السلام عليكم ورحمته الله وبركاته
اولا كل سنة وانتم طيبين ويارب كلكوا تكونوا بخير
انا هدخل في الموضوع علي طول
انا بنت عندي 21 سنة وفي رابعة طب كنت بره مصر لمده عشر سنين (يعني نسيت حتي شكل بيتنا ازاي ) ورجعت في امتحانات تالته المشكلة اني لقيت شاب جارنا هو نقيب في الجيش المصيبة اني قلبي اتعلق بيه (بالرغم انه هو ماشفنيش وانا مش بحاول اخليه يشوفني ) انا اصلا عمري في حياتي ماكنت بفكر في المواضيع كانت كل دنيتي المداكرة وبس
وبما اني عارفة ان الموضوع مستحيييل لان مافيش اي تعامل بنا نهائي هو اصلا ماشفنيش فاموضوع مسدود وهايف جدا انا عارفة بس حتي لما كنت بمتحن في تالتة كنت بفكر فيه وبدعي ربنا لو خير ييسر الموضوع ولو شر يكرهني فيه المشكلة اني مكرهتوش ولما نجحت كنت خايفة اوي ربنا مش ينجحني عشان انا بعصيه بتفكيري اني افتح بيت مع الشخص دا
مرة اخويا كان بيقولي انتي بتقفي في البلكونة كتير ليه فقلت بحب اتفرج علي الظابط وهو خارج (معروف عني في البيت اني بحب الجيش اوي من وانا عندي 16 سنة وعندي صور ليهم من زماااان واخويا دا سري معاه ) فقالي انتي مش فكراه دا فلان الفلاني جارنا من زمان وكنت بتلعبي مع اخته زمان وقلت لماما يمكن يكون عندها الحل قالت انتي بتحبيه علشان لقيتي فيه الي انتي كنتي بتحلمي بيه بس الموضوع صعب اووي لانه مايعرفنيش اصلا انا كل ما صلي حتي في القيام ادعي ربنا يوريني اي اشارة وانا هارضي باي وضع بس بكون مكسوفة من ربنا اوي وانا بطلب حاجة زي دي لاني شايفة الموضوع تافه وهايف وهي مراهقة متاخرة بس مش عارفة اعمل ايه
الكارثة اني مش عارفة اذاكر ودا قتلني من جوه انا عمر ماكان في اي حاجة تقدر تمنعني عن مستقبلي ودراستي صعبة مينفعش اضيع فيها وقت وعندي امتحانات بعد العيد ولسة مابدئتش اصلا
انا بقيت احب اعد في لاوضة لوحدي بس اني اسمع صوت عربيته وهو جي من غير حتي ماشوفه (عارفة والله ان دا عبط وهياافه بس مابقدرش ) الي انا عارفها انه بدء مايبقاش اعجاب بس للاسف بيتحول للحب من طرف واحد وسالت نفسي انتي بتحبيه فيه ايه لقيت طريقة تعامله مع ابوه وامه والناس واخواته في الشارع غاية الادب والاخلاق وبيحب ولاد اخته اوي بيحي يجبلهم حاجات ويلعب معاهم وشيلهم في الشارع
للعلم هو كان لابس دبلة في ايديه اليمين وبعدين مش بقي يلبسها
انا عارفة الموضوع مش بحجم المشاكل الي هنا بس انا حاسة بالام اوي مش عارفة ليه ارجو الي عارف الشعور دا او جربه يديني اي اجابة او اي امل وهل اني ادعي انه يكون نصيبي وا ربنا يبنلي اي اشارة حرام ولا لا (مع العلم انا دينيا قريبة من ربنا الحمد لله )
شكرا جزيلا مقدما ويجعله في ميزان حسناتك
الحب من طرف واحد
بحبه و هو ما شفنيش
اضيف بتاريخ: Monday, May 21st, 2018 في 19:26
كلمات مشاكل وحلول: الحب, بنت, حب, شاب, مصر
انت قولتيها ده عبط وهيافه منكي واني بقول دي وقاحة وقلة ادب وعيب كبيير ان البنت المحترمة تفكر في الحاجات دي وكمان البنت المحترمة ماتقف في البلكونة وتبص على الرجالة في الشارع وتخلي الناس تاخذ فكرة وحشة عنها كل تصرفاتك دي غلط في غلط ولازم تقلع عنها وتحافظي على دينك وخلاقك وسمعتك وسمعة اهلك وصدقيني نصيبك سوف ياتيك لامحال مع ابن الحلال اللي يستاهلك فاصبري وقرى عينا واياك وملاحقة هذا الشاب جاركم بنظرات الاعجاب فهي من سهام الشيطان انسيه تماما واهتمي بدراستك ومستقبلك واشغل اوقات فراغك بطاعة الله عزوجل من المحافظة على اداء صلاتك في وقتها والصوم وكثرة قراءة القران والاستغفار والبر بالوالدين وصلة الارحام والتخلق باخلاق البنت المسلمة والحشمة في اللباس وعدم التبرج وغض البصر عن المحرمات والابتعاد عن مصاحبة رفيقات السوء ومصاحبة البنات الصالحات والحجاب سترة للبنت المسلمة وزينة لها ووقار والله يسترعليكي ويؤفقكي ويكرمكي بكل الخير في هذة الحياة
بوصي يا بنت الناس انتي طبعا من صغرك و انتي ف مذاكرتك و عمرك ما كنتي بتفكري ف موضوع الارتباط ده خالص و معني كده ان عمرك ما جربتي مشاعر الحب و طبعا كنتي بتعاني من فراغ عاطفي كبير و طبعا ايام غربتك عن البلد اثرت فيكي اكتر و اول ما رجعتي بلدك و اعجبتي ب الظابط ده بداتي تدوقي طعم المشاعر و جمالها و ده ادي اللي انك وقعتي ف حبه لانك لقيتي الصفات اللي انتي كنتي محتجاها ف الشخص ده و طبعا دلوقتي عايشه قصه الحب من طرف واحد و دي بتبقي اصعب مراحل الحب لانك بتعاني فيها كتير و انا مش شايف غير انك لازم تعرفيه باللي جواكي بس بطريقه غير مباشره حاولي تلمحيله مثلا او تصاحبي اخته دي اللي كانت صحبتك و تقربي منهم عشان تعرفي تلاقي فرصه انك توصليله مشاعرك بس اوعي تغلطي و تقوليه انك بتحبيه او معجبه بيه لان الطبيعي ان الراجل هو اللي يقول بس انتي لمحيله علي قد ما تقدري و حاولي تعرفي كل حاجه عنه من اخته او اي حد جمعي عنه معلومات عشان ممكن برضه يكون مرتبط او بيحب وحده تاني و عايز اقولك ان عمر ما الحب كان غلط او عيب لان دي لو حاجه وحشه مكنش ربنا اديهالنا و ربنا يوفقك