أنا بأشتغل فى الامارات ونزلت مصر أجازة 17 يوم في شهر فبراير اللى فات اختارولي بنت وخطبتها وكتبت كتابي عليها والله العظيم في اقل من 10 ايام وسافرت الامارات وبعد 3 اسابع جبتها وكانت دخلتنا هنا وعشنا مع بعض شهرين ونص وطلبت ترجع لإنها مكانتش قادرة تتعايش مع الغربة هنا .
بس للأسف مش دي المشكلة هى ربنا رازقها بجمال مخليها تتغر في نفسها شويه وموضوع اللبس اللى في حاجات ضيقه مهما اتكلمت معاها تعتبرني بخنق عليها وعايز انكد وخلاص والمكياج نفس الموضوع ومعظم الوقت كان كل يوم مشكلة بسبب عندها وانا زهقت لإنى مش ديوس ، ولما سافرت مصر اشتكتلهم منى وانى خلاص مش عايزة تعيش معايا تانى برغم انها حامل دلوقتى فى الشهر السادس لكن خلاص كانت ناهيه معايا كل شويه وقسما بالله حاولت معاها مرة واتنين ودخلت ناس قرايبي ولا حياة لمن تنادي ، اتفقت مع باباها ان بعد الولادة ننفصل .
وانا استعوضت ربنا وإبنى ان شاء الله مهما حصل هرعاه سواء وهو معاها او لا .
المشكلة بقى .. انى دخلت من فترة موقع للزواج وحقى من وجهى نظرى انى ادور على انسانه تعوضنى بالذات انى نازل مصر نهائي بعد شهرين ومحتاج ألقى حد جنبي ، واتعرفت على بنت فيها كل حاجه بتمناها آدب وطيبه وحنينه وأمورة برغم انها مش في جمال مراتى بالنسبة للشكل وبتقدر تحتويني وكلمت والدتها ووالدها عرف وشبه اتفقنا انى لما أنزل ان شاء الله نتم الاجراءات وانا حاسس انى حبيتها اوى وهي حبيتنى اوي .
لكن مراتى من 4 ايام بدأت تقرب منى شويه بشويه وعايزانى أرجع لها تانى ، وانا مش عايز أرجعلها بعد اللى شوفته منها والشهور اللى فاتت اللى مش بتعبرنى فيها قسما بالله ولا مرة ، وفى نفس الوقت انا اتعلقت بالانسانه التانيه وهى كمان ومش عايز أجرحها ولا انجرح ؟؟؟؟؟؟؟
مشاكل الازواج
انا وزوجتي في الغربة
اضيف بتاريخ: Sunday, October 3rd, 2010 في 11:30
كلمات مشاكل وحلول: الازواج, الامارات, بنت, تعارف, زوجة, مشاكل الازواج, مصر, معاملة, موقع زواج
السلام عليكم انا اخوك والي بقولك عليه افيدلك من الكلام الكتير الاول استخير ده من ناحيه الطلاق عشان ابنك ولو بتخدها حب انت بتحبها ولاكن هي لا فهي شوف المده الي انت بعدت عنها فيها هي الحين عوزاك زي الاول وها تعمل الي هي عوزاه عشان تصرف وبس هم الحريم كلهم كدهفشوف لو هي عوزاك بشروطك انت لانك انت راجل مش لعبه تزغل وقت ما هي عوزه الزمام في ايدكوشوف يا اخي الغزيز اولا اللبس والمكيج ده حرام الفروض ليك انت بس في البيتوربنا معاك واختار الي انت شايفه صح انت كده كده بتصرف علي ابنك بمزاجك غصب عنك فخليه بمزاجك اخوك -كيمو-
