ارجو من من يقرا رسالتى يساعدنى ويقولى هل كلامى هذا وتصرفى صح ام خطا
انا مخطوبة وخطيبى بيحبنى وانا بحس بكدة فى اوقات كتير ولسه على ميعاد زواجنا 4 شهورولكن بدا فى هذة الايام يتكلم معى عندما نتزوج هعمل كذا وكذا فى العلاقة بيننا وانا عندما يكلمنى فى هذا الموضوع اتعصب واتنرفز واقوله ان هذا الكلام ليس وقته ومينفعش يتقال وتحدث بيننا مشاكل وخناقات كتير بسبب هذا الموضوع او حتى التقرب من الكلام فيه لان بحس فيه حرمانيه كبيرة وهو كل ما ارفض الكلام فى هذا الموضوع يقولى انا بحاول افك التنشنه والقلق اللى جواك عشان يوم ما نتزوج ما تكونيش خايفه منى وتكونى مشتاقه لى كما اشتاق لكى
فارجو بالله عليكم من يقرا رسالتى يقول لى ماذا افعل لان بسبب الموضوع دة الخطوبة مهددة بالفشل لان خطيبي زعلان مني و بيعتبرنى باردة وبيكون رد فعلى وزعلى صعب وهو بيخاف من طريقه غضبى لانه بيعبرنى شديدة الخصام وهى طريقه مش بيحبها فماذا افعل
انت تعملي الصح واستمري في الطريق داوخليه يبطل الكلام في الحاجات دي لانهاحرام وقلةادب ولوحاول يتكلم فيهااقفلي الخط في وشه لانودافضل شي تعمليه ولاترخصي نفسك له وتنخدعي بكل مايقوله تسقط من نظره وتحتقري نفسك لاجل واحد ممكن يسيبك في اي لحظة وفقك الله وسترعليك
ثقى انك صح وبرضو كلمية بهدوءوقوليلو لو بتحبنى وبتخاف على زعلى مش تقولى كدة انا بعمل كل دة علشان افضل محافظة على نفسى وكله علشانك ولو زعل مش هقولك نيتة وحشة ومش عاوزك علشان لو كدة مكنش اتقدملك ومكنش تعب علشان يوصلك بس زعل ماتفضليش بقى تقولى والله مش قصدى ومش عار فة اى لأافتحى معاه موضوع تانى وغيرى الكلام وبرضو قللى اتصالك بية شوية مش على الفاضى يعنى اطمنى علية وعلى شغلة المهم بس وكلامك يبقى هادى وصوتك مش يعلى حتى لو اختلفتوا والحاجة المضمونة فى الموضوع دة كلة ان احترامة ليكى زاد حتى لو زعل بس من جواه نفسة يرتبط بيكى فى أسرع وقت وهتفضلى جوة عنية واوعى تتساهلى وتنفذى اللى بيقولك علية حتى ولو حاجة صغيرة اوى والله هتلاقى الموضوع بيتطور لحاجة وحشةأوى ف من البداية مامتك وباباكى ماتعمليش حاجة من وراهم وربنا دة فى اعتبارك على طول ومش تتكلمى كتير معاه ف كدة غيرى الموضوع اتكلمى عن حياتكوا وهتعملوا اى وكلة بحدود علشان يفضل مشتاق لمكالمتك وربنا يوفقك وبالله عليكم ادعولى ان ربنا يجعل خطيبى قرة عينى ويجعلنى قرة عينة ويقربوا منّى اكتر ويشوفنى فى عينو جميلة على طول وافضل مالية عينة ويسخرة ليا
اثبتى ع موقفك و لو بيحبك هيحترم ادبك ويفضل معاكى
اكتبوا الكتاب، وخليه يتكلم براحته…
بصى حبيبتى اهم حاجه الاسلوب فى الكلام ازاى تخرجى من اى موضوع من غير اى مشكله فاسلوبك هو اللى بيجبر اللى امامك يعاملك ازاى بمعنى انك لو اسلوبك كويس وادلعتى عليه ممكن يتقبل الموضوع ومع مرورو الوقت هيفقد الامل انك تتكلمى معاة لاكن لو اتعصبتى وقلبتى وشك اكيد هو كمان هيتنرفز وهتحصل مشكله فانتى خليكى ذكيه واعرفى ازاى تنسيه الكلام فى الموضوع دة بشطارة
ااخرجى من الموضوع بذكاء–مفيش داعى للنرفزه ولا انك تقوليها مباشر وبعدين انت لو اتكلمتى براحه الدنيا هتهدى ومحدش هيزعل من حد
انتى كدا انسانة محترمة وبتحافظى على نفسك وربنا يسعدك ويوفقك ويهدية
انا مع رأى حسن خليكى على موقفك ربنا يحرسك
انا زيك برده وكانك بتتكلمي عني مع بعض الاختلافات في السيناريو ومش عارفة اعمل ايه انا مش بديله فرصه يكمل الحوار وبغير الكلام وهو بيفهم اني متعمده ذلك حتي لو قالي بحبك بخاف يقول حاجة تانية بعدها بس المشكلة انه بيقل في نظري وفي نفس الوقت معتش فيه فرصة حتي للكلام الرومانسي المهذب
هو فين جمال فترة الخطوبة بقي اللي بيقولوا عليه؟
دي كلها مشاكل وخوف وعدم استقرار
مشاء اللة عليكى خليكى على موقفك ولاتتبعى خطوات الشيطان لان العواقب فى هذا الوقت انتى عارفة النتيجة عموما اللة يهدى خطيبك ويوفكم الى طريق الحلال.
