مشكلتى انى اتعرفت على شاب من النت حبيتة جدا وهوا قال انة حبنى واترفنا على بعض اكتر وشاركتة حياتة واستحملت معاة كتير لانة كان عصبى جدا وكان بيعرف بنات كتير حاولت اخلية يقرب من ربنا ومهما اتعصب بسكت ولما بيهدا برجع اكلمة واصالحة ولكنى مش غلطانة وجيت على نفسى كتير وعرفت انة بيخونى كتير ويسيبنى وارجعلة لانى كنت بحبة وفضلت معاة سنة ونص على دة وهواول حب فى حياتى وهوا عارف دة وكنت بخاف علية لو غاب يومين بقلق وبحس بروحى بتروح كان بيضايق اوى لما بخاف علية وبقلق واوقات يتشاكل معايا وخلانى اعيط كتير لانة كان اوقات كتير بيهملنى ويروح يكلم غيرى واعرف وبرضة برجعلة وفضلت جمبة فى كل مشاكلة وقولتة عمرى ماهسيبك والفترة دى اتقدم ليا ناس كتير وكان مناسبين جدا بس رفضت علشانة ومرة قولتة فى واحد جايلى ومصممين علية فى البيت قالى وافقى انا عندى مشاكل قولتة مش هقدر ابعد عنك وانا جمبك وهعمل المسستحيل علشان اكون معاك وكنت بفضل استناة طول اليوم علشان نتكلم واطمن علية رغم انة كان بيضايق لما بقولة اعمل كذا يعنى اكلت ولا لاء تقل هدومك لو فى برد ويعملها معايا مشكلة وكنت بستحمل وكان ولا حاجة لما يكلمنى تانى مجرد كلمة منة بنسى اى حاجة وفى يوم قالى انا كلمت بابا وماما عليكى وانا كلمت ماماتة واخواتة واخدوا معاد فى البيت علشان يتعرفوا على اهلى مكنتش مصدقة وفرحت جدا حسيت ان حلم حياتى هيتحقق وانى هاخد الى بحبة ومقدرش اوصفلكوا فرحتى اد اية وسالتة يويمها قولتة اية خلاك تقرر مرة واحدة كدة قالى فكرت ان مافيش واحدة استحملتى ادك وانتى الى هتنفعى تكونى شريكة حياتى بس حسيت انة مش مبسوط اوى وكان قلقان حتى اقولة مالك يقولى مافيش حياة جديدة وكدة ولما اهلوا جم البيت قبلناهم كويس جدا ومامتة واختة كانوا فرحانين بيا وانتى خلاص بتعتنا بس باباة حسيت انة مش فرحان اوى بس قولت يمكن عادى ومشوا وانا كلمتة وحكيتوا على الى حصل قالى لما يرجعوا واكلمهم واعرف الاخبار كنت فرحانة وبدعى من كل قلبى انة يتحقق وخلاص غاب عنى يومين وفضلت اتصل ميردش او يدخل نت لانة مش موجود فى مصر هوا فى بلد تانية وفى يوم لقيتة موجود نت قولتة قلقتنى فى اية طمنى ميردش بعدها بساعتينه رد وقالى كل شىء قسمة ونصيب قولتة ازاى ولية حصل اية اية السبب مرداش يرد وعملى بلوك على ارقامة وكل حاجة اوصلوا بيها وكلمتة من رقم غريب بعدها بيومين قولتة قول السبب وانا هبعد عن طريقك بس اعرف احنا الى بينا كبير اوى قالى بصراحة انا محرج قالو اننا مش لايقين على بعض وانك مليانة قولتة ما انت عارف انى تخينة وبخس لان تخنت من اعدة البيت بعد ماسبت الشغل وقال كمان انى انا طويل عليكى قولتة ما انت الى طويل وعايزنى يعنى نخلة قولتة دى حاجات خارجية انت ماقولتهمش انى بحبها ودى الى مستريح معاها واختارتها رضيت بكلامهم ودة حاجة خارجية رغم انى مش تخينة اوى متوسطة وجميلة ومتدينة الحمد لله وحاولت اقولة انا بخس وانت لما تنزل بعد 3 شهور هتلاقينى خسيت جامد ويشوفونى تانى مدام رفضهم للشكل بس رغم انة ماماتة واحنا اعدين قالتلى متخسيش اوى شوية صغيرين انتى جميلة احلى من الصور وكانت فرحانة اوى بيا وهوا قالى انا بحب الجسم دة مش مشكلة متخسيش ايام لما كنا بنتكلم زمان وقولتة ادينى فرصة وهخس انا بحبك اوى ومش هقدر ابعد متكسرش فرحتى قالى اسف وكلمنى بكل برود وغرور وقفل فى وشى وبعد وقالى لو كلمتينى هقول لاهلك انك كلمتينى وانا بعدت بس انا كدة اتظلمت ؟ وباعنى ومحاولش يعمل اى حاجة علشانى ولا انتوا رايكوا اية لانة قال انا عملت الى عليا واتقدمت ومحصلش نصيب كاننا مكناش بينا عشرة وحب وعارفنى كويس سابنى وباعنى وظلمنى صح ولا هوا راية الى صح حد يفيدنى