اخى العزيز انا مقدره مشاعرك ومشاعر مراتك انا حالى حالها بالظبطماعدا الحجاب انا محجبه وده افادنى كتير والا كان فيه مشاكل اكتر هتحصل عموما الغربه صعبه جدا وكمان الجواز بسرعه صدمه الواحد لما بيفوء منها مبيصدقش نفسه وخاصه كمان لقت نفسها حامل وفى الغربه ده انا كنت كل يومين اتخانق مع جوزى وكمان مكنتش طايقاه وبعدما ولدت حبيته بس كمان الغربه صعبه عليه جدا وكمان الكل هنا بيشتغل حتى الستات اللى اعرفهم وانا الوحيده اللى ف البيت والملل والمشاكل حاول تعزرها وبعدين الحمدلله انت راجع مصر خلاص وهى قربت تولد يعنى فى حاجات كتير هتتغير اما البنت اللى قلبك اتعلق بيها دى فهى جت فى الوقت الضايع وانا واثقه اول ما هتشوف عيون ابنك هتنساها وخاصه لما مراتك تشد حيلها وترجع رشيقه وحلوه زى الاول كمان هو عرف واحده فى فتره المشاكل وبعد كده نسيها
صدقنى الالتزام عمره ما ييجى بالغصب انت كلمها وحده وحده انها لازم لبسها يتغير من مرحله البنوته لمرحله المدام ثم الام وهى هتقتنع وهى كمان اللى هتتغير وبالتوفيق
اقولك على الحل اختار بعقلك واللى بريحك متخدش رائى أحد لان كل واحد بنظر ليها من وجهة نظره شوف اللى يرضيك ويرضى ربنا ايه واعمله وذكر زوجتك بقول الله فى سورة الاحزاب ((يَأَيهَا النَّبىُّ قُل لأَزْوَجِك وَ بَنَاتِك وَ نِساءِ الْمُؤْمِنِينَ يُدْنِينَ عَلَيهِنَّ مِن جَلَبِيبِهِنَّ ذَلِك أَدْنى أَن يُعْرَفْنَ فَلا يُؤْذَيْنَ وَ كانَ اللَّهُ غَفُوراً رَّحِيماً))(59) وشوفها نفسها هتوديها لفين
الموقع ده والله ربنا عرفني بيه في وقت أنا كنت محتاج ليه أوي لإني مبقدرش أتكلم مع حد من اللى حواليا لإن كل إصحابي اللى أأتمنهم علي سري كلهم في مصر .. بس بجد والله انا شوفت هنا كمان إخوات وأصحاب ربنا يجازيهم خير على كلامهم ووقوفهم جنبي وإستجابتهم لإستفساري .. ووالله العظيم مش مجاله في بعض الأراء قريتها عنها عدلت شويه من تفكيري ، وأنا إن شاء الله هأكلم مراتي أو أبعتلها رسالة فيها طلباتي ومش طلبات سي السيد أبدأ والله العظيم انما الحاجات اللى لازم نمشي عليها علشان ربنا يباركلنا فى حياتنا ، لو وافقت هتوكل على الله وأكمل معاها علشان ابني ، ولو اتكبرت يبقى كل واحد من طريق وبرضه إبني إن شاء الله هيكون في عنيا سواء معاها أو معايا …….
كلمة أخيرة بس للأخت ((شاكره لله))
والله العظيم عقلتها وحاولت أفهمها بإسلوب هادي ما نفعش ،، روحتلها بيتها بعد ما طلبت تنفصل علشان اتكلم معاها وانا فى أجازة من شهر تقريبا قسما بالله قعدت حوالي ساعه وما طلعتليش ، أبوها اللى هو ولي أمرها اللى بتقوليلي اتكلم معاه كان شايف بنته سايبها جوزها مرمي بره ساعه وهي قاعده جوه ومهنش عليه يجيبها من شعرها يقولها عيب وحرام جوزك يبقى بره وانتى عارفه وتسيبيه ويمكن بالعكس والله الراجل كتر خيره جه سلم عليا وقعد حوالى دقيقتين ما اتكلمش فيها ولا كلمه وقام وسابني ، زعلت منها علشان تحس زي ما بتقولي قعدت 3 شهور والله العظيم ما بترن عليا حتى رنه.
