السلام عليكم ورحمه الله وبركاته , انا بنت عندها 24 سنه مخطوبه لشخص على خلق ودين بشهاده جميع من عرفوه وخطيبى عنده 27 سنه بيعمل فى احدى الشركات الكبرى ولديه جميع الامكانات الماديه لاتمام الزواج بعد شهرين من الان . بس مش عارفه ليه انا متردده فى الزواج منه مع انه عطوف جدا معى وبيعاملنى بدفئ وحنيه شديده وقلبه طيب جدا ومش بيتاخر عن تنفيذ اى طلب بطلبه منه لدرجه انه ممكن يقف قدام اى حد عشان يرضينى , يعنى مثلا هو من نفس المدينه الى انا منها بس عنده شقه فى مكان بعيد شويه عن المكان الى اهلى موجودين فيه فرفضت اقعد فى شقته وطلبت منه انه ياجرلى شقه جنب اهلى عشان اكون قريبه منهم فوافق على الرغم من اعتراض اهله . انا كمان عصبيه ومزاجيه جدا وبتعصب عليه كتير بس هو بيستحملنى ومش بيحاول يناقشنى غير لما اهدى وبيحاول يعمل اى حاجه عشان يرضينى بس مشكلتى انى مثاليه اكتر من اللازم وبحب كل حاجه تكون منظمه بحب ادرس اى حاجه من جميع الاتجاهات قبل ماخد قرار لكن هو مش كدا هو بياخد قراراته بتسرع واندفاع ودا بيسب مشاكل بنا كتير . بس كل دا مش مهم المشكله انه كان بيشتغل من وهو فى ثانوى ومع الوقت بقى مدير فرع الشركه فى المحافظه الى احنا منها فمكنش عنده وقت للدراسه والشغل مع بعض فاجل الكليه الى هو فيها هو فى كليه شريعه وقانون وانا حاليا فى الماجيستير ولسه فاضله سنتين هو وعدنى انه هيكمل الكليه وفعلا بدأ يتابع الدراسه وبيحاول يوفر وقت للكليه بس انا حقيقى قلقانه من انه ميقدرش يكمل خصوصا ان كتير قالولى ان الدراسه فى كليته صعبه ودا خلانى متردده فى موضوع الجواز بس هو فهمنة الوضع بالظبط من البدايه وانا قبلت على كدا ,اسفه لانى طولت عليكم بس بليز محتاجه رأيكم اتجوزه ولا لاء
مشاكل الخطوبة
مترددة في الزواج هل اكمل مع خطيبي
اضيف بتاريخ: Sunday, October 16th, 2011 في 11:33
كلمات مشاكل وحلول: الخطوبة, الزواج, بنت, مشاكل البنات
لورفضتي الشاب العصامي الجدع اللي يكسب قوته من عرق جبينه تبقى انت امراةبلاعقل ولاتستاهل احديعبرك من الاساس ايه العبط والجنان اللي انت فيه يابنت ماتغورالشهادات ولاالماجستير بتاعك في مليون داهية توكلي على الله وتزوجي الشاب ده بلاش هبل وجنان بنات والاحتندمي طوال عمرك وهوالف من تتمناه من البنات والافكرك ايه وخلي الماجستير بتاعك ينفعك
انابعرف دكتورة كانت من اجمل النساءوافضلهن اخلاقاوادبا تقدم لهاالكثيرمن الرجال ورفضتهم بحجةانهم اقل منهامستوى في التعليم رغماانهم من عائلات مرموقة وحاول معهاالاهل لكن لافايدةمن عنادها وهي الان تجاوزت من العمر 53سنة وترغب في الزواج حتى لومن عامل نظافة ولكن بعدفوات الاوان ولااريدان يكون مصيرك مثل هذي الدكتورة
