انا كنت مرتبطه بشخص من 5 سنين كنت لسه في ثانويه عامه فكنت صغيره جدا و كنت بخاف اعمل حاجه غلط او حرام وهو كان أول شخص في حياتي فكنت كل شويه اسيبه وارجع واقوله لو لينا خير في بعض اكيد ربنا هيجمعنا وكنت بستحمل الوضع بالعافيه و نفسيتي كانت بتتعب بس عشان ماعملش حاجه حرام سيبته . سنتين كاملين مكناش بنتكلم خالص لحد ما لقيته عاملي بلوك فدخلت و سألته ليه تعملي بلوك واستغربت لانى مقصدش اسيبه بمعنى انهي علاقتنا بس كنت اقصد نتقي ربنا و مانعملش حاجه حرام عشان ربنا يبارك لنا ويجمعنا تاني و من هنا بدأ الكلام تاني . وخدنا فرصه تانيه وحاولنا بس هو كان اتغير وبقي مهمل و بقى كل همه الشغل و حاجات كتير كان بيعملها عمره ماكان بيعملها وكان بيقولي أن بعدنا الكتير هو السبب في ده … بس انا مش قادره استوعب لانى كنت دايما بسأل عليه ناس و بعرف أخباره وكنت متابعاه حتى طول السنتين اللي بعدنا فيهم . هو مش عارف يرجع طبيعي زي ما كنا وكل همه دلوقتي مستقبله و بيعاملني كاصحاب وهو بالنسبه ليا مش كده انا لسه بحبه جدا و مستحمله بقالي سنه نفس الوضع يمكن يرجع تاني قعدت فتره طويله معاملته كانت زي أصحاب فعلا بس بقاله فتره بدأ يهتم شويه ويبدا يسأل و يتكلم أكثر . أما جيت قولتله أبعد لانى مش قادره استوعب وضع أخوات أو أصحاب انا عمري ما كنت ليك اخت .. قالي بلاش تقطعي خالص حتى لو مش هنتكلم كتير وأنه عاوزين أفضل معاه وأما سألته لسه بيحبني قالي يمكن بتوحشيني كتير و بيوحشني ذكرياتنا بس حب لا طبعا وفي نفس الوقت لو اتقابلنا بيقعد يتغزل فيا ويأخذ باله من لبسي و تفاصيلي و يقولي الطقم ده حلو مثلا و بيقولي ممكن أمسك إيدك ! وعاوز اجيبلك ورده … وأنت عارفه انا بحب اتكلم معاكى عشان انا قلبي معاكى أنت .!!! و جاتله فتره قطع مع كل البنات اللي بيكلمهم كاصحاب وأنا لا … كان بيتكلم معايا انا بس. بيتصل بيا من غير سبب و يقولي مش عارف اتصلت ليه .. بيحب يحكيلي كتير و يسمع مني . انا مابقتش فاهمه أي حاجه ونفسي في حل . هل هو فعلا مابقاش يحبني ? ولا هو لسه بيحبني بس خايف اني ارجع اسيبه تاني ? ولا انا فعلا بالنسبه ليه بقيت اخت أو صاحبه زي ما بيقول ? هل انا محتاجه اصبر فعلا كمان ?
الحب قبل الزواج
هل هو فعلا مابقاش يحبني
اضيف بتاريخ: Tuesday, February 13th, 2018 في 13:44
كلمات مشاكل وحلول: الثانوية, الثانوية العامة, بنت, شاب
