انا لسة فكة خطوبتى ييجى من يومين بس..مع انى كنت بحبه..تصرفاته كانت زى تصرفات البنت اللى بتحكى من ناحية البرود فى التلفون وانه مش بيحسسنى انه فرحان بمكالمتى ولا حابب يطول فيها بل بالعكس كان ساعات يقولى على فكرة انا مشغول وكان ساعات لما اكلمه وهو لسة راجع من الشغل يقولى المفروض يكون فى تمييز انا لسة جاى..وكان مينتهزش اى فرصة عشان يتصل بيا او يزورنى حتى لو انا اللى اقترحت المناسبات اللى نقدر نخرج فيها كان دايما يطلع بحجة تعبان او اى حاجة وميجيش كان بينا المكالمات روتينية جدا ازيك فينك ويقفل وخلاص..بس فى فرق عن صاحبة المشكلة فى حاجتين الاولى ان اللى كان خطيبى كنت بخاف اتكلم معاه براحتى عشان كان دايما بيزعل من الكلام حتى لو على سبيل الهذار وزعله دة مش قمصة وقتية لا كان ممكن تقعد بالتلات او الاربع ايام مقموص وكان لما يبقى مقموص ومعاد زيارته الجمعة ييجى كان يتصل بيا يقولى على فكرة انا مش جاى ويقول اى حجة ويتصل بيا على اخر النهار يوم الجمعى يقولى ما صدقتى يعنى مفيش محاولات منك انى اجى ..وكان من النوع السى السيد اللى لما يتعصب يزعق جامد ليا فى التلفون وفضلنا كدة فترة يوم حلو وعشرة لا على فكرة كان ساعات فى ايام حلوة بس دى لما كان يبقى رايق ونايم كويس ومش تعبان وانا لابسة اللى ع الحبل وعمالة احسسه ان مفيش زيه لكن اول ما نبتدى نتكلم شوية جد ورأيى يختلف مع رأيه او كلامى ميعجبوش يتقمص تانى ويكشر وصعب تلاقيه يفك ويضحك تانى الا بعد محاولات كتير وننسى اللى الشىء الجد اللى كنا بنتكلم فيه وعشان كدة لمدة 7 شهور مكناش انجزنا اى حاجة خالص لان كل مناقشة كانت تنتهى بخناقة ولانى مكنتش عارفة اتكلم معاه لا فى تلفون ولا وجها لوجه طبعا لان كل ما يتقمص مبيجيش ..وفركشنا مرة بسبب الغلط ولما شاف شبكته قدامه بقى يعيط ويقول مقدرش استغنى عنها لكن تانى يوم اول ما عرف اننا مستعدين نرجع بقى مش ملهوف ولا حاجة حتى معتذرش ولما مامته وباباه جم يرجعوا الحاجة تانى متكلمش ولا كلمة ومامته وباباه اللى بقوا يقولوا حقك علينا وحتى مرضيش يقعد معايا عشان نصفى اللى بينا انا بعدها طلبت منه قوللته لازم تقعد مع بعض قعدة طويلة بقى يقول ان شاء الله وعشرين يوم فاتوا ومجاش فى مرة يقولى نتقابل ونتكلم ومعاملته كان اه مفيهاش غلط بالالفاظ بس كانت ناشفة جدا معايا وباردة وكان فيها بردو كلاشات وقفشات من اول يوم رجوع..بصراحة صعبت عليا نفسى انا اللى دايما عايزة احل المشكلة انا اللى دايما اقوله انا صعبان علينا فترة خطوبتنا دى تضيع يلا نتكلم ونصفى وهو ولا هنا..فركشت للمرة التانية بردو عيط وانهار وانا بردو مرضتش وكل شىء خلص..قولولى انا اخدت قرار صح؟
هو غالبا طالما بيوصل إنه يعيط عشانك يبقى بيحبك بجد
بس هو واضح إنك فاهماه غلط وهو فاهمك غلط لكنه بيحبك بجد
اتكلمي معاه وخدي منه وعود
اطلبي منه الطلبات اللي انت قولتيها هنا
خليه يشوف الكلام بتاعك ده ويشوف ردود الناس عليك
بس متنسيش إنك ممكن تكوني ظالماه
لأن البنت وقت الغضب بتكون غير حيادية بالمرة مهما كانت عاقلة وقت هدوئها.