كلام سلمى اقرب كلام للوقعيه
حاولى دايما تتكلمى فى مواضيع تانيه تكون أهم علاقتكوا تفكيركوا
ياريت ميكونش فى عصبيه ونرفزه لأن دا ممكن يفقدوا الثقه فيكى والمفروض انك الصدر الحنون له انتى خطيبته مش واحده بيكلمها من ورا اهلها
فهميه انك مش رافضه الموضوع لكن انتى خايفه من ربنا وبعد الجواز هيكون اسعد واحد فى الكون وتوعديه بكدا
ممكن تبدروا شويه بمعاد كتب الكتاب
بسى انتى اللى بتعمليه ده صح ومحدش يغلطك بس احنا علشان مصريين فبيبقى فى كبت بداخلنا فى موضوع الجنس لكن انتى لو خايفه على الجوازه حاولى ياما تعدليه ياما تفرقشى علشان لو فضل يتكلم كده الله اعلم ممكن يعمل ايه كمان
نصيحه سيبيه يتفلق وقوليله اتقى الله واعدليه هتكبرى فى عينه وقوة ثقتك بنفسك هتزيد وربنا هيباركلك ولو استمر فكك منه خااااااااااااالص
كلام توتا صح متعمليش زيى خليكى هادية العصبية بتغلطك انتى وتخلى هو الواد الغلبان ياريت كنت اعرف توتا قبل الزواج ههههههه
السلام عليكم
اختى فى الله انتى كلامك كله صح ولا تشككى فى نفسك هذا ليست كلام فقط وانما بعد ذلك يطلب منكى ان تفعليه
وانتى دلوقتى مش زوجته اطلبى منه بدلع وحنيه ينتظر الى ميعاد الزواج اوحتى لغايه بعد كتب الكتاب وفهميه ان ده مش وقته لانه هيثير شهواتكم من غير اى فعل فكده هتتعبوا اكتر وبلاش نرفذه ولا خناق
وخليكى مصممه على كلامك لانك لو عملتى كدا هيبتدى يشكك فيكى حتى لو كان بيحبك
وربنا يكتر من امثالك ويجمع بينكم فى الخير والحلال
السسلآم عليكم
.. إرى من تصرفك هذا إنك فتاه محترمه وقآإبلي مشاكلك معاه بلطف ولا تعصبي عليه إبد مع تحياتي لك وآشكر كل شخص وبآإدر في نصيحه الإخت وربي يوفقكم
بالعكس ده مش برود دى قوة ايمان وبارك الله فيكي
واوعى تضعفى والمفروض انك تكبرى فى نظره مش يقول عليكي كده
اثبتى على اللى انتى فيه وقوليله يصبر لحد هانت يستحمل 4 شهور
وساعتها يحكم
ربنا معاكى ويباركلك ويكتر من امثالك ويهدى كل البنات
بصى انتى صح بس برده قوليله ماينفعشى نتكلم دلوقتى فى الموضوع ده بس بدلع ورقه علشان مايزعلشى
وكمان انتو لسه فى وقت كبير على الفرح استنى شويه واتكلمو استنو حوالى شهر او بعد كتب
الكتاب على الأقل تكونو قربتو من بعض
لا خليكى على موقفك ده ولو زعل سيبيه يتفلق الحرام مافيهوش مين يزعل ومين يفرح
أرجوكى وبجد خليكى على موقفك لأنه صح مليون الميه والله لو عملتى اللى هو عايزة صدقينى هتندمى وهو أول واحد هيلومك ويفقد احترامة ليكى ومش بعيد يسيبك أساسا والله انا سبت خطيبتى بسبب الموضوع ده وخصوصا انها هى اللى بدأت فى اكلام عن الجنس بس بجد برغم انى متأكد انها معماتش حاجة غلط قبل كده وانها بتحبنى اوى بس مقدرتش اكمل معاها لأنى مبقتش أحس انها حاجة عزيزة والمفروض انى اتعب لحد ما اوصلهابقت سهلة المنال حتى لو بس بالكلام
لا متخافيش مش حيعتبرك بارده
