انا جوزي مسافر بقاله سبع شهور اما نزل اجازه وعدني اني هسافر معاه وبيعشمني كتير بس قالي شهر وهبعتلك برده اتحجج بالظروف وقالي كمان شهرين وبرده بيوعد ومش بيوفي انا معايا ولد وهو مش حارمني من حاجه بصراحه وبيتصل بيا علطول وانا قاعده عند اهلي بس انا تعبت وعايزه اعرف ايه اللي مانعه وليه بيضحك عليا علطول وبكلمه براحه برده بيتحجج انا بفكر اطلق بصراحه لاني اتفاقي معاه من الاول انه ميسبنيش لوحدي واني اسافر معاه انا تعبت وحاسه انه مخبي حاجه هو في حد زيي جوزها مش رضي يبتتلها ولا انا بس مع ظروفه كويسه يعني يقدر وانا لو روحت هشتغل معاه
ماحدش عارف ظروف جوزك شكلها ايه كبري دماغك وماتخربيش بيتك بنفسك طالما انه مش مقصر معاكي انت وابنك في شيء وبيجي لكم في الاجازات مثل بقية الناس صدقيني بعرف واحد صاحبي مشكلته زي المشكلة بتاعتك متغرب عن زوجته وأولاده عشان يوفر لهم العيش الكريم ومش مقصر معاهم في شيء وكلدا ومانفعش مع مراته كل مرة تتخانق معها بحجة انها عايزه تجي هي وعيالها ويعيشوا معه والراجل ظروفه ماتسمح انه يخليهم يجيوا السكن غالي ورسوم الإقامة لها والأولاد مرتفعة جدا والراتب مايكفي للسداد تلك المصاريف ابدا حاول معها ان تقدر تلك الظروف ولكنها رفضت وفي الاخر حصل الطلاق بينهما هل تتمنى دا يحصل معك مافيش عاقلة تقبل انها تتطلق وتسبب في خراب وهدم بيتها وضياع مستقبل أولادها
شوفي هي دي مش مشكله ولا حاجه..انا هقولك هو مستسهل إنك عند أهلك ودي اول غلطه إنتي عملتيها.فين أولا شقتك لو قعدتي فيها ممكن الوضع يتغير ولو ما فيش شقه اول حاجه تفكري فيها الشقه عشان حقك.ثانيا ما تفتحيهوش خالص في موضوع السفر وحاولي تفكري في نفسك وابنك وابعدي الشكوك من دماغك.ولو بتشكي فيه كفاية طفل واحد دلوقتي لحد ما تطمني خالص وحاولي تقللي التليفونات شويه و الاهتمام ولو لاحظ حسسيه إنه ما فيش حاجه والتقصير من عنده وخليكي زكيه واوعي تفكري في الطلاق بالعكس شوقيه ليكي بذكاء ابعدي شويه وقربي شويه بس باعذار مقبوله يعني نايمه الواد تعبان ما سمعتش التليفون كل ده هيخلي تفكيره فيكي الضعف وهو اللي هيجري عشان يسفرك.جربي ومش هتندمي عن تجارب كتيره وجابت نتائج هايله…وربنا يخليكوا لبعض ويصلح حالك.