الحب الاول

اتقدملي وسبنا بعض لكن لسه بحبه وبنتكلم

يا جماعه انا قررت افضفض لاني تعبت
بدايه الموضوع انا بنت الحمد لله بشهاده الجميع محترمه ومتربيه ومؤدبه واعرف ديني كويس وجميله ده كلام الناس انما انا شايفه اني ولا شئ المهم انا عموما عمري مكلمت ولاد الحمد لله ولا ليا في الجو ده
انا اتقدملي انسان صاحب اخويا كلمني في الاول قلتله انا مليش لا في المشي في الشوارع ولا في جو التليفونات وعلي متفرج دي قالي انا شاريكي وانتي عجباني وانتي الجوهره اللي انا كنت بتمناها وانا حكلم والدتك
المهم تمام جدا هو انسان محترم قوي ويعرف ربنا وذوق جدا وجنتل قوي ووسيم وطالب في كليه مش اي حاجه وكان فاضله ترم ويخلص
بالفعل كلم ماما واتفق مع ماما اننا لازم نتعرف علي بعض الاول ماما قالتله لازم اسئل ةاعرف كل حاجه بالفعل قالها وحكلها علي كل شئ وتمام التمام
ماما قالتله لازم اقوله لوالدها قال ماشي وانا عايز اتعرف عليها بعدين بابا وافق يكون التعارف بحدود بس وحده وحده اخد تلفوني وبقي بيكلمني ووالله كان ادب واخلاق ومتعدناش اي حدود ادب احنا كنا في حكم المخطوبين والناس عارفه كل حاجه بس اضطر يسافر محافظته لان والده تعب جامد جدا وهما عندهم شغلهم الخاص اللي شغالين فيه وبرده كان بيكلمني وانا حبيته لدرجه الجنون انا بحبه بجنون بجد وهو اللي حبني الاول
لما ابتدي ينشغل عني ابتدت المشاكل بسبب الشك بيحبني بيتهرب مش عجباه مكسوف يقولي بيضحك عليا وده ماما كانت بتقوله بستمرار لدرجه من كلام ماما ابتديت اطارده بالتلفونات من الخوف ومراعتش انشغاله شكي وخوفي وحبي ليه خلاني مشفش او انسي انه انسان مسؤل عن امور كتير قوي وشغل وهو ياقلبي كان فاضله ترم ويخلص واضطر ياجل السنه وده وجع قلبه جدا ابتدي يتعصب ويضايق واهتمامه يقل ومش طايق كلمه ولو طلب مني حاجه وانا رفضت او اتناقشنا بتقلب ليله وخناق لحد ما زعلته انا في يوم والله من غير قصد مره كان عايز ينام قالي انا بكلمك علشان متزعليش وكررها كذه مره قلتله لاء لما تحب تكلمني كلمني لو مش عايز متكلمنيش قالي اعملي اللي تعمليه لان انا زهقت انتي مش مرعايه ظروفي والله مراعيه هو اللي عصبي جدا من ساعه ما نزل الشغل مع والده انا عارفه انه بيتعب بس ماما الله يسامحها زرعت الشك والرعب في قلبي

