السلام عليكم ورحمة الله وبركاته
انا ام مصرية من دمياط و عندى 3 بنات ومنهم بنت عندها 20 سنة محيارنى حيرة كبيرة جدا واخواتها البنات الاثنين كويسين جدا بيصلو وبيسمعوا كلامى وابوهم متوفى من سنة تقريبا , بنتى بتمد ايديها على فلوس البيت وبتمد ايديها على الذهب بتاعى ومكنتش واخدة بالى لان البيت امان وانا مربياهم تربية كويسة وحالتنا ميسورة , واكتشفت اخيرا انها بتشرب سجاير وتقولى وفيها ايه لما اشرب سجاير حاولت قبل ذلك ان اكون صديقة ليها بس هى قفلت على نفسها خالص ومش بترضى تقولى اى حاجة وكل عمايلها سر وانا كبيرة فى السن ومريضة ومش عارفة اراقبها واعرف بتعمل ايه وانا ماليش حد لا عم ولا خال ليهم وابوها قبل ما يتوفى كان عارف انها بتمد ايديها على الفلوس ولاحظ ذلك وحبينا نقومها ونخليها كويسة بس رجعت تانى وبتجيب مكياج كتير ولبس وبكتشف حاجات زيادة فى دولابها عن مصروفها وكليتها بعيدة عننا فى محافظة تانية وبكدة هى مش قدام عينى ولو طلعتها من الكلية مستقبلها كدة هيضيع
اعمل ايه وانا محتارة وحالتى النفسية وحشة اوى ومش قادرة عليها وتبجح فيا وتعلى صوتها عليا وانا خايفة عليها جدااااا….
بالله عليكم قولولى اعمل ايه انا فى حيرة شديدة وببكى طول الليل ومش بعرف انام ….
مشاكل عائلية
الام الحائرة
اضيف بتاريخ: Tuesday, October 17th, 2017 في 17:55
كلمات مشاكل وحلول: بنات, بنت, دمياط
البنت محتاجة للزواج زوجيها وارتاحي وصدقينى البنت لما تعمل كدا يبقى متمردة وصعب التعامل معها مش عاوزك تمنيعها من الجامعة عشان لايضيع مستقبلها ولا تضربيها او تحرميها من مصروف او خلافه لالالا كدا غلط بيجعلها تتمادى في الغلط وربما تترك البيت وتنحرف وتضيع البنت المثل يقول – اذا كبر ابنك خاويه – اعتبريها زي اختك الصغيرة واجلسي وتكلمي معها بكل هدوء واعرفي منها ايه اللي مضايقها وليه بتعمل كده وعرفيها الحلال من الحرام والصح من الغلط وانكي حريصة عليها هي واخوتها الثانيين وتريدي الاطمنان عليهم قبل مايحصلك شي لاقدرالله ولوهي عاوزه تتزوج وفي احد في حياتها تقولك عليه هو مين ومين اهله وتسالواعنه وتتاكدوا من اخلاقه ومن اهله ولوكان كويس وابن حلال يتقدم لكم وده هو الصح البنت مالها الا الزواج فهو الستر والعفة لها في هذة الحياة