تكوني غبية وعبيطةومجنونة اذارفضت هذالشاب وحتندم ساعةمايفيدك فيه الندم خلي عنك التعالي والكبرياءاللي انت فيه واعلمي ان الشهادات مش كل حاجةياماناس عندهااعلى الشهادات الجامعية ومش لاقين اشغال وغيرمرتاحين في حياتهم توكلي على الله وتزوجي من الشاب وربنايبارك لكماويسعدكماويرزقكماالخلفةالصالحة
أختي حالتي مثل حالتك .انخطبت لشخص ذو خلق ودين وأنا مترددة لأنني خايفة أن يكون شخص غير مناسب ولاأعرف هل سأحبه أم لا .عملت صلاة استخارة كثيرا لكن لاأحس بشئ
أنا مازلت أفكر ولم أقرر بعد:/
أتمنى يكتب لنا الخير 🙂
اجيبلك من الاخر انت شايفة نفسك احسن منه عشان الماجستير وهو مش مالي عينيكي بسبب شهادته .. من جاءكم من ترضون دينه وخلق فزوجوه.. ده عن تجربه مش كلام في الفاشي .. هو بيفكر صح انت واهمه نفسك انك بتفكري صح .. هو قراراته سريعه بسبب انه مخه واعي عارف هو عايز ايه وبيعرف يدير موقفه واكيد مش هيوصل لمنصبه من فراغ رغم انه 27 سنه بس.. شوفي انت عايزةايه وانت مش مجبرة تكملي ..وهو هيلاقي الف بنت .. وربنا يكرمك
الشاب كويس ومحترم وعصامي ومكافح ايش عايزه انت اكترمن كداانتي الخسرانةلورفضتيه كبري دماغك وحكمي عقلك وتزوجي منه بدل ماتجي وحدةتانية تلطشه منك وتبقى لاطلت بلح الشام ولاعنب اليمن
سيبيه واقعدي جنب امك احسن لك واتجوزي الماجستير بتاعك
انتي انسانه مستهتره ومتمرده ولا ترضي بما قسمه الله لكي
غريب امركم ايتها البنات تبقي الواحده فيكم قاعده في البيت وساعة ما يجي لها واحد علشان يسترها ويعفها ويتجوزها تتنطط عليه هي واهلها
وبعدين تتكلموا على العنوسه وتأخر سن الزواج
انتي وامثالك هم اسباب العنوسه
انتي عاوزه واحد خالي تماما من العيوب أدلك علي مكان تلاقي فيه شخص فيه كل المواصفات اللي نفسك فيها في الجنه ان شاء الله
نقطه أخرى الرجل لم يخدعك ولم يقل لكي شيئا غير صحيح وقال لك من البدايه على ظروفه ونتي قبلتي بيها اذن ما لكيش حجه
وما تحسبيش نفسك يعني انك البنت اللي ما حصلتش قبل كده ولا هاتحصل دا انتو على قفا من يشيل ما تتنططيش وعيشي وارضي بنصيبك احسن تقعدي وتغني ظلموه
مستحيل يكون شخص بالهدوء ده متعجل في اختيار قراراته
هو ذكي في اختيار قراراته مش متعجل
أنت عصبية ودي وجهة نظرك فيه
إنما أنا شايف اللي بقوله صح
وبعدين هو هيقدر يخلص الكلية
والشخص مش بتعليمه بس
ياما ناس معاها دكتوراه ومش بيفهموا حاجة
وأنا شخصيا بحترم الناس اللي بتدرس قانون وشرع لأنه أساس المعاملة الاجتماعية..
