انا بنت عندي ٢٩ سنة، من وانا في المدرسة اتعرفت على بنت انا مدرستي كانت بنات بس، ومع مرور الوقت قربنا شويه شويه بقت تعتمد عليا في كل حاجه، نروح مع بعض مشاوير وللدكتور، وحبتني جدا و انا كمان حبتها جدا، وعرفتني على اهلها وصحابها، وبقو هما كمان يحبوني قوي.
وعلاقتنا بقت قوية جدا بشوفها كل يوم، لو احتاجت اي حاجه بتقولي وبجبهلها، وانا كمان عارفه اني لو احتاجت اي حاجه هتجبهالي، بس انا كنت حابه احساس اني انا اللي مُعتمد عليا وانا اللي مسنود عليا كان عاملي اشباع غريب بس ماكنتش بركز عشان عادي.
مع الوقت تعلقي بيها بقي رهيب ولقيت نفسي بقيت بغير عليها وكان في تشجبع منها على ده و استجابه وهي كمان بتغير عليا قوي ومابتحبش حد يقربلي بردوا، كل ده و مافيش اي حاجه بتيجي في دماغي.
وفي مره كنت انا و هي عندها في البيت وباباها نزل واحنا بنهزر وبنتكلم كانت قريبه مني قوي ف انا قربت منها وبوستها وفضلنا على الحال ده سنة كاملة.. اتنين بيحبوا بعض.
عدت الايام وانا مريت بظروف ومن بعدها تدريجيا وقفنا خالص اي حاجه عيب كانت بتحصل، بس فضلنا صحاب وقريبين جدا. بس انا لسه بحبها قوي يوم المنى لما تطلب مني حاجه او تيجي مناسبة وافرحها، واي حاجه بسيطه منها بتفرحني.
من سنتين صارحتها اني لسه بحبها وهي رفضت وقالت ده كان زمان وخلاص والموضوع انتهي، انا ماتقبلتش ده بشكل كويس وقولتلها ان ده عذاب بالنسبالي وان من حقي اخد فرصة جديدة في الحياة ونقطع علاقتنا ببعض لاني في المشكلة دي بقيت لوحدي كده.
انهارت وقالتلي لا مش هينفع وطفولتنا مع بعض وحياتنا وكل ده، قولتلها ان احنا فعلا كبرنا وان حياتي كده هتقف وهتدمر اكتر وانا لسه مش عارفه هقطعك من حياتي ازاي، بس لازم احاول كان موضوع كبير وهي رفضت، وفعلا خليتني اضعف وقالتلي اوعدك انا مش هرتبط وهراعي الموضوع ده جدا، و مش عايزه غيرك في حياتي.
انا عارفه ان كل ده كلام و طالما هي قلبها فاضي وارد في يوم يجي حد وتحبه وساعتها هيبقي انا اللي عملت في نفسي كده ودمرت نفسي اكتر. حاولت بكل الطرق ابعد عنها ومافيش فايدة ولا هي بتديني فرصه والا انا بعرف.
انا بجد بحبها وكل الحجج اللي كنت بقولها لنفسي ان ده اضطراب بسبب سن المراهقة مبقاش ينفع انا تقريبا ٣٠ سنة. اعمل ايه افيدوني ارجوكوا
السلام عليكم يابنتي
اولا لازم تعرفي ان اللي حصل ده كان خطأ مش عايزة ادخل في حرام وحلال رغم انه حرام بس عايزة اوضحلك ان العلاقة دي ملهاش نهاية ونهايتها هتكون غير مرضية ليكي لانك بطبيعتك بنت فايوم من الايام وده فطرة ربنا لازم هتتجوزي وتجيبي اطفال وبالتالي معاها الفطرة دي مش هتتحقق ولاهتم فأنتي لازم تقتنعي الاول ان العلاقة دي اساسها غلط وان الفطرة اللي ربنا خلقك بيها عكس اللي بتعمليه ..
انا مقدرة فكرة ان الانفصال صعبة وانك مش قادرة تنسيها ده شي وارد نفس الطفل اللي متعلق بامه او لعبته في البداية بيكون صعب بس مع الوقت كل شي هيتنسي . انتي محتاجة الوقت ده ومحتاجة تفهمي ان في يوم من الايام القصة دي هتعدي كأنها لم تكن وهتتنسي من بالك تماما بس لازم تمشي على حاجات تساعدك على نسيانها..
فانتي ابعدي لان هي خلاص مش هترجع نفس الاول وانتي حطاها في اطار حب للاسف مش صداقة فصعب فكرة التحويل ..
ابدأي بتوبة لله بنية ان الله يغفرلك كل اللي فات واشغلي نفسك بمعني اشغليها متخليش دقيقة واحدة فوقتك فاضية تخليكي تفكري فيها ..
انتي عندك ٣٠ يعني بتشتغلي ولو مش بتشتغلي روحي دوري على اي شغلانة تشغلي وقتك بيها صدقيني هتتعرفي على ناس جديدة حتى لو كانت بمرتب ضعيف عادي الواحد بتتفتحله فرص اكبر واكتر لما بيتعرف على ناس ويفتح علاقات جديدة بتجيله فرص اكبر فالشغل ده هيغير حياتك للاحسن ..
اما لو كنتي بتشتغلي حاولي تطوري من ذاتك بما يخدم شغلك بمعنى خدي دورات او كورسات تطورك ..
تابعي اكاونت بيعلم لغات او احضري حلقات تلاوة وتجويد قران وبقت منتشرة اونلاين بشكل كبير جدا ..
الدعاء والقران والاستغفار بنية الشفاء ..لازم تقري سورة البقرة يوميا عشان تخرجي من حالة الحزن اللي انتي فيها ولازم تتعودي ان لسانك يلازمه الدعاء وكل لحظة تيجي في بالك ادعي يارب عوضني خير يارب انا مكسورة وعوضني بحاجة اكبر تفرحني وتسعدني ..ادعي لربنا كتير عشان محدش هيقدر يخرجك من حزنك ولاضيقتك الا هو ..
وشوفي صلاتك يابنتي اذا مش ملتزمة فيها التزمي كل صلاة في وقتها وقولي اذكار الصباح والمساء ..
احنا مقصرين في حاجات كتير اوي وماسكين في الدنيا رغم ان احنا في اختبار اكبر محتاجين نذاكرله ونستعدله عشان ننجح فيه والنجاح ده محتاج اجتهاد كبير وطاقة ايكانية حقيقية مننا ..
اسأل الله العظيم رب العرش العظيم ان يشفيك ويخرجك من ضيقتك وان تحققي ماتتمنى بما يرضي الله وان يرزقك الزوج الصالح الذي يأخذك معه لجنة الدنيا والاخرة..