ده حيتمسك بيكي اكتر انما لو اتماديتي معاه في الكلام ممكن الشك يدخل بينكم
السلام عليكم و رحمة الله وبركاته
ربنا يجمع بينكم في خير اختي و يا رب ربنا يزيدك ايمان وتقوى وخوف من الله
شوفي انا لن اتكلم بنظرة المسلم الملتزم الذي قد يبدو للبعض متزمت خاصة في عصر مثل عصرنا اليوم
لكن ساتكلم بعقلية شاب عادي هو قد يكون وانتبهي لكلمة قد يكون معذور انه متعجل هذه الامور
و قد يكون له ثقافة او اشياء معينة في الجنس و يريد ان يهيئك نفسيا كما يزعم مثلا
لكن هل فعلا يجوز انك تتكلمي معاه وتتماشي معه في الكلام
لا تحت يا تبرير او عذر او سبب لا دينيا ينفع ولا اخلاقيا ينفع ولا تحت اي عرف ينفع
لان اصلا الله اعلم حتكوني زوجته ولا لا و ثقي تماما ان الكلام لو اتفتح في اموضوع ده الموضوع حيكبر لاكتر من الكلام
كمان تقدري تريحيه وتقولي له لما اكون في بيتك كل اللي يخطر لك على بال حتلاقيه وكل اللي انت بتحبه حيتعمل
ويبقى ريحناه وطمناه اما بقى لو هو عاوز بس يتلذذ بالكلام في المواضيع دي فاظن ان واحدة كتبت الكلام اللي انتي كاتباه ده اظن انها اعلى واجمل وارقي من انها تطاوعه حتى لو فيها فسخ الخطوبة كلها
لان شتان بين اتنين بدؤا على طاعة ربنا بدون حرام وبين اتنين بدئوا بحرام
و صبريه وقولي له ان خوفك من ربنا مانعك تتكلمي واساليه هل ده حرام ولا حلال كلامنا في الجنس
وهل لو اتكلمنا تفتكر ربنا حيوفقنا
يعني كلميه واحدة واحدة و يا ريت تخففي من الكلام بينكم طالما الزواج قرب ولما تتجوزي وتروحي لبيته هنا من حقه يعمل ما بدا له
و انتهبي وحقيقي ربنا يكثر من امثالك ويحفظك ويستر عليكي وانتي صح وكلامك لا غبار عليه بالعكس انا واثق ان ربنا راضي عنك عشان فعلك ده
ربنا يوفقك يا اختي بس اتعاملي بدون غضب ونرفزة وفهميه
لو محتاجة كلام اكتر من كده او اي استفسار ضعيه هنا في الردود وارد عليكي ان شاء الله
ما فيش مشكلة بس مش دلوقتى لما الجواز يقرب اكتر من كده يعنى بعد كتب الكتاب و قبل الفرح بعشرة او 15 يوم …. والراجل الماهر يقدر يخلى مراته جمرة من نار بس هو يعرف فين مفتاحها … و الست الخجولة دى حاجة كويسة لانها بتبقى متعة فى التعامل معاها عكس الست الجريئة اللى بتبقى صفة فى الستات اللى مش كويسة وربنا يتمملك على خير
حاولى تفهمية براحة من غير عصبية هو ممكن ميكونش قصدة حاجة وحشة جايز من كتر حبة ليك نفسة فى كدة انتى ارفضى بهدوء من غير نرفزة قوليلة انا بتكسف بلاش تقولى كدة بدلع من غير عصبية قوليلة وحياتى عندك بلاش تتكلم كدة عشان بتكسف مش تتخانقى معاة وربنا يوفقك
بصي حبيبتى طبعا اوعى تسيريه في الكلام ده لانه فعلا حراااام وخطر كمان
وبكرة وبعده لما تتزوجيه ممكن يعيرك بيه
لكن كمان حاولى تكونى لطيفة و رقيقة في رفضك
ومن غير عصبية او تنشنة وفهميه ان الكلام ده حرام وانك مش عايزة
