انا اب لأبن داخل تانيه كلية هندسة وهو مستواه متوسط فى الدراسة من حوالى سنه شكيت انه بيدخن لكن الشك ده راح بسرعه لأنى طول عمرى بثق فيه وفى تفكيره بصراحه انا شميته حوالى مرتين طول السنه دى لكن من حوالى اسبوع لأيت علبه سجاير فى شنطه الكلية بتاعته بس كانت العلبه فاضيه !! اتكلمت معاه انكر انه يعرف عنها حاجه وبمجرد صدفه عرفت من واحد صاحبه انه بيشرب من 3 ثانوى وعرفت الكلام ده تانى يوم العيد فقررت انى مخلهوش ينزل عشان ابعده عن اصدقاءه اللى بيدخنوا انا كل اللى انا عايزه طريقه صح اساعده بيها فى الابتعاد عن هذه العاده السيئه اللى بتدمر الصحه مع العلم انى مش مدخن واسف على الاطاله
انا يجدعان ف 2ثانوي وبشرب سجاير بقالي سنتين وانا مخنوق جدا جدا نفسي حد يرد عليا بسرعة
الشدة لا تجدي، بل الحديث ومحاولة التأثير عليه بالإقناع بالحجة والدليل ونماذج لنهاية بعض المدخنين. وأكون أنا قدوة صالحة له بعدم تدخيني، واختيار رفقة صالحة تعينه على الإقلاع والمهم شغل فراغه بأعمال نافعة لأن الفراغ يجلب كل المفاسد و المراقبة له باستمرار دون أن يحس وهذه هي الرعاية. وأخيرا كن صديقا له وصاحبًا ليثق فيك ويصارحك ومن ثم يستجيب لقولك ونصحك.
انا لسه عارف ان ابنى يدخن هو ف 3 ثانوى نصحته كتير بدون فائده هولايشرب فى البيت ولامنى شممت ملابسه انكر والاخر قالى كلنانشرب يقصد زمايله فى المدرسه
ماهى الطريقة الصحيحة؟؟؟؟
انتبه لولدك من اصحاب السوء واذا خليته اصحابه بيدخنه وهو لا مستحيل بيلعبوا ع عقله وبيخلوا يدخن وانت ماحتجلس تراقبه اربع وعشرين ساعه بس ابعده قدر الامكان اجلس معاه اتفاهم بس مو بمهاوشه وشكرا
التدخين لمايكون فيه افراط يعنى يدخن في اليوم 3علب او4 داجنون ودمارللصحة اماالانسان يدخن علبة اوعلبتين ومهتم في صحته ومحافظ عليها لامشكلة في هذا وانالي 25سنة وادخن في اليوم علبة ونص وصحتي ممتازة ولااعاني من اي مشاكل ومنتظم في حياتي
السلام عليكم اخي من تجربتي المدخن اولا يعرف ان التدخين مضر بالصحة ويعرف انه ليس بشيئ ولكن عدم اكتمال شخصيته يضعف امامه ويرى من يدخن امامه رجل مقبول عند الناس وهويشعرانه ليس كدالك فيغفل وينوي التجربة وعدم اخده صديق وبعد مرور الوقة وعدم فهم شحصيته تصبح السجارة اهم من الاصدقاء واهم من كل شئ فهي عنده تضحكه وتبكيه وتنشطه ويتخيل انه مع التدخين يجد حلول في هده الحالة يجب عليك ان تتعامل مع ابنك كانه رجل وقادر على ان يصبح شخصا مفكرا وعبقريا لكي تخرجه من العالم الخيالي الدي يعيشه مع التدخين وعليك بتحبيبه في الصلاة ومع الجماعة لانه سبب كبير في الابتعاد عن التدخين وبالتجربة والله الموفق والله الهادي االسلام عليكم
