السلام عليكم اولا كل سنة وانتم طيبين وانا عندى 21 سنة وشوية انا هكتب مشكلتى وهى مش مشكلة بمعنى الكلمة بس عاوزة حل يرضى الله ورسولة فيها انا اولا كنت مرتبطة بواحد لمدة 3 سنين وبعلم اهلى وكان الموضوع رايح لطريق الخطوبة والزواج من اول يوم ارتباط بس محصلش نصيب وسبتو بعد معاناة ودخول مستشفى وصدمة نفسية ومكدبش عليكو يعنى فية حب شوية فى قلبى من نحيتو لحد الان مع انى ليا سنة بحاول انى انساة و زهقت طبعا من الوحدة والفراغ العاطفى وربنا مأرداش ليا ان اتخطب اى خطوبة فيها مشاكل ومتمش ومن حوالى شهرين دخلت النت واتعرفت على واحد هو مصرى ومن بلدى بس بيشتغل فى احدى الدول العربية واتعرفنا والكلام جاب بعضو ومرة فى مرة فجأة لقيتو بيقولى انو بيحبنى وعاوز يخطبنى لما ينزل الاجازة قولتو ازاى وكدة هو انت عارفنى فى الحقيقة قالى انا شوفت صورك واتعاملت معاكى وبجد بحمد ربنا انو بعتلى الهدية دى واد اية انتى جميلة ومحترمة وبنت ناس وانى عملة نادرة ادامو على حد كلامو و انى محترمة وهو مش لاقى ادامو اى بنات محترمة وانو شاف اشكال والوان وقالى انتى مش حاسة بنفسك انتى ممكن تقفى ادام المراية تشوفى اد اية انتى جميلة لاكن مش هتشوفى اد اية انتى محترمة ال ادامك هو ال يشوف دة وقالى وانا بصراحة مش هفرط فى واحدة بالمنظر دة جمال واحترام وادب وتربية اازاى انتى متعرفيش الراجل بيدور على الادب قبل الجمال بيدور على الست ال يسبها فى بيتو ويبقى عارف انها صيناة وانا فى الاول قولت دى اشتغالة والكلام ببلاش وانو زى ذئاب النت عاوز ينهش فيا وسبتو يتكلم ولما خلص طلعت ولا كأنى سمعت حاجة دخلت بعدها بكام يوم لقيتو سايب رسايل كتير اوى وبيقولى انو نازل مصر الاجازة بتاعتو كام شهر وكدة وقالى على معاد نزولو المهم لما نزل اتكلمنا تانى قالى بجد انا بحبك ولمست فيكى حاجات حلوة اوى وطمعان انك تكونى مراتى وام ولادى ولازم اقابلك بجد انا طبعا عاقلة ومتربية واستحالة اقابل حد معرفوش وخصوصا انى عرفاة من على النت سبتو يتكلم عشان مش يقعد يزن على دماغى انو يقابلى وفى يوم قالى انا عارف انك شاكة فيا وانك ندمانة اننا عرفنا بعض من على النت وانك هتقولى انى ابن حرام وعاوز اضحك عليكى ولا اعمل فيكى حاجة قالى انا هثبتلك حسن نيتى ولقيتو بعتلى دعوة كام انا رفضتها كذا مرة وقعد يتحايل عليا انى اقبل وقالى متخافيش انتى بنت وانا عندى ولايا وبنات اخوات وكما تدين تدان وكدة ولقيتو لما فتحت الكام لقيتو بيورينى تذكرتو ال نزل بيها وبطاقتو الشخصية ال فيها الاسم الرباعى والفيزا بتاعتو ورخص السواقة وحتى ادانى كل نمرو ونمر البيت بتاعتو وقالى اكشفى عنها وشوفى انا قولتك اسمى صح ولا غلط وفعلا كشفت ولقيت كل كلمة قالها صح وقالى انا عن نفسى بحبك ونسيت انى اعرفك من على النت ونفسى انتى كمان تنسى عشان نعرف نعيش حياتنا وقالى لازم اشوفك وكدة وانا لحد امبارح وانا رافضة لحد لما لقيتو بيقولى امبارح اانا بجد زهقت ومش عارف اعيش من غيرك وبجد حبيتك وربنا يعلم انا مش عاوز اشوفك ولا هستنى اصلا لحد لما اقابلك برة انا جاى اخطبك من بباكى وهحاول اقنعو وانا سايبلك حرية الاختيار لانك لازم ال هتجوزية تكونى بتحبية عشان انا مقبلش ان مراتى متكنش بتحبنى لان انا ال هتضر مش هيا وبيقعد يحكيلى كل حاجة ويقولى كلام من القرأن وبنسى الوقت معاة بجد
