مشاكل الحب والزواج

بيعرف بنات وبيشرب حشيش وبرضه بحبه

ياجماعه انا تعبانة جدا انا بحب واحد بقالى 3 سنين وهو المفروض انه بيحبنى حب عمرى فى حياتى ماشوفت زيه
بس بيعرف بنات كتير اوى من على النت وبيقابل بنات وبيحصل بينهم تجاوزات وللأسف هو اللى بيحكيلى عمرى ماسمعت من حد
غيره كمان بيشرب حشيش ومبيشتغلش وظروفه الماديه وحشه جدا انا وقفت جنبه طول ال3 سنين على امل انه يتغير ويشتغل مفيش تغيير
دخلته بيته واتعرف على اهلى واتقدملى رسمى واهلى موافقين لكن شرطهم انه يشتغل بيدور على شغل ومش لاقى او بمعنى اصح مش عاجبه حاجه
اللى عايز يشتغل ويرتبط بحد بيحبه وخايف يضيع منه اكيد بيعمل اى حاجه ويفحت فى الصخر لكن ده مبيتحركش جربت اسيبه اكتر من مرة
تعبت اووى وحياتى اتدمرت فى غيابه وهو كمان دمر نفسه يمكن المخدرات دى شربها لما سيبته اول مرة عشان موضوع الشغل
انا عماله اقنع نفسى انه هيتغير والدته بتكلمنى وبتفضل تحلفلى انه مكنش كده وانه احن حد فى اخواته وهو ده فعلا انا مقدرش انكره هو حنون جدا
راجل جدا كل اللى بيعرفه بيحبه وبيحترمه بس هى نقطه الشغل والشرب دى تعبانى اوى موضوع البنات ده مدمر نفسيتى هو اينعم مبيخبيش عليا اى حاجه
وهو اللى بيحكيلى على اى غلطه بيعملها وماانكرش ده بس ده مش مبرر انه يكرر غلطه كتير خيرته بينى وبين الناس دى وبيختارنى انا لكن فترة ويرجع تانى يكلمهم ويتعرف على بنات جديده وخروجات وقرف وتجاوزات للأسف سنه 31 سنة يعنى مش مراهق ولاعيل صغير ده راجل وفاهم
امتى هيعرف ان الله حق وان الموت بيجى بغته امتى هيراعى ربنا فيا امتى هيعمل مستقبله
دلوقتى انا بيتقدملى ناس كتير واخرهم ابن خالتى انسان ملتزم جدا بيصلى ويعرف ربنا مبيشربش حتى السيجارة الفاضية ملوش صحاب ومن شغله لبيته ومقتدر يعنى فيه مواصفات الشاب الخلوق اللى اى بنت تتمناه بس انا مش عايزة اغدر بالانسان اللى بحبه اهلى مدينه كلمه بس هو مش ملتزم بكلمته معاهم يعنى لسة مااشتغلش حبى ليه مخلينى ضعيفه اوى مش قادره اخد قرار الانفصال انا روحى بتطلع منى ومش قادره اعمل حاجه
الله يكرمكم ساعدونى انا تعبانة اوى انا شوفت فى حياتى كتير ومش عارفة اتصرف ازاى على فكرة انا استخرت ربنا كتير فى الموضوع بتاعى ده وللاسف مبيحصلش جديد بالعكس انا شايفاه متمسك بيا اكتر ياترى ده ايه

مشاكل وحلول ذات صلة

اضيف بتاريخ: Tuesday, December 4th, 2018 في 01:02

كلمات مشاكل وحلول: , , , , ,

ردود to “بيعرف بنات وبيشرب حشيش وبرضه بحبه”

  1. ابوالبتول
    08/12/2018 at 20:20

    انت وحدة مجنونة رسمي بعد كل اللي عرفتيه عنه برضو متمسكه فيه وتفكري انه الزوج المناسب لك وانه هيتغير ويتصلح حاله ده ضرب من الخيال اللي تحلمي به والظاهر انك مخبيه عن اهلك حقيقة السافل الصايع بتاعك ده وماقلتيش لهم كل شئ عنه والبلاوي اللي يعملها علاقاته بالبنات وشربه للحشيش ولافيش شغل معاه ليه تعملي كلدا في نفسك وفي اهلك هل الدنيا خلصت من الرجاله ومافيش الا الحيوان السافل ده يابنت الناس اللي يعرف طريق البنات ويشرب الحشيش لايصلح يكون زوج محترم ومسوول عن بيت وزوجة واولاد ويتحمل اعباء المسوولية بلاش عبط وجنان بتاعك ده فوقي لروحك وارفضيه تماما لو كان اخر رجل في الدنيا دي وانت قلت انو ابن خالتك متقدم لك وشاب كويس ومحترم ويراعي ربنا عزوجل وفيه كل الصفات الحلوة اللي تتمناها اي بنت ليه مش عاوزه تتزوجيه والله انك تستاهل الضرب على دماغك عشان تفوقي من العبط والهبل والغفلة اللي انت فيها دية اتمنى اسمع اخبار كويسة عنك انك قطعت علاقتك بالسافل الواطي ده وتنسيه خالص وتقبل بالزواج من ابن خالتك الشاب المحترم اللي يخاف الله عزوجل ده هو الزوج اللي راح يسعدك طوال حياتك ويحافظ عليك ويصون كرامتك ويقدرك

اترك رداً أو حلاً لهذه المشكلة