السلام عليكم اولا انا اخصائية نفسية احب اقول لحضرتك ان ابنك مش صغير علشان تحبسوا بلعكس لو اتقربت منوا واتكلمت معاة ومشيت معاة خطوة بخطوة هيبقى افضل الشدة مطلوبة بس مش فى اى حاجة المهم اتكلم معاة وفهموا ان دا غلط مرة واتنين وتلاتة بلاش الشدة لان الولد فى الفترة دى بيبقى محتاج مساعدة وكلام اتعرف على صحابوا مش تمنعوا عنهم واتكلم معاهم هما كمان صدقنى الكلام هيجيب نتيجة اكتر لان الشدة بتولد عند شديد جدا وساعتها الكلام مش هيجيب اى نتيجة لو وصل لمرحلة العند
أبنك فى تانيه جامعة وغالبا هيعمل اللى فى دماغه
حاول تنقد موضوع السجاير والتدخين وكدا ادامه بعيدا عن موضوعه
يعنى تتكلم عن خطورة السجايرة بشكل عام
بس اختار الوقت يعنى مش تيجى ساعة ماتش برشلونى ومدريد وتقولو السجاير
لا ممكن مثلا كل يوم تقولو واحد صحبى مات من السجاير
واحد فلان جاله سرطان
فلان مبيخلفش
ارعبه ههههههه
أولا حكاية تحبسة دي مش هتجيب إلا نتيجة عكسية أخويا بابا عمل معاة كدة شرب خمرة و حشيش و نسوان فالحل الأمثل إنك تسايسو يعني قولو إنت بتشرب سجاير يا حبيبي طيب مشوفكش بسجارة و لا أسمع أنك بتشرب سجارة بالأدب لقيتة بيشرب سجاير كلمة تاني أفضل كلمة لما يزهق و بعدين عشان تبقي عارف السجاير مش إدمان انا والدي قعد يشرب سجاير 40 سنة ولما قال هبطل بطل بقالوا 8 سنين و صحتة زي الفل أنا عارف إنت خايف يوصل للمخدرات أحب أطمنك القرش بقي ب400 جنية و مش هتلاقية هههههههههههههه يعني مهما عمل مش هيلاقي مخدرات و متمسكلوس علي حاجة بسيطة
حسسة بالخطاء من غير ما تعرفه انك تعرف انه مدخن قولى كيف
مثلا احكى له عن ان صديق لك عرف انه ابنه يدخن سجاير فقولت له دا لو ابنى عمل كده لا مش معقول ابنى يعمل كده دا ابنى بيحافظ على صحته كويس دا ابنى ما يعملش كده ابداوحسسة انه افضل من شباب كتير ويثق فيه جيدا وكن صديق له وتقرب منه
ممكن انك تقعد معاة وتكلمة براحة فى الصوت وبشدة فى الكلمات وتعرفة ان كدة هيضعف صحتة وهي فى اتجهات اخرى مثل المخدرات ودة حاجة هضيع مستقبلة وتشوف اية بيحبةفى مقدورك تحقق لية و توعدة انك تحققة لية من بعد ماتخلية يوعدك انة يبطل السجائر وتعرفة انك واثق فية وانك واثق انة هيبطل وتحددو ميعاد لابطال السجائر وعوض علية بى بمبون او لب و عصائر وحاول تحدد لية ميعاد مايتاخرش عنة باليل وكل يوم اقعد معاة شوية اتكلمو فى اى حاجة وشاركو فى اراء تخص شغلك وحسسة انك تعبان فى الشغل علشان يحس ان الفلوس مش بالساهل وماتعيرهوش انك بتصرف علية بالعكس عرفة ان دة وجبك لغاية لما يعتمد على نفسة…….
