هموم البنات

مش عايزين يرجعولى اختى

السلام عليكم انا مشكلتى غريبه جدا .. المشكله بدأت من 15 سنه اما امى ولدت اختى ولاده قيسريه وامى كان عندها القلب وتعبانه.

بعدين بابا اخد اختى وداها ع بيت جدى لان ماما كانت تعبانه فى المستشفى لحد اما تخف بعدين جم اصحاب خالتى واعجبوا باختى وقالوا لخالتى ايه رأيك ناخدها معانا لحد اما مامتها تخرج من المستشفى وخالتى وافقت وبعدين ماما خرجت من المستشفى وراحت ع البيت وفضلت فتره تعبانه وخفت وقالت لخالتى هاتى البنت من عند اصحابك وماما كانت عارفه ان البنت عند اصحاب خالتى وبعدين اما خالتى قالتلهم هاتوا البنت هما مش رضيوا يرجعوها وقالت لبابا ومارضيش يعمل حاجه راحت قالت لعمى ع الموضوع وراحوا القسم عملوا محضر وعملوا مشاكل واخدوا البنت بالعذاب.

وبعد سنتين امى اتوفت واختى كان عندها سنتين وانا واخويا كنا صغيرين وقتها .. وقبل ما امى تتوفى كانت وصيتها لبابا انه يخلى باله من البنت ومايرجعهاش للناس دى تانى.

وبعدين بابا قال انا مش هعرف اربى البنت وكفايه عليا انتوا الاتنين .. وراح ودى اختى عند خالة ماما قعدت عندهم فتره ورجعوها وعرفنا انهم كانوا بيضربوها ويلبسوها لبس مقطع وتسخن السكينه ع النار وتلسعها بيها وتحطلها اى اكل فى طبق ورغيف واحد وتاكل لوحدها والفلوس اللى بنبعتها ليها كانوا ياخدوها هما .. بعدين بابا ودى اختى عند اخته الصغيره قعدت معاها فتره وكانت بتعاملها كويس ورجعتها قالتله الناس بتكلم عليا لان هى جوزها متوفى وبيسألوها جبتى البنت دى من فين .. بعدين بابا ودى اختى عند اخوه قعدت فتره ورجعوها لينا قاله البنت عامله مشاكل مع ابنى الصغير .. وقال لاخوه التانى برضو ان ياخد البنت عنده قاله انا معايا الاولاد فى الثانوية عامة ومش هينفع اخدها .. وبابا ليه اخت تانيه دى بقى كانت واقفه تتفرج عليه وماقالتش ليه هات البنت اربيها انا .. وابو ماما كان متوفى لكن عم ماما عايش وبرضو كان واقف يتفرج .. وبعدين بابا ودى اختى عند بيت جدى وقال لتيته وخالاتى خدوا البنت عندكم وانا هبعتلها مصاريفها كل شهر وابقى ودوها الحضانه بعدين فضلت عندهم فتره وقرفوا منها وماكنوش عايزينها بعدين جم اصحاب خالتى وشافوا اختى راحوا قالولهم خلاص هاتوا البنت نربيها احنا وخالتى ماصدقت وعطيتها ليهم وبابا عرف الموضوع ده وسكت ماقالش حاجه وهما كانوا راجل وست ومعاهم 3 اولاد وبنتين كبار وبابا حبهم وبقوا زى اخواتوا واكتر لانهم طلعوا احسن من اخواته فى الوقت ده وبقى يبعتلها مصاريفها كل شهر ده غير الهدايا طبعا كمبيوتر وبلاى ستيشن وحاجات كتير علشان اختى تلعب عليهم هناك.

مع العلم ان الناس دى ناس بيئه وساكنين فى منطقه بيئه واسلوبهم بيئه وناس مش متحضره وجاهلين مش بيعرفوا يكتبوا اسمهم اصلا وغيره.