علاقتكم الجميلة تكون فيها حاجة حرام وتغضب ربنا علشان يبارك فيها
وتكون كلها في رضا الله وان ما يستعجلش كل حاجة في وقتها حلوة
ومجرد كلامكم اللطيف مع بعض ومشاعركم الرقيقة هتولد بينكم الالفة والود
وهتكون علاقتكم بمشيئة الله من غير خوف ولا تنشنة بالعكس الكلام التانى اللى هو عايزه
خطر جدااااااا وممكن يجرفكم لحاجة انتم مش عايزنها وتغضب ربنا
وفي الاول والاخر انتى اللى هتكونى خسرانه
ح
لان هو حاليا غريب عنك ومش من حقه اللى هو بيطلبه من كلام في العلاقة الخاصة بين الزوج وزوجته
كل مرحلة ولها جمالها ووقتها حاولى تفهميه ده وخلاص هانت هم 4 شهور فلماذا العجلة التى يدفعه الشيطان لها
حفظطما الله حبيبتى وتتم فرحتكم على خير في رضاه وفضله
اختك حلم
اختي في الله عندما قرأت مشكلتك لم اتردد لحظه في التفكير معكي في الحل لأني عاصرت هذه المشكلات مع بعض صديقاتي .. بداية انتي لم تخطأي وتفكيرك علي قدر كبير من الصواب ولكن الخطأ هنا ليست في طريقة تفكيرك وانما في رد فعلك انا لا الومك في رفضك لهذا الكلام علي العكس ولكن يجب ان يكون رد فعلك علي قدر اكبر من السياسه والذكاء لانه خطيبك وزوج المستقبل وليس مجرد شخص علي علاقه به فعليك يااختي بردود الفعل الحنونه الخجوله ويجب ان يكون رفضك بقدر اكبر من الحكمه وليست العصبيه والنرفزه فهي لاتفيد والحقيقه التي لا يستطيع ان ينكرها احد ان الرجال يفكرون بهذا الشكل ويعتبرونه فاكهة حياتهم القادمه وهو تفكير طبيعي لاي رجل يري ان من حقه ان يفكر في زوجة المستقبل بهذا الشكل ولكننا كفتيات محافظات تعودنا علي الالتزام والعفه نري ان هذا شئ خارج وغير مقبول..
وحتي لا ايل عليكي كل مااريد ان اخبركي به هو انه وجب عليكي عن محاولة فتحه لهذه المواضيع ان تظهري خجلك الشديد حيال هذا بمنتهي الرقه والنعومه فهذا سيساعدك في اعلامه انك لست فتاه بارده متجمدة المشاعر وانما رفضك ماهو الا خجل والتزام وان حاول الخوض في تفاصيل حاولي ان تقاطيعه بهدوء واعلميه (ان الخوض في تفاصيل يزيد من مخاوفك واضطرابك لكن عندما يتم زواجنا فوجوده بقربك لن يشعرنك بهذا الخوف وحنانه لكي سيذيب اي تنشنه او خجل واخبريه ايضا انكي لا تمنعيه من الحلم بكي وبزواجكما فهو شئ من حقه ودليل علي حبه لكي ولكن دون الخوض في اي تفاصيل حتي لا تزيد رهبتك) صدقيني يااختاه عندما تعلميه بهذه الكلمات بشئ من النعومه والرقه وقليل من الدلال سيتحول الي طفل صغير بين يديكي يريد ان ينفذ لكي طلباتك لانه سيطمئن انكي ايضا تحبيه وتريديه ولكن خجلك كفتاه يمنعك من الخوض في هذا ذكاء المرأه ونعومتها يذيبان الحجر فكوني انثي ذكيه ورقيقه بكل معني الكلمه تملكي كل شئ لقد وضعت لكي الكلمات المساعده بين قوسين توكلي علي الله واستخدميها كما وضحت لكي وان شاء الله تنحل مشكلتك…
تمنياتي لكي بمنتهي السعاده والتوفيق