فقط ماعليك الا بشيء واحد ياخدك له سيدنا النبي عليه السلامانك تجد اصدقاء صالحين يكون وقت فراغه معهم.يقول الرسول عليه السلام المرء على دين خليله فلينظر احكم من يخالل.فانت جد له صاحب طيب يصلح حال ابنك ربنا يخليلك اياه امين
كان الله في عونك ويسر لك حفظ أبنائك بحفظه الذي لا يرام ويكلأهم بعينه التي لا تنام وأن يرد عنهم كيد الكائدين. لي ملحوظة بعض الأبناء لديه حياء في فعل الخطأ نظرا لإحترامهم وتوقيرهم لأبائهم لذا يفعلون ما يفعلون بقدر هين ولكن عندما يسقط ستار الحياء بمعرفة الأهل لما يفعلون تزداد الجراءة على فعل المنكر لذا أجد أن منهجك يتوقف على ماهية العلاقة ولربما بينت بالكلام الغير مباشر بالتحدث عن آخرين يفعلون ما تشك فيه وأنك تحمد الله أن رزقك بأبناء بعيدون كل البعد عن هذه الموبقات والمنكرات ومناقشة الأمر لمعرفة نظرة الأبناء بصورة غير مباشرة ورأيهم هل يفعلون ذلك وأنت تنفق عليهم أم لا أم بعد أن يستقلوا بحياهم طبعا عن طريق ماذا تفعل لو كنت مكان فلان وأنظر لما يطرحونه من حلول. سواء بتغيير الصحبة أو التعهد بالتوبة أو غير ذلك وكيفية تقوية العزيمة لعدم الرجوع عن طريق الهداية والبعد عن التدخين. ولكم مني خالص الدعوات بأن يرزقك الله حسن كفالتهم وأن ينبتهم لك نباتا حسنا.
قولة التدخين ضار بالصحة ويسبب الوفاة
ابنك كبير و كمان مش لسه مستجد ع الشرب يعني لو امرته لن يطعك الحل من وجهة نظري :
1-تعرفه انك عارف انه بيشرب سجاير و تخليه يشرب في البيت قدامك .
2-تخليه يقلل من عدد السجاير .
3-تشيله مسؤليه عرفه قيمت الفلوس و عرفه هوه بيصرف قد ايه ع السجائر .
4- وهي الاهم حاول تقربه من ربنا انزل صلي مثلاً وخده معاك روح دروس دينيه وخده معاك .
5-حاول تقنعه انه يبطلها و يبعد عن اصدقاء السوء ولو تعرف تعرفه علي اولاد اصدقاء لك لتعوضيه عن الاصدقاء الفاسدين.
وربنا معاك
مش كل المدخنين بيعانوا من الاعراض دي .. خصوصا اللي بيبدأوا التدخين متأخر .. اللي يبدأ 17 او 18 سنة يعتبر متأخر .. انا مفتكرش اني كنت بعاني من حاجة لما ببطل .. شوية توتر خفيف بس .. ياريت تديله احساس انك واثق فيه و ان شاء الله ربنا يهديه و يبعده عن العادة دي
انا لحد دلوقتى مش معرفه انى عارف انه بيدخن والغريبه انه طبيعي جدا من يوم مامنعته من الخروج مش باين عليه اعراض الانسحاب اللى المفروض تبان لما ينقطع فجأه عن العاده المدمره دى
وتانى حاجه انا عارف انه لو مدمن حيدخن لو لوحده بس انا خايف انى لو مستخدمتش معاه العنف مقدرش اسيطر عليه لأنى شفت ناس كتير اوى عانت من التدخين طول حياتها وبعدين بالنسبه انى بعدته عن اصدقائه دى حاجه مؤقته انى احاول ابعده عن المدخنين التانيين يمكن يكون عنده استعداد يبطلها