وفات ع الكلام ده سنين لحد اما اختى دخلت ابتدائى وكانت بتيجى تزورنا فى الاجازه تقعد معانا كام يوم وتمشى لان مدرستها وكل حاجه ليها هناك وكل اما تيجى كنا نقعد نكلم معاها احنا وبابا نقولها تعالى اقعدى معانا وتجيبى حاجتك ونحولك المدرسه توافق وتروح تطنش وهكذا كتير لحد مابقى عندها دلوقت 15 سنه .. واما نقول لبابا انه يجيب اختى تعيش معانا يقولنا هى مش راضيه تيجى وانا مش هجيبها غصب عنها هى المكان اللى مرتاحه فيه تقعد فيه .. واختى هتيجى تعيش معانا ازاى وهى اتعودت عليهم وبقيت بتقول للراجل والست دول يابابا وياماما واعتبرت اولادهم اخواتها الكبار.

وكانت اختى اما تيجى تقعد معانا تفضل تحكيلنا ع الناس دى واللى بيعملوه معاها تقولنا ان الفلوس اللى بنبعتها ليها هما بيخنصروا منها والست اللى هناك كل شويه تزعق فيها وتضربها وبتخليها تشتغل فى البيت لان بناتها اتجوزوا وكل واحده راحت بيتها وبتعامل احفادها احسن من اختى طبعا بس برضو مش هنكر برغم كل ده انها بتعامل اختى كويس شويه.

وكمان عرفنا من اختى ان سبب رفضها انها تيجى تعيش معانا ان هى بتبقى موافقه وهما اللى بيرفضوا انها تيجى تعيش معانا واما واجهناهم بالكلام ده انكروا وقالوا ان احنا موافقين وهى اللى رافضه ومابقيتش عارفه مين فيهم الكذاب .. والست دى قالت لخالتى قبل كده بقى انا اربيها واكبرها واخليها عروسه واتعب فيها ويجى هما ياخدوها ع الجاهز والام اللى ربت مش اللى خلفت وكمان الست دى صعبه ومش ساهله ومن الستات اللى هى بتردح دى وكمان عرفت انها هتجوزها لحد من قرايبهم يعنى هتديها الدبلوم وتقعدها فى البيت وتجوزها وحتى لو جابت مجموع يدخلها مدارس ثانوى استحاله طبعا هتدخلها ثانوى لانها عايزه مذاكره ومصاريفها كتير وهى عايزاها تخدم يعنى من الاخر كده اختى مش راجعه خالص.

والسنه دى اختى فى 3 اعدادى وجيبنا النتيجه بتاعتها ولقيناها جايبه ملاحق اتصدمنا لاننا كنا بنطمن عليها ايام الامتحانات كانت تقولنا انها بتذاكر كانت بتكذب علينا يعنى واما واجهناها اتصدمنا من رد فعلها قالت لينا وانا هعمل ايه يعنى وايوه ماكنتش بذاكر وهبقى اعوضها الترم التانى وقولنا ليها خلاص تعالى اقعدى معانا ونذاكرلك ونديكى دروس فى كل المواد علشان تدخلى ثانويه عامه رفضت واما قولنا للى عندها فى البيت ازاى اختنا تجيب ملاحق قالوا لينا خلاص احنا نقعدها فى البيت احسن مادام هى فشلت كده وبيتحكموا فيها وقضوا ع مستقبلها ونكلمها ع الفيس مش بترد علينا وانا واخويا زعلنا اوى منها واتخانقنا مع بابا بسبب الملاحق اللى جابتها وقالنا وايه يعنى تبقى تعوضها الدور التانى لان انا واخويا فى كليات قمه دلوقت ومايرضيناش ان اختنا تبقى فاشله كده.

مابقيتش احس انها اختى خصوصا انها اخدت طبعهم وبقيت زيهم بالظبط بقيت لهجتها زيهم وكذابه وبتحلف كذب وبتكرهنا زيهم (لانهم بيكرهونى انا وامى خصوصا لانى دايما اتخانق معاهم) وقسوها من ناحيتنا وبقيت خبيثه ولئيمه وبتلف وتدور علينا وبقيت فاشله فى التعليم وبتجيب ملاحق زيهم.

مابقيتش عارفه مين سبب المشكله اللى احنا فيها دلوقت والذنب ذنب مين بابا اللى غلطان لانه كان عارف اللى حصل وساكت وموافق عليه ولا خلاتى هما اللى غلطانين لانهم وافقوا يدوا اختى لاصحابهم ولا هما الاتنين غلطانين.