ومع ذلك هأعمل اللى يرضي ربنا ويرضي ضميري علشان أبقى عملت اللى عليا برغم انى عملت أكتر من اللازم
السلام عليكم ورحمة الله وبركاته , اخي دا امتحان من ربنا سبحانه وتعالى , الزواج يا اخي مسئوليه كبره وخصوصا لما يكون في طفل , انا من رائي ان تعطي زوجتك فرصه اخرى يمكن يكون العناد والعصبيه اثار الحمل , يمكن هي اتعدلت , انت جوزها ومن حقك تامرها تلبس محتشم وماتعملش مكياج كتير بس هي لس مش متعوده يعني اصبر عليها شويه هي لس متاثره بحياتها قبل الجواز ومغتره بجمالها , ا اخي اجلس معاها واتكلم معاها بالطيبه وانت تبتسم وتعلمها الصح والغلط ولو ما افادش الكلام ذكرها بكتاب الله والحرام والحلال ماتحاولش تضغط عليها خليها هي تفهم دا لوحدها , ولو مافادش الكلام والتعليم حاول تكلم ولي امرها او حد يعلمها ولو مافادش حاول تزعل منهاومتكلمهاش لغاية ماتسمع كلامك في النهايه وكل امرك لله سبحانه وتعالى اصبر يا اخي عشان الطفل اللي جاي اصبر , عشان ما يعيش في عقدة نفسيه بين الاب والام , وبالنهايه اقولك استخير الله سبحانه وتعالى وربنا الموفق .
فكر فى ابنك وشوف النعمة ديه تستاهل انك تستحمل وتحاول الف مرة انك تغير مراتك ولا لا وبعدين الوضع دلوقتى اختلف انت دلوقتى هترجع مصر وهتستقر كمان هى اكيد تجربة الحمل واحساسها بوجود طفل عقلها صدقنى البنت ممكن تتغر بجمالها لكن كل مرحلة بتغير فيها حالها
خى العزيز انا معاك بس الاختيار من الاول كان غلط على فكرة انا اتجوزت فى شهر بالظبط ومكنتش عارفة خالص بس انا عايزة اعيش واحافظ على بيتى وعلى فكرة انا عايشة معاه فى الغربة بردة شوف بقى الفرق بينى وبينها انا عايزة اعيش انما هى ممكن فكرة ان الجواز دة حرية مش اكتر تعمل اللى هى عايزاة انا معاك فى اللى انت عملتة بس المهم دلوقتى البيبى هيعيش ازاى مابنيكم وهل ياترى هى عايزاك بجد ولا فى اية اللغز كلة هنا اية سبب التغير السريع دة ولية وممكن اقولك اكتر انت ممكن تصلى ركعتين استخارة وربنا يدلك على الطريق الصحيح
انت ما غلطتش بسبب السرعه انت غلطت بسبب الاختيار ليس عن طريق الدين تفرق جاامد اووي……….والله لو خطبت بنت سنتين مش هتعرفها الا لما تتجوزوا وتعيشوا مع بعض لكن الدين حسملك الموضوع ف الاختيار وتختار ازاي…..واذا اختارت صح وطلعت وحشه يبقى دا بلاء من ربنا وانت عملت اللي عليك وربنا مش هيسبك….لكن ما تختارش غلط وبعدين تقول ليه كده
اولا لازم تعترف انك اخترت غلط…لانك لو ما عرفتش غلطك هتقع تاني……من حقك تجوز تاني واللي مش عجبه يخبط دماغه ف الحيط لاني راجل وحاسس بيك….بس اوعى تظلم اي حد…..هل سالت كويس ع اهل التانيه وع سلوكهم وهل ليها كبير و هل يوجد راجل بالبيت اذا كانت الام هي اللي ممشيه البيت ف وجود الاب ابعد فورا و انا بقلك عن تجارب واقعيه ومش عاوزين نتكلم بخيال……اولا وقبل كل شيء تستخير ربنا…بس اذا فكرت ترجع لمراتك لازم تمنع الضيق والمكياج بالخارج وتكون قوي عليها بحنان……….اذا لم تستجب ابعد فورا لان البعد ارحم من احساسك في القرب…….استخير ربنا اولا لكن ربنا ما يرضاش بالضيق ولا التبرج دا امر محسوم علشان ربنا يباركلك……الجمال نقمه مش نعمه الا ما رحم ربي خد بطريق الدين الصح هتنعم بحياتك…هتاخد بالهوا واللي عاوزه اتاكد دا من تزين الشيطان
وانا حاولت كتير معاها
قسما بالله كتير اوى من حتى قبل كتب الكتاب ، لكن ترضيني فى وقتها وترجع تانى للى فيه
( أختى فى الله ) ( فكر بعقلك وإستخير ربنا )
بجد أنا بشكركم والله على إهتمامكم ويا أختى فى الله انا عارف والله ان في زيجات عن طريق النت بتنجح وانا نفسي مستريح للنت دى أوي بالذات انها من أول يوم طلبت منى أكلم مامتها ومامتها بدورها كلمت باباها ووافقوا مبدأياً .
