انا حبيت زميلي ف العمل و هو مديري و لكننا ف نفس العمر و كان بيعاملني بطريقة مختلفة عن اي شخص و حبيته لمدة 4 سنوات و كنت متوقعة انه هيخطبني رغم انه ما صرحش لي بأي شيء و لكن كل أفعاله كانت تدل ع ده
كان بيحكي لي كل أسراره و حاجات عن أسرته و دايما بياخد رأيي ف كل شيء و يهزر معايا و لو عنده موعد ف الشغل يقولي صحيني الساعة كذا … الخ
فجأة لقيته خطب بنت زميلتنا ف الشغل و انا انهارت و صارحته و قال انتي بالنسبة لي زي أختي و قلت له خلاص مش هتعامل معاك زي الاول عشان ما ينفعش خطيبتك تشوفك بتتعامل معايا بالطريقة دي و تحصل مشاكل فقال صح لازم أحترمها
و فعلا بدأ يتعامل كده … المهم بعد شهور قليلة انفصل عن خطيبته و كان بيحكي لي تفاصيل بتحصل بينهم و هما مخطوبين و كان بياخد رأيي فيها قبل ما يسيبها لانها أصلا كانت غير مناسة له و اهله رافضينها
بعد الانفصال عرضت عليه الزواج انا و هو و رفض … عرضت عليه مرتين و رفض
انا حبيت أثبت لنفسي انه شخص ما يستاهلش و كان ممكن ما اتعاملش معاه تاني و لكن بعد ما رفض و انا اتدمرت حقيقي حاولت اقرب منه اكتر و اكتر و هو حاول بردو بس انا قربت منه عشان اثبت لنفسي انه ما يستاهلش و انه بتاع مصلحته و كان قريب مني جدا و بيفرح لما بيشوفني ف الشغل و لو رحت الشغل و ما قلتلوش كان يدايق … و لو لقاني مدايقة يفضل يهزر لحد ما يخليني مش مدايقة و انا ضحيت عشانه كتير ف الشغل و بدون مقابل و لكن واضح انه استغلالي
من شهر تقريبا انا بدأت أبعد عنه لاني بقيت احس انه استغلالي و مقرف و بتاع مصلحته و ليه رجع يعاملني كأصحاب؟؟ لما كان خاطب البنت قال هنتعامل بحدود احتراما لخطيبته و دلوقتي لما انفصل بقت الحياة عادي؟؟؟ و فعلا حسيت انه بتاع مصلحته ف اكتر من موقف
لما بعدت عنه من شهر قالي ف اول أسبوع أنا حاسس انك واخدة جنب.. ليه؟؟ و بعدين قالي ليه المعاملة اللي بتعامليها لي دي هل الاحترام بينا قل؟؟ ده لاني ما بردش على رسائله اللي ف الشغل بشكل واضح … يعني رد مختصر و خلاص
حاليا لما بتكلم معاه بشكل فورمال قوي بلاقيه هو رجع و بدأ يتكلم عادي … لانه وقت ما كان خاطب اتفقنا اننا نتكلم فورمال و كانت الطريقة دي بتخليني اتدايق جدا و أتقطع و هو عارف … حاليا انا لما بتكلم بشكل رسمي هو اللي بيرد و يهزر
احيانا بحس انه بيبعت اي كلام و خلاص عشان ارد عليه او بيطلب اجتماع لاي سبب تافه و خلاص … انا متجاهلاه تماما …. رغم كل ده احيانا بحن له و احبيانا بكون مش طايقاه و لا قادرة أشوفه … هو ما صرحليش من البداية بحاجة و لكن ليه من الاول علقني بيه؟ و ليه المعاملة دي معايا ؟ و ليه يحكي لي كل شيء عنه و عن اسرته؟ و لما قلت له قال انا غلطان لاني لاني حكيت لك أشياء زي دي و انتي مالكيش صفة … ده بعد ما صرحت له بمشاعري .. و قلت له طب خلاص هسيب الشغل قال انتي حرة براحتك
دلوقتي هو اللي متمسك بالصداقة و بيعد يشكرني و انا مبردش عليه و بيقول اهم حاجة انك معانا ف الشغل و لو في موقف حصل ف أسرته بيحكي لي بردو زي الاول … هل ده شخص طبيعي؟؟ مع العلم انه بيصلي و متدين
بس انا احيانا فعلا بحس اني قرفانة منه و من تصرفاته و اني ضحيت بحاجات لشخص لا يستحق … انا عاوزة اعرف انا صح و لا لا؟ و عاوزة ردود تخليني لا أحن له تاني و تأثير تجاهلي ايه عليه حاليا؟ هل هو متأثر؟؟ او مش ف باله؟
كنت مصوراه صورة ف الشغل و حطها للبروفايل للواتس اب … من أسبوع حذفها خالص و كتب ستيتوس و ما توفيقي الا بالله
و انا و لا علقت ع الموضوع و فعلا بحس احيانا انه ما يستاهلش
اختي انت الغلطانة عندما سمحت له يتمادى معك في العلاقة والهزار والنظرات والاعجاب لوكنت فعلا محترمة ماعملت كدا ابدا ولخليت بينكما حدود لايمكن يتجاوزها والا عشانه مديرك في العمل خلاص يحق له يعمل معاك اي شي والمصيبة انك اعترفت له بحبك وطلبت منه الزواج بعدما انفصل عن خطيبته السابقة وكانك تعرضي نفسك عليه وترخصيها مافيش بنت عاقلة ولامحترمة تعمل كدا ابدا صدقينى انك غلطانة جدا في حق نفسك وفي كرامة اهلك ولازم تتحمل نتاج تصرفاتك الخاطئىة ابعدي عنه فورا ولوتطلب الامر اتركي العمل عنده والارزاق على الله يابنت الناس اهم حاجة تحفظي شرفكي وكرامتكي وسمعة اهلكي واحذري مافيش حاجة اسمها صداقة بين الرجل والمراة دي كلها من عمل الشيطان ارفضي تلك الطريقة اوالتعامل معه وكوني حذرة وفطنة لمايجرى حولك ولاتامني لحد مهما كانت الظروف وارجع ثاني واقلك اترك العمل معه وربنا بيرزقك بالعمل والوظيفة في مكان اخر من ترك شيا لله عوضه الله بخير في الدنيا والاخرة وربنا يصلح حالك ويسترعليك ويكرمك بابن الحلال اللي يستاهلك ويقدرك ويصونك ويسعدك طوال حياتك