مابقيتش عارفه هما ياترى ناس كويسه وفعلا بيحبوها علشان اخدوها ربوها ووقفوا جنب بابا فى وقت كانت الناس كلها اتخلت عنه ولا هما ناس مش كويسه وبيحبوها علشان مصلحتهم لانهم مشغلينها خدامه ومستفيدين منها ومن الفلوس والهدايا اللى بتيجى من وراها.

واما كبرنا انا واخويا وفهمنا كل حاجه وبعد مابابا كان خاصم اخواته كلهم وقسانا من ناحيتهم زمان لانهم ما اخدوش اختنا الصغيره يربوها عرفنا دلوقت ان اهله هو واهل ماما مش غلطانين هو اللى غلطان وليه انت عايز تخلى الناس تربى بنتك طيب ماتربيها انت وازاى البنت تقعد مع ناس غريبه ومعاهم اولاد كبار ويجوزوا ليها شرعا والناس كده هتكلم علينا وعليها وتبقى سمعتها وحشه وممكن اى ولد منهم يعمل معاها اى حاجه مش كويسه وازاى انت تتحمل ان بنتك ماتبقاش عايشه معاك وعايشه بعيده عنك وترمى عرضك ولحمك كده وكل شويه نتخانق معاه بسبب الموضوع ده وبرضو ولا بيهمه حاجه وبيجى فى صفهم هما ضدنا احنا واخواته هو وخلاتى اللى هما اصلا سبب المشكله كل اما يكلمونا يقولوا لينا روحوا طيب هاتوا بنتكم دى الاول والناس اكلت وشنا وبقيت بتكسف اقول لاصحابى ان اختى عايشه عند ناس غريبه وكل يوم ببكى ع اختى ونفسيتى تعبت وجانى اكتئاب وبقيت بحسد اى واحده صاحبتى معاها اخت.

انا مش عارفه اعمل ايه وارجع اختى ازاى والله فكرت كتير انى اروح القسم اعمل محضر وارجع اختى بس انا هقولهم ايه وخايفه من رد فعل بابا ده ممكن يرجعها ليهم تانى او يتبرى مننا او يسيبلنا البيت ويمشى اتوقع اى حاجه منه قولولى اتصرف ازاى فى المشكله دى وازاى اقنع اختى وبابا والناس دى انها تيجى تعيش معانا وشكرا جزيلا وبارك الله فيكم.

مشاكل وحلول ذات صلة

اضيف بتاريخ: Sunday, June 30th, 2019 في 12:34

كلمات مشاكل وحلول: , , , ,

3 رد to “مش عايزين يرجعولى اختى”

  1. sarah
    03/07/2019 at 20:29

    بأمانه بأمانه … أبوكى عايز ضرب الجزمه … بس خلاص

  2. Peace
    03/07/2019 at 11:11

    في البداية حساب والدك عسير عند ربنا ودي غلطه عمره اللي لا يمكن تغتفر..بدل ما كان يسيب لحمه للناس كان اتجوز واحده تلمكم حواليها.المهم حلك الوحيد تبداي إنتي واخوكي تحببوها فيكم يعني تعزموها على اي مناسبه تجيبولها هدايا تحاولوا تخلوها قدام عنيكوا وتشغلوها من غير ما تحس وخليكي سرها قربي منها وما تعلقيش على طريقه كلامها أو لبسها خليها تحس إنها عايزه تتغير شوفي إيه اللي بتحبه حسسيها بالأمان واستحمليها.خلي بالك هتعاني كتير أوي أوي أوي.وبلاش يأس خالص وانشاء الله ربنا هيكرمك وهتقدري ترجعيها كله بالصبر ما تستعجليش الموضوع كبير بس مش كبير على ربنا.وربنا يوفقك للصالح.

  3. عمر
    01/07/2019 at 15:45

    أختك لو جت عاشت معاكم هتعيشوا تعانوا من المشاكل اللى هى هتتسبب لكم فيها لانها تربت فى بيت ناس مش كويسين وزى ما بتقولى اخدت طبعهم وهتندموا انكم جبتوها تعيش معاكم…انسى وعيشى حياتك

اترك رداً أو حلاً لهذه المشكلة