السلام عليكم
انا متزوجه من سنتين وعندي طفل عنده سنه وشهرين
انا عندى مشاكل كتير بعد الزواج دايما بربط كل مشاكلى بأنى بعدت عن ربنا بعد الجواز انا هحكى بالتفصيل كل همى وياريت مزهقوش
اولا قبل زواجى كنت بحفظ قرءان وبصوم النوافل كنت بعمل حجات كتير تقربنى من ربنا دلوقتى تقريبا بصلى بس حته صلاتى مبقتش فيها خشوع بقيت احس ان بعدى عن ربنا بقه يسببللى مشاكل كتير يعنى مثلا اوقات كتير احس ان زوجى بخيل او حريص مع ان اى حاجه اطلبها منه بيعملهالى مش بيتأخر عليا بس مثلا لو جينا نوضب شقتنا يحب انه يقتصر فى التكاليف انا مش كده انا بحب اعمل كل الى نفسي فيه مهما كان تكليفه هو ديما بيبص للمستقبل ميضيعش الفلوس علشان الولاد وان محدش ضامن ظروفه انا بقيت احس انى مبقتش راضييه عن الحجات الى زي ديه بضايق قوي من نفسي لما افكر كده واقول انا لو كنت قريبه لربنا كنت عرفيت يعنى ايه تواضع ورضيت بقليلى لان فى غيرنا مش لاقي اصلا سعات بفكر هو انا كده ظالمه زوجى انى بفكر التفكير ده عليه وانى انا غلطانه وهو مش كده ديه حاجه
الحاجه التانيه انا عمري مكنت ببص لغيري لكن دلوقتى بقيت احس ان فى مشاعر كره وغيره تجاه ناس قريبين ليا لمجرد ان هما احسن منى فى حاجه معينة مع انا الحمدلله مستواى كويس ساعات كمان لو لقيت مثلا سلفتي جوزها بيوديها تبارك لحد من اهلها وانا جوزي فى بعض الاحيان مش بيودينى بقول جوايا اشمعنى انا ولما بشوف اخت جوزى بتروح تزور اصحابها وقرايبها وجوزها سيبها عادى بقول اشمعنى انا زياراتى مقتصره بس على بابا وماما واخواتى كل فين وفين بقيت اضايق من الشعور ده انا ليه بقيت ابص لغيري ليه بعمل مقرنه وارجع اقول لنفسي مانا لو كنت قريبه لربنا وعارفه دينى كويس كنت عرفت ان الواحده تسمع كلام زوجها ومتبصش لغيري وترضي بالى هى فيه
ساعات بغيب حد زى اى معظم الناس لما يعقدو جماعه مع بعض بيجيبو فى سيره الناس سوء بالوحش او الحلو
اوقات بعقد ابكي كتير جدا واحس انه تائهه مش عارفه الطريق الصح بحاول كتير انى اقرب لربنا وارجع احفظ واقري قراءن واصوم وابعد عن الغيبه والغيره لكن مبستمرش كتير بقيت بحس ان فى هم على قلبي نفسي اكون انسانه كويسه متدينه نفسي اقرب لربنا اكتر نفسي حد يساعدنى ويوريبى الطريق الصح انا من كتر احساسي بالذنب بقيت اخاف من الموت لانى مش مستعداله بقيت افكر ان ربنا هيعقبنى فى ابنى لاما يموت وهو صغير لقدر الله او انه يبقه انسان فاسد فى المجتمع انا تعبانه قوي ونفسي ارتاح
مشاكل الازواج
تائهه من كتر احساسي بالذنب ناحية نفسي والناس
اضيف بتاريخ: Monday, January 5th, 2015 في 04:52
كلمات مشاكل وحلول: الزواج, زواج, طفل, متزوج
حبيبتي انتي مكبرة الموضوع كثير كل اللي بيحصلك عادي جدا اي حد فينا بعد الزواج يمكن يصير مستواه اقل او احسن من قبل الزواج وانتي قلتيها قلتي انك عايشة كويس الحمد لله وانتي باين عليكي ماشاء الله عاقلة والدليل انك بتلومي نفسك انتي بس اقري قران واكثري من الاستغفار لان دي مجرد وساوس شيطان وربنا يسعدك.
الشيطان بيوسوسلك عشان يخرب بيتك خليكي اذكى منه إذا جاتلك الأفكار دي استعيذي بالله من الشيطان الرجيم والمهم انها ماتنعكسش عليكي كأفعال أحمدي الله على نعمه وما تفكريش بأن ربنا هايعقبك في ابنك لأن ربنا رحمته واسعه وبيقول(أنا عند ظن عبدي بي) فظني فيه خير عشان يكون خير
نار الحسد بتحرق الحسود مش المحسود إرضي باللي قسمهولك لأن اللي مابيرضاش بيشوف الدنيا من خرم ابره في نهايه الأمر داومي على الاستغفار وقول الحمد لله في كل وقت