مشاكل الخطوبة

خطيبى عايزنى اسيب شغلى

خطيبى قالى سيبى شغلك وانا قلت ماشى بس رجعت كملت فيه لان ميعاد الزواج لم يتحدد بعد
ففضلت انى اكمل فى شغلى لحد اما اى حاجة تتحدد هو مش بيجهز حاجة ومقضيها سفر بيقول يروح يشتغل فى اى مكان غير البلد اللى احنا عايشين فيها
وانا السفر بالنسبة لى اوحش حاجة فى الدنيا مش عايزة فرقة كدا وطبعا مبيكلمنيش من يوم ما كملت فى شغلى الا قليل ولو كلمنى تبقى مكالمة نكد واقعد بعدها اعيط وانهار على الاخر
عرفت اهلى كل حاجة حصلت لانى تعبت من سوء المعاملة ليا
وكل كلامه كانه بيعاقبنى على اللى عملته فى حقه وانا مبقتش اسمع كلامه وهو مالوش لزمة دى الصورة اللى وصلته عنى
فى ملحوظة صغيرة.. انا مؤهلى التعليمى اعلى منه معرفش بقى تحكمه ده ناتج من احساسه انى اعلى منه فى التعليم
مع انى والله عمرى ما فكرت فى كدا ابدا انا اهم حاجة واحد يحافظ عليا ويتقى ربنا فيا وفى حياتنا سوا ان شاء الله مش مهم عندى التعليم لانه من ناحية الثقافة والدماغ ماشاء الله كويسة بس الفترة الاخيرة دى مشاكل دايما ويزعلنى ويقعد بالكام يوم ميكلمنيش ويرجع يكلمنى عادى كانه معملش اى حاجة وطبعا كلامى معاه بيكون عادى واقل كمان من العادى مش كلام مخطوبين
فى حاجة كمان … من يوم ما اتخطبنا وانا على طول حاسة انى مش فى دماغه مش بيشاركنى فى اى حاجة فى حياته اتصالاته بيا قليلة ممكن يقعد 3 ايام ميكلمنيش ومعرفش عنه اى حاجة نهائى … واوقات ان انا متصلتش بيه بنفسى ميتصلش ويقعد يتجحح باى حجة لا معييش رصيد معلش الشغل ونسيت اكلمك وهكذا بقى
الكلام ده فى الطبيعى بتاعه من غير زعل ولا حاجة لو فى زعل بقى ميكلمنيش الا بمزاجه ويتكلم ولا كان فى حاجة وانا اكون مخنوقة جدا ومبعرفش اتكلم الا لما اصفى الخنقة دى واعاتبه وهو طبعا مش عايز يسمع حاجة من دى ولا زعل ولا نكد ولا عتاب ويقولى مش كل اما اكلمك تقوليلى متصلتش بيا ليه
اللى اعرفه ان اى واحد خاطب واحدة يتصل يوميا او فى اليوم اكتر من مرة ولما ترجع من شغلها يتصل بيها ويطمن عليها كدا احسن منه بخوف عليا
الا عمرى ما حسيت انه كدا معايا
حاليا … انا مبلغة اهلى انى عايزة افسخ الخطوبة والدى مسافر وخطيبى حاليا برضو مسافر
قلت لوالدى انا مش مرتاحة ومش مبسوطة ولما يجى خلاص ننهى الموضوع ده مش على طول نكد كدا وانا مقتنعة بكدا
والدتى تقعد تقولى هو هيبقى كويس ومش عايزة حد يشمت فيكى ويقول انك متكبرة بحس انها خايفة مالقيش عرسان تانى
انا اساسا بحضر رسالة ماجيستير يعنى مش مهم اتجوز ولا لا اصلا عندى اكمل تعليمى افضل بكتير من انى اتجوز واحد بيتعامل كدا معايا
قولولى رايكوا ايه انا محتارة ؟؟ ولو فى اى اسئلة انا موجودة وشكرا جزيلا لكل حد هيساعدنى ويشاركنى مشكلتى 🙂

مشاكل وحلول ذات صلة

اضيف بتاريخ: Sunday, December 2nd, 2018 في 20:38

كلمات مشاكل وحلول: , , , , ,

ردود to “خطيبى عايزنى اسيب شغلى”

  1. hema
    03/12/2018 at 07:56

    الموضوع معقد ولكن القرار سيكون نابع منك انتى وفتره الخطوبه معموله للتعارف وان نشوف الشخص مناسب ولا لاء صلى استخاره وفكرى بعقلك قبل قلبك وربنا يوفقك ويلهمك الصواب يااارب

اترك رداً أو حلاً لهذه المشكلة