طبعا اتجوزيييه بس ممكن تطولى الخطوبة كمان كام شهر وعلى فكرة صدقينى مش بالتعليم انا خريجة علوم واتخطبت لمهندس شفت معاه اسود ايام حياتى ودلوقتى اتخطبت لواحد مؤهل متوسط والحمد لله عايشة اجمل ايام حياتى معلش يعنى عملتلى ايه الهندسة المهم الراجل كويس وابن حلال وناجح فى شغله وبيحبك حتعوزى ايه اكتر من كدة وطالما وعدك انه حيكمل مفيش مشاكل يكمل على راحته اى وقت بس نصيحتى اخرى الخطوبة كام شهر كدة تفكرى طالما بتحبى تفكرى كويس اوى
انا مش عارفة انتى ازاى فكرة انك تسيبية جت فدماغك اصلا دة راجل مفيش منة كتير الزمن دة اسالى مجربة واتحرق دمها كتير مع رجالة ورق وكزابين يبنتى انتى معاكى نعمة بس اقولك علحاجة انتى شخصيتك نفس خطيبى وعلفكرة بتبقى متعبة من ناحية العصبية والمثالية الزايدة والتفكير الطويل بس مش بيخلى الطرف التانى يتحمل الا الحب حافظى علية وشجعية وحطى قدام عنيكى انة زى مبنى نفسة بنفسة يقدر يكمل تعليمة وحفزية لحاجة زى دى ومتعتبريهاش امر واجب النفاز لا اتجوزو واستقرو وابدءو كملو الى نقصكم
وربنا يوفقك ويكتر من امثال خطيبك خلى البنات بالها يرتاح شويةههههههههههههههه
أنا مش فاهمة .. أنتي عايزة أية بالضبط ؟
عايزة تكوشي على كل حاجة ؟؟؟ عايزة راجل محترم وطيب وغني ومتعلم و و و
مدام بتقولي الرجال كويس ومحترم وطيب معاكي لا وبيحاول يطور نفسو ويدرس
بقى عايزة أية تاني ؟
أنا بقول : أحمدي ربك ،
صباح الخير اولا انتى معندكيش مشكله انتى الا عامله مشكله مع نفسك ده راجل محترم وبيحاول يوصل ويقوى نفسه اى ان كان فى الكليه او الوظيفه اوك فالمفروض انتى تساعديه على كده وموضوع انك مزاجيه ده مفيش حاجه اسمها ست مزاجيه عيب ان الست تكون مزاجيه على زوجها ده راجل وليه تقديره واحترامه ان اتحملك مرة واتنين مش هيتحمل التالته فانتى اعملى كنترول على نفسك شويه والا يخليك تقولى الجمله او المعلومه بعصبيه وبنرفزة لا اقولها بهدؤ وبنفس هاديه القبول فيها هيكون اكتر وافضل ولو هوه متسرع فى اتخاز القرار حاولى تتفاهمى معاه بالراجه ان ده غلط وطول بالك وتروى وفكر اكتر قبل اتخاز القارا وحاولى تشاركيه بس الموضوع مش محتاج اكتر من كده وبعديم يما ناس مخطوبه وناس متزوجه وبيقابلهم مشاكل كتير جدا بس بناخدها بالعقل الا متعصب التانى يتحمله والا زهقان التانى يطول باله عليه ده زواج وعشرة وبيت بيتاثث لازم نتحمل بعض ونعدى الامور يلا شدو حيلكم ربنايوفقكم / المحامى
مدام انتي بتقولي انو شخص محترم وعلي خلق يبقي مترددة ليه
اختي العزيزه المشكله مش في الشخص الي عايز يتجوزك المشكله فيكي انتي مش قادره تاخدي قرار مع ان من كلامك ان هو انسان محترم وبيحبك ومستعد يعمل اي حاجه في الدنيا علشان يرضيكي لو ضيعتي الشخص ده من اديكي صدقيني هاتندمي لان الفرصه ما بتجيش غير مره واحده ولو ضاعت ممكن ماتجيش تاني قولي الحمد لله ان ربنا رزقك بواحد بيحبك علي العموم ممكن تصلي صلات استخاره وربنايكتبلك كل الخير الي في الدنيا انشاءالله
اضافه بس اوعى تنسى تعزمينا على الفرح لولووولى مبررررروك