انا مش عارفة اصدقو ولا ولا انا مش مصدقاة اوى لكذا حاجة الاول انى عرفاة من النت وانا شايفة القصص هنا ان بتوع النت شياطين وبيضحكو على البنات ولو اتجوزو بيطلقوا وانا هموت لو اتجوزت واطلقت انا نفسى وزى اى بنت احب واتجوز واستقر واخلص لزوجى واعاملة بما يرضى الله وثانيا انو من محافظة بعيدة عنى شوية وثالثا انو عارف انى كنت مرتبطة قبل كدة لانى انا ال حكتلو فى الاول على سبيل انو صديق وبيساعدنى المشكلة انى حساة كويس جدا ولو اتقدملى فى الحقيقة من غير معرفو على النت كنت هوافق علية بس حكاية النت دى مسببالى عقدة لانى بخاف من شباب النت اوى وخايفة اخد مقلب يكون تمنو سمعتى ولا شرفى وهو لما اكون مضايقة بيفضل ورايا لحد لما يخرجنى مل انا فية وبيعرف يضحكنى ودايما بيسأل عنى كل يوم وعلطول ولما اعمل انى مش هدخل النت واقولو هتدخل يقولى لا هدخل لمين وفعلا ادخل مستخبية الاقية مش داخل انا يجماعة خايفة من النت دة اية رايكو اوافق واقرب منو واتخطبلو ولا اطنش وللعلم انى موصلتش لدرجة انى احبو يعنى لو طنشت يومين وهبقى عادى مجرد تعلق بحد معين وانى فى فراغ عاطفى وانى عاوزة انسى ال بحبو وخلاص بس لو هو صادق انا عارفة انى هحبو
سورى انى طولت عليكو بس كان لازم اوريكو الموضوع من كل جوانبو عشان تحكمو صح وياريت رد بجد كأنى اختكو واى رد انا هنفذو مهما كان اية خصوصا لل لهم تجارب مع بتوع النت وشكرا جد للى هيرد والسلام عليكم
الحب على النت
اوافق واقرب منو واتخطبلو ولا اطنش
اضيف بتاريخ: Tuesday, May 22nd, 2018 في 23:42
كلمات مشاكل وحلول: الخطوبة, الزواج, النت, بنات, بنت, زواج, مصر
النت مو الا وسيلة للتعارف المهم النوايا تكون صادقة وطالما انو الشاب صادق معك وجاد في ارتباطه بك خليه يجي حسب الاصول ويطلبك من اهلك بدون ماتقابليه خارج البيت او تتكلمي معاه وابوك يسال عن الشاب واهله واللي فيه الخير ربنا يقدمه لكم بس عايزك تكون حذرة منه وماتتساهل في الكلام معو او تبعث له صور او رسائل كلدي تصرفات محرمة وغير اخلاقية تقع فيها البنت وتندم عليها وربنا يسترعليك ويؤفقك
والله انك عبيطة وساذجة جدا ومن السهل احد يضحك عليك ماتزعليش مني دي الحقيقة كل اللي قاله هذا الشاب لك اكاذيب وخداع واي علاقة تكون من خلال النت غير صحيحة ولاصادقة ومصيرها الفشل السريع يابنت الناس فوقي لروحك بلاش عبط وهبل بتاعك واقطعي علاقتك بهذا السافل الكذاب المخادع واياك والرد على رسائله او اتصالاته عليك حافظي على دينك وخلاقك وشرفك وسمعة اهلك وكرامتهم وثقتهم فيك واياك والتفريط فيها مهما كانت الظروف سوف تذكرينا كلامي ده وتقولي ياليتني سمعته وعملت به اصبري وسوف يكرمك الله بالنصيب مع ابن الحلال اللي يستاهلك ويطرق بابك وتلاقي معو كل الخير والسعادة والرضا والاستقرار طوال عمرك ربي يصلحك ويهديك ويسترعليك انت وكل بنات المسلمين جميعا ويكفيكم شر ولاد الحرام وشياطين الانس
أولا صل استخارة،،ثانيا يجي يدق البيت من بابه ويطلبك من أبوك بدون ماتقابليه خارج البيت، لو عمل كده يبقى مبدئيا أثبت حسن نيته والباقي حيبان خلال فترة الخطوبة،،وكمان أبوك حيسأل عليه بعد مايتقدم لك،،لو ماعملش كده انسيه واقطع علاقتك به