( طريق النجاة )
أصححلك معلومة بس هي محجبة ويمكن دي المشكلة لإن لو مش محجبه أدينا عارفين اللى فيها ، إنما محجبه وبتلبس الزفت اللى اسمه بادي كارينا الله يبتلى اللى إخترعه بشر أعماله ، ومقتنعه انه عادي ما بتعملش حاجه غلط ومش محتاجه حد ينصحها ، وأنا يا أخى عمري 24 سنهلو قبلت إنى أكمل معاها بطباعها دي يبقى بشتري تعاستي بإيدي وانا لسه صغير ، والله العظيم لو اتغيرت ما هأقول حاجه انما انا مبقتش عارف .
أنا عارف انى غلطت والله بسبب السرعه لكن هي كمان غلطت معايا انا مضربتهاش على إيدها انها تقبل الزواج بالسرعه دي ، انا كل اللى كنت طالبه من ربنا والله العفه .
السلام عليكم
كيفك اخي
انا رايي ان زوجتك مش هتتغير وبعدين هي من جواها مؤمنة بكده يعني مغروره بجمالها وشايفة نفسها
انا رايي لو الينت التانية كويسة تتجوزها
انا شخصيا اتجوزت عن طريق النت وهنا في الامارات ومعايا ولد وحامل في بنت
وزوجي برده ترك مراته اللي هي كانت اوفر اوي وانا كنت انسانة عادية بلبس حشمة وهو لبسني نقاب كمان
والحمد لله عايشة في سعادةوزوجي زي العسل واهله ناس طيبين
يعني مش كل جوازات النت فاشلة
وبردة استخير ربنا
اللي تعرفه احسن من اللي متعرفوش .. ومحاولة زوجتك في اعادة العلاقة يجب ان تبنى على اسس واضحة وهذه الاسس هو بالتاكيد ثمات شخصيتك التي يجب ان تتطبع بها زوجتك وهي الوقوف الجاد عند مطالبك الخاصة والعامة والشخصية والغير شخصية بمعنى انك تفرض عليها الحجاب قبل اي شيء فاذا تقبلت ذلك فهذا يدل على بداية موفقة ان شاء الله واذا رفضت فالبقاء بعيدا عنها افضل لان ما يخفي كان اعظم وانت لسه في بداية حياتك ولما تبدأ بهذه المنغصات التافهة فلا حرج عليك لانك انت الذي وافقت من البداية وسوف تظل على هذه الوتيرة في كل ما يمكن ان تقوله لها وربما لصغر سنها فهي تريد من يوجهها الى الطريق الصحيح وعليك كزوج بهذه المسئولية كاملة هذا طبعا اذا شعرت بانها فعلا تحتاج الى من ينصحها ويرشدها فقد تكون انت تتحدث في وادي وهي في وادي اخر وهذا ما يقولونه في مثل هذه الامور ( تاتي الرياح بما لا تشتهي السفن ) ولا انصحك بالدخول في تجربة عاطفية جديدة مع اي فتاة اخرى وعليك بانهاء العلاقة النتية الجديدة وكانها كابوس وصحيت منه .
انت ليه مسالتش نفسك ان مراتك عاوزه ترجعلك تانى ؟؟ لو عرفت الاجابه على السؤال ده هتعرف الحل وتوصل لحل يرضيك بس انت فعلا ف موقف غريب ولا تحسد عليه يعنى بين نارين نار انك ترجع لمراتك ام ابنك او تتجوز الى قالبك اختارها بس يا ترى الى قلبك اختارها دى هتكون متفاهمه معاك ومش هتعمل زى مراتك ما عملت لو انت واثق فيها اوى كده اتكل على الله لكن لو مش واثق خليك مع مراتك اهو بنكم عشره واولاد وربنا يساهلك