أقولك حاجة انا اللى عايزوه منك وديه قاعدة عامة قبلى ماتخدى أى قرار فى حياتك فكرى حطى أودامك أنك عمرك ماحترجعى فيه ده حيدفعك أنك تفكرى مرة واتنين وتلاتة.
أما اذا جينا للنقطة التانية فى صحة القرار من خطئه …..
1= مش ممكن يكون بسبب ضغط شغله مثلا بدليل انه كان بيعدى عليه أوقات رايق فيها.
2-هل أنتى حاولتى تغيريه بالفعل وقبل ماتخدى القرار ده حاولتى بشتى الطرق أنك تغيريه وفشلت ولا كان فى تقصير منك بصراحة ؟؟؟
3-هل حاولتى فعلا تعدى معاه وتقوليلوه ان فى حاجات أهم من مسائل الزعل ديه وفى مستقبل
4-هل حاولتى تتأقلمى على طريقته ومعرفتيش وفشلت الحكاية معاه
5-هل طريقته مبتتغيرش وفشلتى وتعبك ووصلتى لأن العيشة بينك وبينه فى المستقبل حتكون مستحيلة يهالطريقة
.//////اذا بالفعل عملتى كل ده وفشلت المحاولات فبالفعل ماتندميش لأن قرارك صح ومفيهوش خطأ بأذن اللــــــــــــه واذا ماكنش ناتج عن تسرع
وشكرا
انت صح الصح لا تندمى لأنك كنت هتتعبى معاة
قرارك صح … يابنتي انتي هتتجوزي ولا تحاربي … ده انسان مريض .. احسن انك سبتيه من دلوقتي بدل ماكنتي تندمي بعد فوات الاوان
بصراحة رغم انى راجل زيه بس بقولك قرارك صح جدا معلش لكن اللى مش مستعد يتكلم فى حوار جد من دلوقتى هيعمل ايه بعد الجواز هوا ينهار لما تبعدى عنو ولما يعرف انك جنبه ميدلكيش اى اهتمام اعتقد ان الحب لوحده مش كفاية عشان تكملة جواز بحد ذاته لازم يعرف يتناقش ويهتم حتى بعد الجواز فما بالك انه مش مهتم فى الخطوبة انا طبعا مقصديش اى شر لكن الاحسن كل واحد يروح لحالو بدل مالماشاكل تزيد وربنا يرزقك بالزوج الصالح
فترة الخطوبة دى عشان تدرسى خطيبك وهو كمان يدرسك,وبيبان فيها القبول والتفاهم والرضا والقبول وانتى من دلوقتى ومفيش تفاهم ولا اهتمام خالص امال بعد الجواز هيعمل ايه,دى مش افعال واحد بيحبك خالص,سيبيه
والله انا شايفة ان خطيبك انسان كويس بدليل ان عمرة ما غلط فيكي بس كل اللي بيحصل ان انتي مش عارفة مفاتيح شخصيتة,,,,, حاولي تتاوصلي معاه بطريقة مختلفة وقبل ما تتكلمي معاه لازم تصفي نفسك مش تبقي مستنية منة رد فعل زي اللي انتي متعودة علية,,, حاولي تنسي اللي حصل منة وتبداي صفحة جديدة وتعرفي ازاي تتكلمي معاهوباكد تاني حاولي تعرفي مفاتيح شخصيتة واتكلموا مع بعض في مواضيع بيحبها وتبعدوا عن الكلام في المشاكل لحد ما يقرب منك اوي ويبدا ساعتها يفهمك ويحس بيكي