انا بنت وعندي 22 سنة وزني 50 وطولي 160 مخطوبة وفرحي بعد العيد واحنا دلوقتي 14/2/2023، اعاني من نحافة جسمي وخصوصًا منطقة الثدي، وتقريبًا كده اصلا معنديش ثدي هو بس بارز كده شوية وخلاص زي حجم ثدي البنت اللي عندها 12او 13سنة.
جربت ازود وزني بكل الطرق (أدوية. فاتح شهية. حقن. وصفات. تدليك. زيوت. مية ورد. نظام غذائي. كنت باكل من6 اللى 8 مرات في اليوم) جربت كل حاجة تتخيلوها ومفيش اي فايدة خالص.
ولما فقدت الامل دعيت وقولت يارب بس منطقة الثدي عندي هي اللي تكبر ومش عايزة حاجة تانية من الدنيا.
وفي مرة كانت عندنا واحدة صاحبتي ووزنها 70 كيلو، فعجبني جسمها اوي وقولتلها انا نفسي ابقي زيك وبالصدفة لقيتها بتقولي انا مرات عمي جربت خلطة زيوت كده بتتباع عند العطار وكانت نحيفه جدًا ولما استمرت عليها زودتها 5كيلو.
طبعا انا اتصدمت من الفرحة وعلى طول خدت رقم مرات عمها واتواصلت معاها وعرفت مين العطار ده، ورحتله بالرغم من انه كان في بلد غير بلدنا، وقولت هضحي بأي حاجة المهم نفسي ومصلحتي ولما روحتله قالي ان الزيت مش موجود وهيجيبوا بعد يومين او اسبوع قولتله ماشي اخدت رقمه وقالي او ما هجيب الزيت هعرفك عشان تيجي تاخديه.
والحمدلله انا دلوقتي عندي امل غير طبيعي في ربنا سبحانه وتعالى الأول ثم في الزيت ده .. ده غير كده عطاني تركيبة كده اعشاب متكونة من خرز الحياة ودي زيها زي خرز البقر والمفتقة المصرية. وعطاني اعشاب تانية مكملات غذائية ولزيادة الوزن وآخر حاجة عطاني الحلبة المحوجة اللي اسمها (ام غات)تقريبا.. المهم التركيبة دي قالي خوديها لحد ما اجبلك الزيت وأهم حاجة تستمري عليها لأن لازم يكون عندك صبر والاستعجال في الطريق ده بالذات مبينفعش وبيفقدلك الامل وبيخليني تمنعي كل حاجة كنتي بتعمليها وبالتالي مش هتزيدي وهتفضلي طول عمرك رفيعه ونحيفه ومحل تريقة وبس.. المهم انا دلوقتي بدأت امبارح اخد تركيبة الاعشاب دي وعندي امل في ربنا ومنتظرة الزيت لما ييجي وربنا يسهل😗❤
