السلام عليكم انا بنت مكتوب كتابى على شخص رائع فى كل حاجة بيحبنى فوق الوصف وبيحترمنى ومش بيفرض عليا اى وضع هو من اسرة مرتاحة ماديا وكلهم بيشتغلوا فى الخارج واجهته صعوبة فى العمل فى السنة الاولى من الخطوبة ودلوقتى جاله عقد عمل رائع هناك فى البلد الى اهله فيها وسافر خلاص وربنا كرمنا الحمد لله عندى مشكلة اخوه ومراته عايشين هناك مع حمايا وحماتى فى نفس الشقة بغرض التوفير وكده لان السكن غالى هناك وهو عاوز ناخد شقة اوسع ونقعد فيها كلنا.
اهله ناس كويسين فوق الوصف وبيحبونى جدا وانا بحبهم اوى وبحب اخوه وسلفتى اوى وهما كويسين معايا جدا بس انا مش قادرة اتقبل الفكرة دى لانى حاسة ان حريتى ها تكون متقيدة ومش هاقدر اخد راحتى وكمان سلفتى لما اتكلمت معاها عرفت انها بتعانى من مشكلى الحرية بس غير كده هما كويسين اوى معاها.
انا مش عارفة اعمل ايه اوافق على الوضع ده مؤقتا فى الاول ولا ارفض انا مش عاوزة اعيش معاهم فى نفس البيت خالص بس والله مش هاقصر معاهم ابدا انا هاشيله واشيلهم فوق راسى انا اتكلمت معاه قبل كده وقولنا نسيب الموضوع لوقته ودلوقتى لازم نتكلم لانى سمعت ان باباه بيدور على شقة اوسع ومش عاوزاهم يتدبسوا فى شقة اغلى وبعد كده مش نقعد معاهم كمان حسيت من سلفتى انها متقيدة من وجود جوزى معاهم دلوقتى بالرغم من انها بتعزه جدا عرفونى اقنعه ازاى من غير مازعله هو او اهله لانه بيحبه وبحبهم اوووووى علما بانه مشغول جدا فى شغله الايام دى لانه لسه بقاله فترة كبيرة هناك ولازم يثبت نفسه ولازم فى نفس الوقت الحق قبل مايلاقوا شقة تانية لان انا جوزى مش بيركز اوى يعنى مش هاياخد فى باله حكاية انهم يتدبسوا فى شقة وكده ياريت تفيدونى واسفة على الاطالة
