاجة وكلام كتير وبيقول ليه 600 جنيه تاني رغم ان امه دي كنت بتصل بيها وبودها على طول خصوصا في المناسبات وهي عمرها ما اتصلت بينا أصلا.
والموضوع اتفركش في الاخر ورجع يتصل بابا تاني ويتأسف كتير وبابا وأخويا مش موافق نهائي وهو ما زال متسمك بيا وبيقول هو اتغير بالفعل ومش هيزعلني تاني (بابا واخويا عمرها ما هيجوا عليا ولا هيجبروني اني اكمل او لا القرار راجع لي والنصيحه منهم) وخايفه ارجع تاني تبقى حياتي وحشه وتكون كلها مشاكل ومش قادر اصدق لانه كل مره كان بيقول كده ومامته جاتلي وقالتلي ابني بيحبك وشاريكي ولما قولتلها لا هوش مش شاريني قالتلي متبهدل من غيرك لو هو محصلش فيه كده مكنش زماني قاعده هنا دلوقتي وقالت وبعدين لما هو وحش قعدتي معاه 3.5 سنين ليه.
هل ده عقابي لاني كملت كل ده معاه بيعاقبني هو ومامته كده انا بين نارين بين اني اكمل معاه على كده وانا خايفه ومش مصدقه وبين اني بحبه واني كنت هتجوز كمان كام يوم وحياتي اتهدمت كلها مره واحده.
آسفه جدًا إني طولت بس يعلم ربي كميه الحيره اللي انا فيها دلوقتي.

مشاكل وحلول ذات صلة

اضيف بتاريخ: Tuesday, November 6th, 2018 في 06:28

كلمات مشاكل وحلول: , , , , ,

5 رد to “فرحي كان خلال ايام والجوازة افتركشت”

  1. أحمد
    17/11/2018 at 00:13

    نصيحة مهما كنتي بتحبيه هما كلمتين متكملييش معاه واديني بحذرك هتندمي وربنا لازما تاخدي قرار من نفسك!

    قَـيّـم هذا الحل: Thumb up 0 Thumb down 0

  2. س
    06/11/2018 at 21:10

    يا اختي لما متبهدله البهدله دي كلها في الخطوبه اومال في زواجك هيحصل ايه بس وبعدين انتي ليه ما تختاري شريك حياتك علي اساس الدين والاخلاق وبتقولي كان علاقتة مع والده وحشه وبتقولي انه كذاب. كيف تقبلي تتزوجي بشخص كذاب والمؤمن لا يكذب. ثم بتحبي فيه ايه ده…ده لا رجوله ولا اخلاق ولا بيحترمك وفي الاخر قال يطالب باللي دفعوا من هدايا ونقوط طيب بالله هل هذا الشخص توافقي تتزوجيه!!! الخلاصه انصحك انك لا تتزوجيه ابداااا لانك لو اتزوجتيه هتروحي لابوكي في شهر العسل وثقي في ربنا انو هيعوضك باحسن منه وانا متاكد راي اخواتك ووالدك انه مش عوازينك تتزوجيه بس مش عاوزين يتدخلوا في الاختيار وانتي وعقلك

    قَـيّـم هذا الحل: Thumb up 0 Thumb down 0

  3. TueGk
    06/11/2018 at 17:46

    انا جتلي ضيقة تنفس من طول مشكلتك لذلك لم أقرأها، نزلت أقرأ الرد ، هل كتبتي رواية هنا ،

    قَـيّـم هذا الحل: Thumb up 0 Thumb down 0

  4. ابوالبتول
    06/11/2018 at 09:51

    انت شفت مسلسل -ام العروسة- والجملة التي كانت ترددها الفنانة الراحلة ملك الجمل -ياخيبتك ياخبيتك ياخيبتك- تنطبق عليك تماما مش عاوزك تزعل مني لاني زي بابا لكن يابنتي ربنا جعل لنا سمع وبصر وعقل وتفكير الحيوان ده ماينفعكيش ابدا ماعندوش ذرة من الرجولة ولا الاخلاق ولا الادب ولا الاحترام ولايقدر احد مالوش لزمه خالص مايغور في 600 داهية تاخذه هو واللي خلفوه اشتري سعادتك يابنتي واياك ان ترجع له مهما حصل لو كان اخر الرجاله في الدنيا دي انت زي القمر وخلاق وتربية وادب والف من يتمناكي ياست البنات ربنا بيكرمك بحسن منه مليون مرة المهم انك تسمع كلام ابوك ولاتخرجيش عن امره وربنا بيحبك ويريد الخير لك مع ابن الحلال الصالح اللي يستاهلك ويقدرك ويصونك ويسعدك

    قَـيّـم هذا الحل: Thumb up 0 Thumb down 0

  5. منة الله
    06/11/2018 at 06:32

    انا قريت مشكلتك للاخر وبقول هي مستنية ايه كل ده معاه منتظرة ايه من شخص زي ده *** و***
    كويس انك نفدتي بجلدك انتي اتكتبلك عمر جديد اوعي تفكري ترجعي تاني ده قليل الادب والاصل وكمان كل تصرفاته وقحة بزيادة
    وايه يزعقلك وانتو بتجيبو العفش ده كمان يعني متعمد يهينك
    بس ممكن يكون حاسس بالنقص وانه اقل منك بسبب تعليمه ومهنته والنوعية دي مفيش منها رجا لو استنيتي يتعدل بعدين ها تكوني خسرتي نفسك
    انتي طلعتي كسبانة انا بشوف ناس بتعاني بعد الجواز ولما بيحكو عن المواقف اللي حصلت ايام الخطوبة مثلا بتلاقيهم حاسين بالغباء لانه الجواب بيبان من عنوانه والشخصية الزبالة بتبان من الاول

    قَـيّـم هذا الحل: Thumb up 0 Thumb down 0

اترك رداً أو حلاً لهذه المشكلة