بعدها لمده يومين اكلمه ميردش ابعت رسايل ميردش لحد ما رد قالي انا هنا لمده 3 شهور او 4 لحد ما انزل تاني الكليه متكلمنيش هنا اهلي والناس والشغل قلتله يعني انا حفضل تحت امرك لحد ما انت ما تقرر قالي هو كده لازم نبعد بقي وبعدين نقرر ماما سحبت التلفون وكلمته وبعدين قالتله انت وهي اخوات انا صوت وانهرت ومت واتسرعت لما ماما قالتلي ده بيتهرب رغم انها سئلته بنفسها قبل كده قالها يا طنط انا شاريها وعايزها وديما كان بيضايق مني لاني بقول لماما كل حاجه بس كان غصب عني كان اول تجربه ليا وماما كانت بالنسبالي كل حاجه وكنت بحس ان ماما بتغير شويه اني انشغلت عنها بس انا مقصدش واانا سئلته انت مكسوف تقولي اني مش حنفعك قالي ده انتي تستهلي اللي احسن مني وانا مش حلعب بيكي يا بنتي ده جواز وانا بحبك ووو
المهم باقي اليوم الاسود اللي لما ماما قالتله اخوات وانا اتسرعت وقلتله لو مكسوف قولي انك مش عايزني قول اننا مش حننفع بعتها في مسدج ورنيت عليه كنسل 3 مرات انا ميت كلبه مش ابطل ارن لاء ازاي من كتر ما ماما تقولي كرامتك مش عايزك رنيت تاني رد قالي انتي تستاهلي واحد احسن مني مش حينفع
كنت بموت لمده 3 ايام لحد ماكلمته تاني بسبب موضوع مهم ومقدرتش امسك نفسي قلتله انت خلاص بجد قالي مش عايز اتكلم في الموضوع تاني قلتله طيب اديني فرصه قالي ربنا يصبرك وتنسيني قلتله انا لسه بحبك قالي زي ما ماما ما قالت حبيني زي اخوكي انهرت وتعبت
ماما كلمته بعد 10 ايام لما ماما عرفت انها اتسرعت وانها خلتني اشك فيه واتسرعت قالتله كده متسئلش عليا قالها والله يا طنط انا مشغول في الشغل ومطحون وحقك عليا
تاني يوم اتصل عليا وكلمني وقعد يرغي معايا لمده ساعه ونص وسالني علي الكليه بتعتي وعامله ايه وصحتي بجد كلمني كتير بس مجبش سيره الموضوع بتعنا
عدي يومين تلاته كلمني تاني وبيكلمني كل 5 او 6 او 3 ايام برده كده باي حجه اخويا موضوع ما كده بس مش بيكلمني في موضوعنا حتي اني لمحتله اني تعبانه بسبب انه بعيد عني توه كده في الموضوع
وواحد يعرفه ويعرفني حاول يصلح قاله انا لو لفيت الدنيا مش حلاقي زيها وانا بحبها وبموت فيها بس هي ليها عيوب صعب هو عمتا من النوع اللي مش بيقول حاجه لحد وقراراته من راسه وبس حتي كان بيقولي انتي الانسانه الوحيده اللي بستشرها في اموري انا مش من النوع ده
المهم هو بيتصل بيا وبماما من فتره للتانيه انما مش عارفه باي صفه معرفش حتي انه اتصل عيد علي ماما وكان فرحان قوي انها بتكلمه وبتهزر معاه وعيد عليا وكان مبسوط برده انه بيكلمني انا حتجنن هو بيكلمنا ليه طيب لسه باقي عليا ؟؟ طيب ليه لما عرف اني تعبت لاني مريضه وكده زعل وقالي كلي وخدي بالك علي صحتك ؟؟ طيب ليه بيتحجج وعامل شويه امور حجه علشان يكلمني ؟؟
انا بحبه جدا وبصلي كل يوم وبدعي ربنا يكتبهولي يعني بيتصل بيا ليه طيب وبيكلم ماما برده ليه ولما المحله اني تعبانه بسببه مره قالي يا باشا شد حيلك اتحمل ومره قالي صلي ركعتين وحتبقي زي الفل
اعمل ايه انا حموت بجد انا شرياه حتي حصل ان اخويا جه قالي انه حيخطب بعد العيد انهرت وعيط وقلت اكلمه اباركله واتاكد لما قلتله مبروك قالي علي ايه قلتله خطوبتك وانا ماسكه نفسي من العياط راح مزعق جامد وقالي مين اللي قالك الهبل ده قلتله اخويا راح ساكت ومضايق وقالي براحه لا يا ماما مفيش حاجه من الهبل ده متصدقيش الكلام ده وفعلا سئلت ناس تعرفني وتعرفه قالولي لاء هو مش حيخطب ولا ارتبط هو مموت نفسه في الشغل واخويا طلع بيستهبل عليا
انا حتشل وحموت وعايزة افهم بقيواعمل ايه اتصرف ازاي قلولي ارجوكم اسئله وخلاص انا ايه انا منهاره بجد تعبت خصوصا ان البيه النهارده الصبح لقيته بيكلم واحده اجنبيه بيقولها هاي لف وهي مردتش عليه انا لسه معايا بسورد الفيس بتاعه هو مغيرهوش ومعايا بسورداته كلها ومنهم باسمي معيرهومش انا تعبت انا مبقتش فاهمه ياتري لما تجاهلته شويه قرر يكلم بنات ؟ انا اعمل ايه بجد حموت ارجعه تاني ازي وهو اصلا بيكلمني من وقت للتاني طيب انا حتجن انا اييه

مشاكل وحلول ذات صلة

اضيف بتاريخ: Saturday, June 22nd, 2019 في 17:18

كلمات مشاكل وحلول: , , , ,

ردود to “اتقدملي وسبنا بعض لكن لسه بحبه وبنتكلم”

  1. ابوالبتول
    23/06/2019 at 06:05

    شوفي يابنت الناس انا هجيبها لك من الاخر الولد دا عاوز يتسلى بك ومش بتاع جواز دي الحقيقة اللي لزوم تعرفيها وتقال لك الجواب باين من عنوانه مافيش داع للتوضيح استغل صداقته باخوك من شان يتقرب منك ويرسم عليك باسم الحب الكاذب والمشاعر الزائفة وانت صدقتيه ولو كان فعلا يحبك وصادق في مشاعره ونواياه لخطبك رسمي من اهلك ولكنه كداب ومخادع ولايقدر مشاعرك ولايستاهلك ابدا كل تصرفاته توكد كلهذا اقطعي علاقتك به نهايا وانسيه تماما واياك والكلام معه حفاظا على كرامتك وكرامة اهلك وانت الف من يتمناك يازين البنات هتلاقي احسن منه مليون مرة اوعي ترجع للكلام معه او تصدقيه بعد كل اللي عمله معاك وربنا بيكرمك بابن الحلال اللي يستاهلك ويقدرك ويسعدك العمر كله

اترك رداً أو حلاً لهذه المشكلة