السلام عليكم , انا رايحه تالته ثانوى ان شاء الله وجيبت فى تانيه 89% وطبعا هحول ادبى عشان مجموعى .. انا كل استمتاعى انى اقرا عن التوحد والاكتئاب والشيزوفرينيا والوسواس القهرى والادمان .. وبما ان مجموعى مجبش طب ف حلم حياتى دلوقتى انى ادخل اداب علم نفس
بس كل الناس اللى اعرفها ف حياتى بلا استثناء رافضين الفكره تماما وشايفين ان دا ضعف منى وكله بيقول اداب دى بتاعت الفاشلين ومش هعرف ابقى حاجه .. انا عندى استعداد اتمسك بحلمى واتحدى كل الناس بس خايفه ادخل معرفش اعمل حاجه فعلا بعد كده .. وكمان معرفش حد دخلها عشان اسأله .. ف قولت اسأل هنا يمكن حد ينصفنى 😀
مشاكل الثانوية العامة
ادخل اداب علم نفس ولا هبقى فاشله ؟
اضيف بتاريخ: Tuesday, August 21st, 2012 في 11:41
كلمات مشاكل وحلول: الثانوية العامة, كلية الاداب
انا خلصت تانيه ثانوى وان شاء الله داخله تالته ثانوى انا الحاجة الوحيدة اللى بحبها هى القراءة وخصوصا علم النفس وحلمى انى ادخل حاجه تبع علم النفس بس خايفه ادخل ماقدرتش احقق الله كنت عايزها المشكلة الأكبر انى مش عارفه اختار أنهى تخصص خايفه اغلط وارجع اندم خصوصا انى متردده جدا وكلام الناس عن المجال دا بيرددنى اكتر ممكن حل لمشكلتى…
انا عامل حسابي ادخل ادبي واداب قسم علم نفس برضو انشاء الله بس سؤال هو انا ممكن اطلع دكتور نفساني منها؟
آداب بتاعه الفاشلين !!!!
اولاً مفيش حاجه اسمها كليه فاشلين وكليه متوفقين
انا مش بؤمن بالكلام ده
أنا بؤمن أن فلان بيحب تخصص معين وعلشان كده دخله
شوفي انتي حابه ايه واستخيري ربنا
وانتي تلحقل كل أقسام آداب ان شاء الله بس خلي بالك كل جامعه وليها شروطها في الآداب
مثلا القاهرة وعين شمس كانت بتشترط تكوني جايبه 50 في علم النفس حاجه زي كده “مش متأكد”
إنما حلوان”جامعتي”كانت عاوزه على الأقل 311 لانتساب و 300 حاجه وتلاتين لانتظام ..بالمجموع الكلي للسنه دي
شوفي الأول القسم اللي عاوزاه وشروطه من حد في الجامعه ده مهم جداا
احب اقولك حاجه…مهما كان المجال اللي هتدخليه….أجتهدي فيه علشان تكوني الأول ومترضيش بأقل من كده 🙂
وربنا يوفقك في المجال اللي هتدخليه
لأ طبعا ادخلى اللى انتى عايزاه لو دخلتى اللى هما عايزينه صدقينى هتتعبى جدا وممكن كمان تفشلى لأن دة مش التخصص اللى انتى حباه وبعدين مين قال ان ادبى للفاشلين دة بالعكس اللى بيدخل ادبى دة وبالذات لما يكون علم نفس هيفيد ناس كتير اوى فى المستقبل وهيعالج امراض نفسية كتير وهيحول حياة ناس كئيبة اوى لحية سعيدة اوى وساعتها ربنا هيتبسط بيكى اوى وهتبقى دكتورة شاطرة ومشهورة واهلك نفسهم اللى كانوا ضدك فى الأول هيفرحوا بيكى اوى وهيندموا على اللى فات وطبعا اول حد تستشيرى فى الموضوع دة هو ربنا لأن هو اللى عارفلك الأفضل. وشكرا.
بسم الله الرحمن الرحيم :
* توكلي على الله ، و لا يهمك رغبة حد : رغبتك و حلمك أهم . إيه فايدة تدرسي حاجة انتي مش حاباها ، لما ممكن تدرسي حاجة بتحبيها ؟
*** و الله أعلم ***
طيب انا هقولك على حاجة انتي مجموعك كويس ولو عليتي في تالتة فمجموعك هيجيبلك حاجات كتير فاول نصيحة ليكي تركزي اوي في الدراسة علشان مجموعك يعلى وتختاري براحتك تمام اتفقنا وانتي في تالتة هتاخدي علم نفس وهتشوفي المادة فهتعرفي تقيمي كويس بالنسبة بقى للكلية عايز اقولك ان الاهل ساعات بيبقوا السبب في فشل اولادهم من غير مايحسوا وفي الحالة ديه لازم المواجهة يعني لازم تقوليلهم ديه رغبتي وانا عايزاها ومن غير ما تزعلوا مني لان ده مستقبلي الحاجة التانية الي عايزك تفهميها ان اداب علم نفس مجال عملها ضيق اوي يعني يا اخصائي اجتماعي يا مدرسة يا مجال الجامعة وانا اعرف واحد صاحبي قريبته كانت نفس موقفك المهم دخلت اداب علم نفس وتفوقت فيها وجابت تقديرات الاربع سنين واتعينت معيدة وبتحضر ماجيستير وتلاقيها دلوقتي خلصته كمان تمام وطالما انتي بتحبيه فان شاء الله تتفوقي فيه ومقياس اهلك غلط يعني عايز اسئلك دلوقتي مستشار الرئيس حاليا ده خريج ايه خريج حقوق الي هو المستشار محمود مكي ووزير العدل ده خريج ايه خريج حقوق الي بتاخد من 70% بس هما دخلوها وتفوقوا فيها ودلوقتي مركزهم ايه في الدولة وواحد صاحب والدي كان علمي وحصلتله ظروف فجاب مجموع قليل ودخل حقوق وتفوق فيها ودلوقتي هو رئيس محكمة فالمقياس مش بالكلية لا المقياس هو الشخص نفسه فانتي تركزي انك تجيبي مجموع وحاولي في خلال السنة تقنعي اهلك وابحثي في كل الكليات ومجالاتها وبعد لما تخلصي شوفي ايه الكليات المتاحة ليكي واستخيري ربنا واختاري وربنا يوفقك ان شاء الله
استخيري ربنا وشدي حيلك وربنا هيكتبلك الخير