دي تجربتي الشخصية. امي عرفت اني بشرب سجاير و انا في تانية هندسة برضه. و سألتني و قولتلها اه بشرب. قالتلي بتعمل كده ليه؟ قولتلها غلطة وقعت فيها و هحاول ابطل. قالتلي انا واثقة فيك و عارفة انك هتبطل و انتهى الحوار على كده. و قالت لأبي و هو مقاليش انه عرف. بس مرة جاب علبة سجاير و قالي اذا كنت هتدخن دخن سجاير نضيفة عشان صحتك. بيحرجني بالادب يعني. و سابني برضه مقاليش حاجة. بس اللي الاتنين عملوه انهم حطوني في موقع المسئولية قدام نفسي. و كرد فعل لا ارادي حبيت اكون قد المسئولية و بطلت سجاير و رجعتلها و بطلتها و رجعتلها و بطلتها و هكذا دخلت في حرب مع نفسي طول فترة الكلية عشان ابطلها. و رغم اني فشلت كذا مره بس بطلتها فعلا في النهاية و انا حاليا متخرج من تلت سنين و حتى لو شربت سجارة بتكون من باب التهريج. نصيحتي ليك انك تحط ابنك في موقع المسئولية لأن ده الحل الوحيد و اصبر عليه و طول بالك. أي حل تاني مش هيجيب نتيجة لأنه كبر و مش هتقدر تراقبه. خليه يراقب نفسه احسن. و ربنا يهديه
اسمع يا عم الحج , انا كنت زى ابنك كده بس يمكن ماجتش اللحظة اللى حد ممكن ياخد خطوة زى دى معايا , الفكرة ان الاسلوب اللى انته طرحته هنا ده اسلوب مش صح او بالاحرى مش هيمشى مع واحد فى سن ابنك , انته تفهمه بالعقل انك عاوز تقعد معاه قعده رجاله , ومن خلال الكلام تبص فى عينيه وتقولوا , والله وكبرت يبنى وبقيت تشرب سجاير , وتبتدى تنصح فيه انا عندى ليك حل جنان يا رب يمشى مع ابنك , فى فيلم فيديو بيبين اضرار التدخين عاليوتيوب, انا اللى هو انا بادخن من 15 سنه كنت هابطل من كتر ما اتاثرت بيه , بس بعد اللى انته ذكرته انه بيشرب من 3 سنين يعنى كل سنه وانته طيب وما فيش فى ايدك الا السياسة والنصيحة وغير كده انسى انك تأثر عليه , يعنى بالمنطق اللى هو يفهمه كلمه بيه او ……. ما تفتحش الموضوع من اصله لانك لو فتحت الموضوع وما جبش نتيجة هيبتدى يدخن فى البيت وهيقرفك
بس اللى انا حسيته ان ابنك حاسس بنقص من ناحيتك , حاول تقرب منه حتى لو ما بطلش سجاير كون صاحبه , ابنك كبر يا عم الحج .. بيعين الله , عندنا فى غزة الشباب بيدخنوا صاروا على 15 سنه , نفسه الواحد فى علاج للبلوة المسيحة دى..
انا من راى انك متستخدمش مع الاسلوب دة عشان دة اسلوب غلط انك متخلهوش ينزل وتبعدة عن اصحابة متزعلش دى حاجات قديمة اوى انت فاكر ان كدة مش هايشرب لا بالعكس دة هايعند اكتر ويشرب وانت فاكر لما تبعدة عن كل حاجة مش هايعرف لا هايعرف يشرب وانت كمان متبقش عارف انت المفروض تتكلم معاة براحة وتنصحة وتسيب يعمل اللى هو عاوزة يخرج وكدة بس انصحة وحاول تتخذ معة اسلوب انك زعلانة منة بس سايبة برحتة وهو ممكن يتغير ويحاول يصلحك وانت تقولة انت عاوز تصلحنى توعدنى انك تبطل تشرب هو ممكن يسمع كلامك بس لو سمحت بلاش اسلوب العنف دة
انت حسستنى ان ابنك ده طفل ده واحد فى تانية جامعة يعنى الحبس فى البيت ده مش هيجيب معاه نتيجة و بعدين هوة خلاص ادمن السجاير مع اصحابه بقى مش معاهم كدة كدة هيشرب و انت اكيد مش هتراقبه اربعة و عشرين ساعة