انا بنت عندى 26 سنه .. مريت بقصه حب قبل كده كانت فيها تضحيه من عندى رهيبه وهو كان انسان مش كويس بمعنى الكلمه … المهم قربت من ربنا وبقيت احسن ونسيته .. دلوقتى انا اتعرفت على واحد عن طريق النت وشوفته وشافنى واتعلق بيه هو حد محترم مطلبشى منى حاجه وحشه . بس انا مش مشدوده ليه ومش فى قبول اوى بس بحاول افهمه وبحس ساعات انه مش زى ولا فيه من نفس روحى ومش بيغير ولما خرجنا انا اللى بتعامل مع الناس هو مش بيعرف يتعامل مع حد .. ووقت ما بدات اتشدله واصرحله قالى ظروفى صعبه ومتعلقيش نفسك بيه ده بعدنى عنه جامد خلال فتره البعد ديه اتعرفت بشاب عن طريق النت مصرى فى امريكا شدنى ليه جدا بسبب ان دماغنا واحده اتكلمنا مع بعض بالمايك حسه انه فاهمنى ومتقربلى وبطبيعه الحال باميركا فى انفتاح هو قالى انا عاوز اتجوز بنت مصريه هو بيغير وبيفرض اسلوبه فى الكلام مش بيخلينى اخرج الا لما بيعرف كل حاجه عنى .. مهتم بيه جدا والمفروض انه هينزل شهر 10 بس المشكله هو احنا ساعات بنتكلم براحتنا فى كل حاجه وقالى انا عاوز واحده تبقى فاهمه طباعى فى كل حاجه وتكون دماغها زى واحنا مش صغيرين .. هو مطلبش حاجه وحشه منى وهو طلب انى يشوفنى بس مره على الكام وانا رفضت هو شاف صورى وانا كمان شوفته .. بس انا ساعات بتصور بشعرى وبفستان واوريهوله وهو بيبقى مبسوط حتى فى مره قالى بلاش تتصورى باى حاجه قبيحه او مش حلوه .. لانى عاوز احافظ عليكى .. انا مشدوده ليه اوى وحاباه بس خايفه يبقى حد وحش .. وفى نفس الوقت الولد الاولانى عاوز يتقدملى دلوقتى ورجعلى تانى.. وانا نفسى اتجوز بس اكون مرتاحه للشخص اللى هتجوزه ومتقبلاه لانى صعب احب اوى بعد ما مريت بحبى الاول بس انا مش عندى ثقه فى اى حب وخايفه قولولى اعمل ايه
انت على طول اي واحد تتعرفي عليه تشدي له وده غلط كبير هكون صريح معك جدااي علاقة من خلال النت تكون غيرصادقة ومحكوم عليها بالفشل لازم تعرفي الشئ ده انت عاوزه الزواج ونفسكي فيه مش كدا يبقى بطريق اخر من خلال الاهل دي نصيحتي لك يابنت الناس واحذرك من النت فكل البلاوي والمصايب جايه منه واغلب الشباب اللي تكلمي معهم كدابين وغير صادقين في كلامهم وعايزين التسلية وضياع الوقت ليس الا ربنا يسترعليكي ويكرمكي بابن الحلال اللي يستاهلكي
بالنسبة للشخص الي بيقول انه في امريكا فاقطع علاقتك به لأنه غالبية الي بيقولوا كده على النت مذابين وغرضهم الجنس وحيقعد يقول لك نتكلم في كده لحدماتلاقي نفسك بتعصي ربنا واول معصية صورك بلاحجاب وربما جرك للكلام عن المعاشرة وتلاقيه لا في امريكا ولا حاجة،،بدليل لو طلبت منه رقمه في امريكا وقلت له رن علي حيتهرب،،استخير ربنا في الأول وخليه يتقدم واذا فيه الخير ربنا حيتمم لك،،الحب الحقيقي يأتي بعدالزواج
شوفي في مثل بيقول – خذ اللي يحبك ولاتاخذ اللي تحبو انت- لذا انصحك باختيار الشاب الاولاني طالما انه عاوزك وجاد في التقدم لك والارتباط ومحترم جدا وشاريك بالغالي اما الشاب الثاني اللي في امريكا فده شاب منفتح ومتحرر بحكم العيشة هناك ومش بعيد تلاقيه عندو علاقات مع بنات وستات بعدد شعر راسك ولاافضله لك ولن تكوني سعيدة او مرتاحة معو وصدقينى الحب الحقيقي ياتي بعد الزواج وليس قبله اتمنى انك تحسن الاختيار لشريك حياتك وربنا يؤفقك ويسعدك