بصراحة انا حاسة انه كان عايز يخلص منك وملقاش غير طريفة ان اهله يجوا البيت عشان يكون عمل اللي عليه وبعدين يقول انهم رفضوا وفعلا شكل الرفض منه هو مش منهم
من رائي انك موهومه وان الحب من طرف واحد ده مستهتر فيكي وبيجرحك وعصبي وكل ده قبل الخطوبه امال لما يبقالو كلمه عليكي هيعمل ايه بقي ربنا يسعدك مع ابن حلال ميقولش بابا وقلي وجسمك والتلاكيك الفارغه دي وعاوزه اديكي فكره عن الحب الحقيقي فيه تسامح ورضا وقبول وحاجات كتير هتعرفيها لما تقابلي واحد بيحبك بجد هتقولي هو ده بقي الحب وياريت تقلي من الكلام والتعارف علي النت يمكن صقتي من نظره لما ادلقتي عليه وسامحتيه كتير
شوفي ياقمر الوادده من الاول ماكانش نافع لك لماعرفتي انه بتاع بنات ويتكلم معهن وكان الاجدربك انت قطع العلاقةمعه من البداية واحمدي الله انك عرفتي حقيقته قبل فوات الاوان عمره ماكان يستاهلك ابدا ومسالةانك تخينة وهوطويل دي كلهاحجج واهية علشان مايرتبط بك خليه يغورفي داهيةهوواهله وربنايعوض صبرك خير ويكرمك بالزوج الصالح اللي يخاف الله فيك ويقدرك ويسعدك وتلاقي معه الاستقرار وراحةالبال
السلام عليكم _ من البدايه الارتباط غلط .. ازاى عارفه انه بيكلم بنات وعادى بالنسبه لكى .. فين الغيره اللى عندك حتى لو بتحبيه .. التجاوز عن الحد مرفوض .. ولو تم الامر بالزواج وكلم غيرك او مشى مع غيرك هيقولك ( طب ما انتى عارفه نظامى ما تتكلميش ولا كلمه ) اللى بيحب انسانه بيخلص لها.. ونصيبك لسه لم يأت بعد ..
احمدى ربنا انك خلصتى منه لانه لو اتجوزتوا كان هيبعك فى اول محطه
شوفي يابنتي اناحاس فيك ومتالم لكل اللي جري لك من الوادالسافل المنحط اللي مايستاهل ظفرك ولايستحق انويكن بني ادم ابدا احمدي الله انوخلصك منو على خير وعرفتي حقيقته الوسخة بصي لنفسك وارمي الماضي وراءظهرك وانت بنت متربيةوجميلةوالف مين يتمناك ياقمر والله بينتقم لك منو وبياخدلك حقك من اللي ظلمك واتمنى لك الخيروالسعادةمن كل قلبي وان الله يرزقك بالراجل اللي يقدرك ويستاهلك
السلام عليكم … يا اختي احمدي ربك انك ما تزوجتيه و طلقتي … قال الله تعالى: وَعَسَى أَن تَكْرَهُواْ شَيْئًا وَهُوَ خَيْرٌ لَّكُمْ وَعَسَى أَن تُحِبُّواْ شَيْئًا وَهُوَ شَرٌّ لَّكُمْ وَاللّهُ يَعْلَمُ وَأَنتُمْ لاَ تَعْلَمُونَ {البقرة:216}
يا ماما مينفعش كده .. ده واحد بباه بيتحكم فيه والحمد لله ان ربنا رحمك من واحد مليهوش شخصيه وسطحى ..لازم تبقى قويه وثقتك بنفسك متتهزش ..وحاولى تاخدى من الموقف ده دفعه وطاقه عشان تجملى نفسك ..معلش كلنا فينا عيوب ومش كاملين ..يعنى مثلا تخينه حبه اروح احاول اخس ..واوعى لو اتخطبتى تانى او حبيتى ولد تتكلمى ماه كلام خارج او غيره حتى لو هو طلب ده ..ربنا يا رب يكرمك ويسعدك يا رب
هقولك علي حاجه متعليش مني ده انسان ندل ومش يستاهل اي زعل منك … وبعدين هو ابوه اللي هيتحوزك ولا هو … دي حجج فاضيه واوهام … سيبك منه واوعي تزعلي عليه ابدا مهما حصل وان شاء الله ربنا هيعوضك كل خير ياقمر … مع تمنياتي بكل سعاده وهناء في حياتك المقبله
اولا الارتباط قسمة ونصيب ودى حاجات بتاعت ربنا وتخينة ورفيعة وغيره دا كله كلام فارغ ومظاهر بتتغير مع الزمن انما اللى مش بيتغير هو الطبع الحلو
وان شاء الله ربنا يرزفيك بشخص محترم واهله ناس كويسين يقدره الطبع الحلو مش الشكل الحلو
هو اصلا مش بيحبك وبعدين اللي بيحب حد بيحبه زي ما هوه شكله وجسمه وكله وانتي جيتي ع نفسك كتير وع كرامتك كمان انصحك لاتفكري فيه مره تانيه ده مش يستاهلك ابداااااا ده انسان وحش اوي ومش بيحبك كان بيسلي وقته بيكي وخلاص