انا شاب مهندس كنت بعمل و حصلت مشاكل في الشغل من شهرين و بسببها ماقدرتش اني استحمل اكمل في الشغل دا . مشكلتي اني خاطب و الحاجات دي محتاجة مصاريف خروج و هدايا و كدا . طبعا بعد ما سبت الشغل مابقاش فيه فلوس و الشهر خلص و فلوسي معاه خلصت و داخل على مرحلة تقيلة و مش عارف اعمل ايه لدرجة ان خطيبتي بدات تحس اني بخيل مع اني بحاول ماحرمهاش من حاجه على قد ماقدر و هي بتحبني جدا . بس اتضايقت من احساسها دا على الرغم انه مش قصدي احرمها من حاجه . بقى عندي ياس فظيع و مش عايز اكمل في الدنيا دي عايز اسيب الدنيا دي او اروح حتة ماعرفش حد فيها ولا يعرفني . اقرب حتة هيا القبر….اعمل ايه؟؟؟؟
عن تجربه والله
عليك بالاستغفار
صلاه قيام الليل ولو ركعتين قبل الفجر بشوبه
صلاه الضحى
وربنا هيرزقك والله
لسوء الحظ انتهى كل شئ…شكرا لكم جميعا
اذا كنت تريد مخرج من مشكلتك هذه , أسمع ولاد الحلال الي نصحوك وبدأ بالإستغفار وحتشوف النتائج الطيبة عن قريب انشاء الله
ااا وحاجة كمان اوعى تفكر التفكير السلبي دا قبر ايه وبتاع ايه الحياة ابسط بكتير من كدا بس احنا اللي بنعقد الامور وانت بتصلي اثناء السجود ادعي ربنا انو يباركلك في حياتك وشغلك اوكي؟بييييس
سلام يااخي اولا مش ذنبك انك سبت شغلك اي حد بتعدي عليه اوقات سيئة فحياتو وكل شي بيدالله وخطيبتك الله يخليهالك لو بتحبك بجد اكيد حتتفهم الظرف اللي انت فيها حاليا هي لو مستحملتش دلوقت حتستحمل الزي بعد متتجوزو؟دوام الحال من المحال ربنا حطاك في الموقف دا عشان يمتحن صبرك وعشان تستفيد من العترات وتقوى ووالله صدقني انت بس اصبر واحمد ربنا في ناس ربنا مبتليهم بحاجات اكبر من كدا.الخطوبة عموما فترة بتختبرو فيها مدى تعلقكم ببعض ولازم تفضلو مع بعض في الحلوة والمرة ونت ولا بخيل ولاحاجة بالعكس بس حاول تفهمها الوضع الانت فيه وظروفك واكيد ربنا حيوضعك ياباش مهندس عقبال من تفتح شركة كبيرة كدا وتعد تتذكر في الايام دي.ربنا يوفقكم
احكي خطبتك طروفك وهي اكيد هتستحمل لحد ما تلقئ عمل تاني وربنا يوفقك
في افي الاول كده استهدى بالله وصل عالنبي ومتخافش ربك مش كاتبلك الا الخير ..انت بس قول يارب وربك مبيردش حد خايب ..ربك احن عليك من أمك ..الهي يسعد قلبك دنيا وآخرة .. قول آمين :)، تاني حاجة بقى عايز تسيب الدنيا وتختفي من الناس .. تتمنى الموت عشان سبت الشغل ؟؟ امال اللى مريض بالسرطان يعمل ايه .. اللي اتفضحت او اللي شرفه ضاع او المسجون او المعاق اللي يتمنى مكانش جه الدنيا من أساسه ، متخليش يأسك يسودلك الدنيا ..وكل مشكلة زي ماليها عقدة ليها حل ..، تالت حاجة خطيبتك مش هتكون بعد كده زوجتك ان شاء الله .. اما من اولها بتخبي عليها حالتك المادية .. والنفسية امال بعد الجواز هتفضل تمثل طول الوقت انك بتبتسم ؟؟ بدل يا سيدي ماانت خايف تفكرك بخيل قولها اللي حصل معاك ومهما كانت رده فعلها لما تصارحها هتكون اهون بكتيير بكتير من ردة فعلها لما تعرف انك خبيت عليها ، عارفة ان الخطوة دي مش سهلة ومشكلتك مش بسيطة بس اللي ابتلاك بيها قادر يشيلها عنك ، انا رايي تدور مؤقتا على شغل ومتسيبش نفسك للاحباط والفراغ .. ومتكتمش نفسك بمشكلتك انت مش عايش لوحدك .. وان شاء الله ربنا هيفتحها في وشك وهتلاقي شغل احسن من اللي كنت فيه وانت بسم الله ماشاء الله مهندس .. هتلاقي شغل متخافش ، صارح خطيبتك ودور على شغل مؤقت على بال متلاقي اللى انت عايزه وتوكل على الله يكفيك ، يارب يريح بالك ويطمن قلبك ويشيل عنك الهم وماياخد روحك الا وهو راضي .
،
الاخ العزيز احب اقولك ان الشيطان كدة ابتدى يشتغل معاك و بدا يخنقك ويزهقك من حالك ومن نفسك ويحسسك ان خطيبتك دايما مخنوقة منك وانك بخيل علشان تحاول ترضيها وترضى نفسك كمان وتحاول تعمل اى حاجة علشان تجيب فلوس ان شالله حتى تسرق او تغضب ربنا اوعى تستسلم لية وخلى ظنك بربنا خير دايما وانو هايكرمك طول ما انت ماشى صح وكويس وفاكر ربنا على طول واكيد خطبتك عارفة حالتك كويس ولازم تقدر دة ولا مقدرتش دة يبقة ماتستهلش لكن انت اوعى تفقد السيطرة على نفسك وكون صبور علشان ربنا يكرمك ان شاء الله
بص عايزة اقولك شى انت الحمدلله متعلم ومؤمن بالله ومعك شهادة كويسة انت احسن من غيرك بكتير ان شاء الله الحياة موافئتش يعنى بكرة ا شاء الله تلاقى شغل واحسن من الا انت كنت فيه واى شركة تنمنك وكمان انت ربنا بيحبك انه بعتلك واحدة بتحبك ومش طماعة وتقدر تعيش معك على الحلوة والمرة مش يمكن ده يكون اختبار من ربنا ليك ويشوفك انت حتعمل ايه وبلاش الياس ده وانش شاء الله ربنا حيوفقك ماادم انت مؤمن بالله
اخي فالله انت يأس من ايه علشان سبت الشغل ؟؟
طيب ما في مليون واحد بيسيب شغله انت مش اخر واحد ولا اول واحد وغير كده انت مهندس يعني ممكن تلاقي شغل بشكل او اخر . وبالنسبة لخطيبتك علشان هي مش تقول عليك انك بخيل فهمها وضعك دلوقتي ولو هي مش وقفت معاك دلوقتي تعرف انها هتتخلي عنك فى اي ازمة بعد الجواز الوضع الي انت فيه دلوقتي مجرد ازمة وهتروح لحلها …. انت حلك بسيط انك تدور بجهد شوية عن شغل حتى لو اقل من امكانياتك دلوقتي لحد ما تلاقي شغل مناسب تماما ليك بس مش تسيب نفسك من غير شغل ..
وربنا معاك