مش محتاجةرد طبعا مفيش حد كدة اليومين دول ولو اطبترتى على النعمة هتزول من وشك وطلما هو بيحبك دى تكفى عن كل الى انتى قولتى
الى الاخت الفاضلة صاحبة المشكلة
اولا :دى اول مرة اكتب فيها تعليق فى المنتدى ده بالرغم من انى متابع جيد ليه بس استفزنى عرض المشكله فحبيت اعلق
ثانيا:احمدى ربنا على النعمة ال انتى فيها وامسكى فى الولد بايدك وسنانك زى ما بيقولوا ده لو الكلام ال انتى بتقوليه صح وراضيه واقفى جنبه وساعديه مش تتامرى عليه وتتطلبى منه طلبات غريبة زى الشقة ال اجرهالك وكمان بعد شوية هتقوليله عاوزة عربية اروح بيها الجامعة لانى ماجيستير وانت مكملتش دراستك
ثالثا:من خلال عرضك للموضوع انا حاسس انك مش متحمساله وعليه بقولك من فضلك سيبيه لسبب بسيط قوى انه فعلا هيصعب عليا لو كملتوا مع بعض لان من الاخر انتى مش هتسعديه طالما بتفكرى بس فى الفارق التعليمى
رابعا:لو حبيتى تكملى معاه اقعدى معاهوكلميه على ال جواكى بصراحة وقوليله على الشئ الى جواكى من ناحيته وخليه هو ال يحدديكمل ولا لاء
واضح من كلامك عن خطيبك انه شخص طيب ومحترم وعصامي بني نفسه بنفسه وكمان بيستحمل طباعك وعصبيتك وده لوحده يدل علي انه انسان رزين وهادئ واللي انا بقي فهمته من كلامك ان مشكلتك انه مكملشس كليته عشان كان مشغول بتكوين ومستقبله ……..ويابنتي كل اللي اقدر اقولهولك ان كل اللي فات ده معناه بالبلدي كده انه عريس لقطه ميتعوضش وراي ليكي انك تحمدي ربنا انك لقيتي شخص زي ده وتفكري في كل مميزات وايجابيات شخصيته وتحكمي عقلك كويس لان من الواضح ان فيه قبول بينكم وجايز موضوع الكليه ده مجرد شكل اجتماعي يهم ناس معينه……المهم فكري في اللي يهمك انتي …..وربنا يوفقك
لا يوجد انسان كامل فالكمال لله وحده….ومن كلامك ماشاء الله خطيبك فيه مواصفات كتير تتمنيها…وده الطبيعي انه يكون فيه حاجات مختلفه المهم التكامل …يعني كل واحد يكمل الحاجه الناقصه في شريك حياته…مش هنلاقي حد في الدنيا فيه كل المواصفات الي بتتمنيها…يعني مفيش عريس تفصيل…
السلام عليكم احيانا لا يعلم الانسان مدى النعمه التى بين يديه الا حينما تزول من وجهه اولا انتى باصه على النص الفاضى من الكوبيه سا يبه جميع المميزات وماسكه فى عيب واحد وهو اساس مش عيب لكن من وجهة نظرك عيب اولا موضوع التسرع اللى عندها كتيررر زى ما بتقولى مكانش وصل لمدير شركه فى سن صغيرر زى كده احمدى ربنا انه حنين عليكى ومحافظ عليكى بالنسبه لموضوع الكليه انتى باصه للفرق العلمى بينكم احيانا بل دائما خبرة الحياه اهم مليووون مره من التعليم انتى بردو بصيت لعيوبه اللى هى من وجهة نظرك عيووب ولم تنظرى الى عيوبك كالعصبيه واحيانا كثيره ياخد بعض الاشخاص حكاية نظرتك للموضوع من جميع الجهات بشكل سلبى لان الراجل يريد زوجه ولايريد مديره يريد ام لاولاده يريد الكيان الحى الذى يحس بيه ويطمئن عليه فالعلاقه الزوجيه اسمى شىء فى الوجود يريد الانثى بكل ما تحمل الكلمه من معنى اخيرا وليس باخرر توكلى على الله واتمى الزواج مفيش ناس بالكفاح ده دلوقتى بصى لنص الكوبيه المليان واقسم بالله الكوبيه كلها مليانه وده راجل زى الفل وربنا يهنيكم يا رب ويرزقكم بالذريه الصالحه اسف للاطاله